2
Geela7iw
Taani Saaronan doliya ciishshanne
zangaaran doliya suufe ciishsha mela.
 
Panthaa
Ta siiqiya maccasa giddon be7iya wode,
aguntha giddon bentiya suufe ciishsha mela.
 
Geela7iw
Ta siiqoy hara panthata giddon xeelliya wode
woran de7iya apile mithaa mela.
Tana daro ufaysin, iya kuyaa giddon uttas;
iya ayfey min tana mal7ees.
I tana gibira miya keethi gelsis;
ba siiquwa bandirada ta bolla dhoqu dhoqu oothis. Taani iya siiquwan oyketada hargida gisho,
zabibe ayfe muzidi tana gashtisite;
apile muzidi ta wolqaa minthite.
Ba haddirsa kushiya tana borkotisis;
ba ushacha kushiyan tana qoommis.
Hinteno, Yerusalaame yalaga maccasaw,
siiqoy baw dosidi dendana gakanaw,
iya hinte barkethonna mela,
ta hintena gen7eninne wora woshi7en ammatayis.
Ta siiquwa girsay deriya bollara gupishenne,
zumaa bollara xongetishe yeysi si7etees.
Ta siiqoy woshi7e woyko gen7e mari daanees;
Heko, nu keethaa matan eqis;
maskootera soo xeellees;
magarajuwa giddora xeellees.
10 Ta siiqoy, haysada yaagees;
“Ta siiqe, denda!
Ta yegelsse, haaya, issife ane boos.
11 Heko, balgoy aadhis;
irayka eqis.
12 Biittan ciishshi ciiyis;
yethi yexiya ageenay gakis;
holle yethi nu biittan si7etis.
13 Balase mithay ayfe doomis;
woyney ciiyis;
ciishsha sawoy biittan tonku gees.
Ta siiqe, denda; ta yegelsse,
haaya; ane issife boos.”
 
Panthaa
14 Aafo doonan zaalla qophon,
qosetida holle daaniyare;
ane issi toho tana ne som7uwa bessa;
ne girsa sissa.
Ne qaalay tana mal7ees;
ne som7oy daro lo77ees.
 
Yerusalaame Geela7ota
15 Nu woyney ciiyis;
nu woyne gadiya iissiya workanata,
he guutha butaleta xihen oykite.
 
Geela7iw
16 Ta siiqoy tabaa; taanika iyabaa;
ciishshata giddon I ba wudiya heemmees.
17 Sa7i geeyana gakanaw,
kuyay dhayana gakanaw,
ta siiquwaw, gen7eda woyko woshi7e marada,
aafotiya deriyara woxashe haa simma.