1 Hayqida udunxeti sawiya shittuwa xinqisoosona; hessadaka, guutha eeyatethi cincatethinne gita bonchuwa iissees.

2 Cinca asa wozanay iya ushachi kaalethees; shin eeya asa wozani haddirsi kaalethees. 3 Eeya asi oge hemetiya wode iyaw akeeki baawa; I eeya gideysa asi ubbay erees.

4 Ne halaqay ne bolla hanqetiko ne bessaa yeddofa; si77i gidi danda7oy gita nagaraa atto giisees.

5 Salope garsan taani be7ida hara iitabay de7ees. Hessika deriya haareysati oothiya naaquwa. 6 Eeyati daro dhoqa shuumatetha oykidi de7iya wode dureti ziqa bessan uttidosona. 7 Taani aylleti haareysatada para toggidi bishin qassi haareysati aylletada tohon hemetishin be7as.

8 Olla bookiya asi he ollan kundees; gimbe dirsi laaliya uraa shooshi dukees. 9 Shuchu denthiya asi he shuchan, mithi qeriya asi he mithan deshetees.

10 Dun7ida kalta leefonna qeriko daro wolqaa wursees; shin cincatethan oothiya oosuwas ayfey de7ees.

11 Shooshi duki aggin shooshu doqiya dhale wotheysi he uraa aykoka maaddenna.

12 Cinca asa odi iyaw boncho imisees; shin eeyay ba doonape keyida qaalan baw meton gelees.

13 Eeyay ba haasaya eeya qaalan doomidi, iitatethaninne gooshshatethan polees.

14 Eeya asi darobaa odetees. Gidoshin, sinthafe hananaw de7iyaba oonika erenna. Asi hayqi aggin, haniyaba iyaw odanaw danda7ey baawa.

15 Eeya asi ba ooson daaburees; I ba soo biya ogiya erenna.

16 Na7a gidida kawoynne wonta guura gibira miya halaqati de7iya biitte nena ayye! 17 Bonchetida kawoynne mathotanaw gidonashin wolqanne minotethi demmanaw maaran miyanne uyaa halaqati de7iya biittiya anjetidaaro.

18 Addey azalla gidiko iya kaaray woddees; iya kushey oothonnaba gidiko, iya keethay xokees.

19 Kathi muussaninne woyne ushshan ufaysi bentees; shin miishey ubbaba shammees.

20 Si7iya asi baawa gada ne wozanan kawo cayopa; woyko ne zin7iya kifiliyan dure uraa baaddofa. Ne gidaysa salo kafoy bidi entaw odanaw danda7ees.