Phawuloosi Efesoona Asaas
Xaafida Kiita
Gaatha Qofa
Phawuloosi Efesoonan de7iya ammaniya asaas xaafida kiitan ubbaafe aathidi bessey, “Wodey gakiya wode Xoossay polanaw qopida qofay, saloninne sa7an de7iya medhetetha ubbay Kiristoosape garsan gidana melasa” giya qofa (1:10). Yesuus Kiristoosara de7iya issifetethan, asa kochi ubbay issino gidana mela ha gita qofa ooson peeshana mela Xoossa asaa akeekisees.
Efesoona kiitan, koyro shaahuwan, xaafey kaara qofa gidida issifetethaba xaafanaw doomidaysa dalgisidi, Xoossa Aaway ba asaa waatidi dooridako, entika iya na7aa, Yesuus Kiristoosan banta nagarape maarota demmidi waanidi la77a keydakonne, Xoossa gita ufaysa qaalay Geeshsha Ayyaana baggara tuma gideysi waanidi eretidako odees. Nam7antho shaahuwan qassi, xaafey ha kiita nabbabiya asay, Kiristoosan entaw de7iya issifetethay tuma gidana mela enti waanidi daanaw bessiyako qofisees.
Asay Kiristoosan de7iya issifetethan waanidi daanaw bessiyako dumma dumma leemison qoncis. Woosa keethi asatethaa leemiso gidiya wode Kiristoosi he asatethaas huuphe. Woosa keethi gimbe keethan leemisetiya wode Kiristoosi keetha minthiya maazane shuchu. Woosa keethi machin leemisetiya wode Kiristoosi azinan leemisetis. Xaafey Kiristoosa baggara qoncida Xoossa aadho keehatetha daro nashshidi odishe, qofay ciimmo gidida oda odis. Phawuloosi, ubbaba Kiristoosa siiquwa, iya yarshetetha, I immida nagara atotetha, iya aadho keehatethaanne iya geeshshatetha baggara xeellees.
Maxaafa Ayfe Qofata
Sarotho (1:1-2)
Kiristoosanne woosa keethi (1:3—3:21)
Kiristoosan de7iya ooratha de7uwa (4:1—6:20)
Akeekisonne sarotho (6:21-24)
1
1 Xoossaa shenen Kiristoos Yesuusa hawaare gidida Phawuloosape, Efesoonan de7iya geeshshatasinne Kiristoos Yesuusa ammaneysatas xaafetida kiitaa.Hawa 18:19-21; 19:1.
2 Xoossaa nu Aawapenne Godaa Yesuus Kiristoosape aadho keehatethaynne sarotethay hintew gido.
Kiristoosan de7iya ayyaana anjuwa
3 Salon de7iya ayyaana anjo ubban Kiristoosa baggara nuna anjida, nu Godaa Yesuus Kiristoosa Aaway, Xoossay galatetto. 4 Nuuni iya sinthan geeshshatanne borey baynayisata gidana mela Xoossay alamey medhetanaape kase Kiristoosa baggara ba siiquwan nuna dooris. 5 Xoossay ba sheniyan ba dosidaysada Yesuus Kiristoosa baggara nuna ba nayta oothanaw kasetidi qopi wothis. 6 Xoossay ba siiqiya Na7aa baggara nuus coo immida aadho keehatethay bonchetana mela hessa oothis.
7 Xoossaa aadho keehatetha duretethaada Kiristoosa suuthan wozetidi nagara atotetha demmida. 8 Ba aadho keehatetha cincatethaninne eratethan kunthidi nuus immis.Qola 1:14. 9 Xoossay ba dosidaysada Kiristoosa baggara iya sheniya xuuraa nu erana mela oothis. 10 Wodey gakiya wode Xoossay polanaw qopida qofay, saloninne sa7an de7iya medhetetha ubbay Kiristoosape garsan gidana melasa.
11 Ubbabaa ba sheniyada oothiya Xoossay, kasetidi halchidaysa Kiristoosa baggara nuuni iyabaa gidana mela nuna dooris. 12 Hessa I oothiday, Kiristoosan ufaysi wothidi naagon koyro gidida nuuni Xoossaa bonchuwa galatan qoncisana melasa. 13 Hinteka hinte atotetha Wongela, hessika tuma qaala si7ida wode Kiristoosa ammanideta. Xoossay hintew immana gida Geeshsha Ayyaanan hinte attametideta. 14 Xoossaa bonchoy galatetana mela Xoossay ba asaa wozana gakanaw Geeshsha Ayyaana nuus oythu oothidi immis.
Phawuloosa woosa
15 Hessa gisho, Godaa Yesuusa hinte ammaneysanne geeshshata ubbaa hinte siiqeysa ta si7ida wode 16 ta woosan hintena qopashe hinte gisho Xoossaa galateysa aggabike. 17 Godaa Yesuus Kiristoosa Xoossay, boncho Aaway, Xoossaa hinte aathidi eranaada cincatethaanne qoncetha ayyaana hintew immanaada taani Xoossaa woossayis. 18 Xoossay hintena xeegida ufaysaynne geeshshati laattiya boncho laatay ay mela daroko hinte erana mela Xoossay hinte wozana ayfiya dooyana mela taani Xoossaa woossayis.
19 Qassi iya ammaniya nunan oothiya iya wolqay ay mela aadhida giteeko hinte erana mela woossayis. He wolqay xoonetonanne daaburonna wolqaa. Ha nunan de7idi oothiya wolqaynne, 20 Kiristoosa hayqope denthidi, salon Xoossaafe ushacha baggara utisida gita wolqay issino.Maz 110:1. 21 Iya sunthay, ayseysatapenne maata aawatape, haareysatapenne godatape, bolla gididi ha alamiya xalaalan gidonashin, sinthafe yaana alamiyanka hara sunthata ubbaafe dhoqa. 22 Xoossay ubba Kiristoosa tohope garsan haarisis; qassi woosa keethan, ubbaban Godaa gidana mela iya shuumis.Maz 8:6; Qola 1:22-23; 1:18. 23 Woosa keethi Kiristoosa kumethi oothiya iya asatethi. Medhetethay de7iya bessa ubban Kiristoosi ba huuphen ubbaba kuntheysa.