1 Hessa gisho, taani, Phawuloosi, Ayhude gidonna hinte gisho Kiristoos Yesuusan qasho asi gidas. 2 Ta hintena maaddana mela Xoossay ba aadho keehatethan taw immida ha oosuwaba hinte loythi si7ideta. 3 Ta hintew kase qanthan xaafidaysada Xoossay ba xuuraa qoncethan taw qoncisis. 4 Ta xaafidaysa hinte nabbabiya wode Kiristoosa xuuraa ta ay mela eridaako hinte akeekanaw danda7eeta.Qola 1:26-27. 5 Ha xuuray geeshsha hawaaretasinne nabetas ha77i Ayyaana baggara qoncidaysada beni wode asaas hessada qoncisibeenna. 6 Xuuray haysa: Ayhude gidonna asay Wongela baggara Isra7eeletara issife Xoossaa anjuwa laattoosona. Isra7eeletara issi keetha asi gidoosona; Kiristoos Yesuusa baggara Xoossaa ufaysa qaala ekoosona.

7 Xoossay ba oothiya wolqaa baggara taw immida aadho keehatethan ha Wongelas oosancho gidas. 8 Taani geeshshata ubbaafe laafa gidikoka Ayhude gidonna asaas zawi bayna Kiristoosa duretetha Wongela odana mela ha aadho keehatethay taw imetis. 9 Qassi kase wodiyan ubbaa medhida Xoossan qosetidi de7iya xuuras, Xoossaa qofay aybeko qoncisanaw aadho keehatethay taw imetis. 10 Xoossay hessa oothiday ha77i wodiyan woosa keetha baggara salon de7iya halaqatasinne haareysatas ba dumma dumma qoncethaa erisanaasa. 11 Xoossay ba merinaa qofaa nu Godaa Kiristoos Yesuusa baggara polanaw hessa oothis. 12 Nu ammanon yashshi bayna Xoossako shiiqana mela Kiristoosi nuus minotethinne la77atethi immis.

13 Taani hinte gisho waaye ekiya gisho, hinte ta waayan yeellatonnaada hintena woossayis; taani hinte bonchuwas waayetayis.

14 Taani aawa sinthan gulbatada woossey hessa gishosa. 15 Saloninne sa7an de7iya issi issi soo asay iyan sunthetees. 16 Xoossay ba boncho duretethaafe hinte garsa asatethaa minthiya wolqaa ba Ayyaana baggara immana mela hintew woossayis. 17 Qassi ammanon Kiristoosi hinte wozanan daana melanne hinte siiqon xapho yeddidi minnidi daana mela woossayis. 18 Hessadaka, Kiristoosa siiqoy ay mela dalgeko, adusseko, dhoqekonne ciimmoko geeshshata ubbaara, hinte akeekana wolqa demmana mela woossayis. 19 Eratethaafe aadhiya Kiristoosa siiquwa hinte erana mela qassi de7o immiya Xoossaa wolqan hinte kumana mela ta woossayis.

20 Hiza, nu giddon oothiya ba wolqaa baggara nuuni woosseysafe woyko qopeysafe aathidi oothanaw danda7iya Xoossaas, 21 woosa keethaninne Kiristoos Yesuusan wode ubban merinaape merinaa gakanaw bonchoy gido. Amin7i.