12
Ne na7atetha laythan nena medhidaysa qopa. Un77a gallasati yoonna de7ishin, “Haysi tana ufaysenna” geetetiya wodeti gakonna de7ishin, awinne poo7oy, ageeninne xoolintoti dhumonna de7ishin, iri bukidi aadhin, shaari simmonna de7ishin, nena medhidaysa qopa. He wodey keethe naageysati kokoriya wode, mino asi kuuniya wode, gaacceysati taybon guuxida gisho gaache aggiya wodenne maskootera xeelleysati daaburiya wode gidana. He wodey, wogga ogiyako simmida pengeti gordetiya wode, gaacciya woxa girsay ziqi giya wode, kafo waasoy ase dhiskofe barkisiya wode, macca nayta yetha girsay lepiya wode gidana. He wodey, dere keyanaw xoonetiya wode, dalga ogetara hemetanaw yashshiya wode, lawuze mithi ciiyiya wode, booley qaaxanaw xoonetiya wode, amoyabay aggiya wode gidana. He wodey, asi ba merinaa keethaa biya wode, yeekeysati dalga ogiyara yeekishe yuuyiya wode gidana.
Bira santhalaatay duuxonna de7ishin, worqa kerey meqonna de7ishin, haatha otoy pultuwa matan meqonna de7ishin, haathe ollafe goochi kessiya wodoroy duuxonna de7ishin, biittay biittako simmonna de7ishin, shempoy bana immida Xoossaako simmonna de7ishin, nena medhidaysa qopa. Astamaarey, “Hada! Hada! Ubbabay hada” yaagis.
Kuusha Qofata
Astamaarey cinca xalaala gidonashin eraka gidiya gisho deriya tamaarsis. I daro leemisota pilgidi issuwa issuwa iya maaran maaran dummayidi wothis. 10 Astamaarey like gidida qaala demmanaw koyis; hessa gisho, I xaafidabay suurenne tuma.
11 Cincata qaalay henthanchoy wude laagiya xeera oco xam7a mela. Issife shiiqida leemisoti gathi oythiya mismaare mela.
12 Ta na7aw, ha ubbaafe bollara neeni naagetanaw koshshiyabay de7ees. Maxaafa xaafidi wursanaw danda7etenna. Qassi darobaa pilgidi aggonna ixoy asatethi daabursees.
13 Heko ubbabay odetis; ubbabaas kuushshay haysa; Xoosse yayiya; iya kiitaa naaga; hessi asas waanna ooso. 14 Xoossay ooso ubbaa qassi geemmida ubbaa lo77o gidin iitaa pirdanaw de7ees.