1 Ha ubbaa ta wozanan qopidaape guye cincatinne xilloti, enta oosoti Xoossa kushen de7oosona gada kuuyas. Shin siiqo gidin woyko ixo aybi iya naagiyako oonika erenna. 2 Dummatethi bayna ubbaa gakiya qaaday issino; xillo gidin geella, lo77o gidin iita, tuna gidin tuna gidonna ixin, yarsho yarsheysa gidin yarshonaysa ubbaa qaaday issino. Lo77o asas nagaranchuwafe lo77iya qaadi baawa; caaqo yayyeysi yayyonnaysafe dummatenna.

3 Asa ubbaa qaaday issino gideysi, ha sa7an de7iya hara iitatethaa mela daro iita. Asi de7on de7ida laytha ubban iya wozanay iitatethaninne gooshshatethan kumidi de7ees; wursethan hayqidi aggees. 4 Hayqida gaammofe paxa de7iya kani lo77o; de7on de7eysatara de7iya uraas ufaysi de7ees.

5 De7on de7iya asati issi toho hayqanaw de7eysa eroosona; shin hayqidaysati issibaaka erokona. Enti dogetidaysata gidiya gisho aykoka maaddokona. 6 Enta siiqoy, ixoynne qanaate ubbay entara issife dhayees. Hizape guye salope garsan haniyaba ubban merinaw entaw qaadi baawa.

7 Ba, ne kathaa ufaysan ma; ne woyne ushsha ne wozanay ufaytin uya. Xoossay hessa new kasepe giigisidi wothis. 8 Ubba wode ne ma7oy boothi gido; ne huuphen zayte tiya. 9 Salope garsan Xoossay new immida ha hada de7uwan, hada gidida ne qammatan ne siiqiya ne machera ufaytada de7a. Neeni salope garsan daaburada oothidaba ubbaafe nena gakiya saamay hessa. 10 Ne kushey oothanaw demmidaba ubbaa ne kumetha wolqan ootha; neeni baana duufuwan oosoy woyko halchoy woyko eri woyko cincatethi baawa.

11 Taani salope garsan haraba be7as. Hessika, eeson woxeysati ubba wode xoonokona; mino olanchoti ubba wode olan kanthokona; cincati ubba wode kathi demmokona; hiillanchoti ubba wode duretokona; tamaarida asati ubba wode sabetokona. Shin ubbaa qaadinne wodey gathidaysada hanees.

12 Gidoshin he wodey awude yaaneko eranaw danda7iya asi baawa. Kafoy xihen geleysada woyko moloy giten oyketeysada asi ubbay qoponna gakiya iita woden oyketees.

13 Salope garsan taani be7idaba harabay de7ees. Hessika cincatethi gita leemiso gideysa. 14 Guutha asi de7iya issi guutha katamiya de7awusu. He katamiw issi wolqaama kawoy olanaw dendis; iyo teqidi oykis. 15 He katamen manqo gidida issi cinca addey de7ees; I ba cincatethan he katamiw ashshis. Shin he manqo addiya zaaridi hassayday baawa. 16 Taani, “Cincatethi wolqaafe aadhees” yaagas. Gidoshin, cinca gidikoka manqo asi kadhetees; I odiyaba si7ey baawa. 17 Hessi hanikoka, deriya haareysi eeyata shiiqon waassiya waasuwa si7anaape loddara odetiya cinca asa qaala si7eysi lo77o. 18 Cincatethi ola miishepe aadhees; shin issi nagaranchoy daro lo77oba dhaysees.