1 Ne kathaa haatha bolla yegga; daro gallasape guye neeni zaarada demmana. 2 New de7iya shaluwa laapun woyko hospun bessan shaakada wotha. Sinthafe ha sa7aa bolla ay iitabay yaaneko neeni eraka.

3 Shaari ira tookiko biitta bolla iri bukees.

Mithi pude kundin duge kundin ba kundida bessan de7ees.

4 Carko naagiya oonika kathi zerenna; shaari dendana gakanaw naagiya oonika ba kathaa cakenna.

5 Carkoy biya ogiyanne na7i ba aaye ulon waanidi medhetiyako ne eronnaysada ubbaba medhida Xoossay ba oosuwa waati oothiyako eranaw danda7aka.

6 Guura gidin omarsi ne zerethi zereysa aggofa; wontaysi woyko omarsaysi lo77aneko neeni eraka.

7 Poo7oy ufaysiyabaa; awa ayfe be7oy lo77oba. 8 Asi adussa laythi ha sa7an de7iko he laythan ufayto. Shin ha alamiyabay hada gideysanne yaana dhuma wodey merinaw daanaysa qopo.

9 Neno na7atethaw, na7atethi daro lo77oba gidiya gisho ne na7atetha laythan ufayta; ne wozanayka ufayto. Ne ayfey be7idabaanne ne wozanay amotidaba ubbaa pola. Shin he neeni oothidaba ubbaa gisho nena Xoossay pirdanaw de7eysa dogopa.

10 Na7atethinne goobatethi hada gidiya gisho ne wozanaape azzano, ne asatethafe iitatethi digga.