Solomone Mazmure Maxaafa
Gaatha Qofa
“Solomone Mazmure Maxaafa” geetetiya maxaafay siiqo ginxon xaafetida maxaafa. Ha ginxotape daro baggay mazmure maaran xaafetis. Ha ginxoti xaafetishe, addey maccasas, qassi maccasi addes xaafida ginxo. Ha maxaafay issi issi birshethatan “Siiqo Saba” woyko “Mazmuretape Aadhiya Mazmure” geetetees. Hara birshethan qassi “Solomone Mazmure” geetetidi eretees.
Ha mazmurey dumma dumma ogen birshetishe gam7is. Issi issi asay, Kiristoosasinne woosa keethas giddon de7iya siiqo bessiya leemiso gidi qopoosona. Ayhudeti qassi, “Xoossasinne Isra7eele asaas giddon de7iya siiqo leemisota oykida maxaafa” goosona.
Gidoshin, ha mazmurey adde giddoninne macca giddon de7iya siiqo mazmure. Issi mehe heemmiya panthay issi mehe heemmiya geela7iw demmanaw koyees (1:7-8). Enti banta mazmuriya wode wonto enti eketi geletiya wode enta ufaysay kumethi gidanaysa qoncisosona.
Maxaafa Ayfe Qofata
Koyro Mazmure (1:1—2:7)
Nam7antho Mazmure (2:8—3:5)
Heedzantho Mazmure (3:6—5:1)
Oyddantho Mazmure (5:2—6:3)
Ichashantho Mazmure (6:4—8:4)
Usupuntho Mazmure (8:5-14)
1
1 Mazmure ubbaafe aadhiya Solomone mazmurey haysa.
Geela7iw
2 Ne siiqoy woynepe aadhidi ufaysiya gisho
tana zaara zaara yeera.
3 Ne tiyetiya shittoy waanidi sawii!
Ne sunthay goggiya shitto mela;
Geela7oti nena siiqey hessasa.
4 Tana neera ekada ba; ane issife woxoos!
Kawaw, tana ne quruxuwan gelsa.
Yerusalaame maccasata
Nenan nu ufaytoos;
ne siiquwa woyne ushshafe aathidi nashshoos.
Maccasi ubbay nena siiqeysa bessa.
Geela7iw
5 Hinteno, Yerusalaame maccasato si7ite;
taani kareethi gidikoka mala lo77o.
Ta kareethatethay Qedaare dunkaane mela;
shin ta malay Solomone magarajota mela.
6 Ta malaa kareethiday awa;
taani kareethi gidida gisho tana boropite.
Ta ishati, ta aaye nayti taara ooyetidi,
tana woyne gade naagisidosona;
hessa gisho ta woyniya naagabike.
7 Ta siiquwaw, ane taw oda;
ne dorsaa wudiya awun heemmay?
Seeta gallas enta awun shempisay?
Nena demmanaw ne laggeta wudiya kaallada,
ayis guuluntada biya maccas gido?
Panthaa
8 Maccasa ubbaafe lo77iyare,
Bessaa eronna ixiko dorsata geedo kaalla.
Ne deesha marata henthanchota
dunkaaniya matan heemma.
9 Ta siiqe! Gibxe kawo para gaareta goochiya,
parata giddon de7iya magaayeda lo77aasa.
10 Ne haythan de7iya alleequwara shiiqidi,
ne shakalay waanidi lo77i!
Ne qoodhey al7o shuchan alleeqetis.
11 Nuuni new biran cadetida,
worqa alleequwa oosisana.
Geela7iw
12 Kawoy gayta bolla uttidashin,
ta shittuwa sawoy keethan tonku gis.
13 Ta siiqoy ta dhanthata giddon de7iya,
xuntetida sawiya karbe daanees.
14 Ta siiqoy, Engaada woyne gaden,
dolida heena ciishsha mela.
Panthaa
15 Ta siiqe, neeni waana lo77ay!
Neeni waana lo77ay!
Ne ayfeti holle ayfeda lo77oosona.
Geela7iw
16 Ta siiquwaw, neeni waanna lo77ay!
Ayba ufaysay;
nu arsay cil7o maata mela ufaysees.
17 Nu keethaa tuussay ziga;
nu kaaray xiiddan oyketis.