5
1 Hiza, Xoossay dosiya naytada iya daanite. 2 Kiristoosi nuna dosidi bana nu gisho Xoossaas sawiya imonne yarsho oothidi immidaysada hinteka siiqon de7ite.Kessa 29:18; Maz 40:6.
3 Shin laymatethi, tunatethinne uuzetethi ammaniya asaas bessonna gisho hinte giddon ubbaraka si7etofo. 4 Xoossaa galatitepe attishin, yeellayabaynne eeya odi woyko qidhey hintew bessonna gisho hinte giddon ubbaka de7opo. 5 Haysa erite; oonika laymatey woyko tunabaa oothey woyko uuzetey Kiristoosa kawotethaanne Xoossaa kawotethaa laattanaw danda7enna. Uuzetethi eeqa goyinno mela.
6 Hayisata gaason Xoossaa hanqoy kiitetonna asaa bolla yaana gisho oonika hintena pathonna odan cimmofo. 7 Hessa mela asaara issifetethi oothopite. 8 Kase hinte dhuman de7ideta, shin ha77i Godaa baggara poo7on de7eeta. Hiza, poo7o asada poo7on simeretite. 9 Poo7oy lo77otethi, xillotethinne tumatethi ayfees.
10 Godaa ufaysiyabaa oothanaw koyite. 11 Go77i bayna dhuma ooso qoncisitepe attishin, iyara issifopite. 12 Enti geeman oothiya oosuwa hari attoshin odanawuka yeellayees. 13 Shin ubbabay poo7on keyiya wode qoncen bentees. 14 Poo7oy ubbaba qoncen bessees. Hessa gisho,
“Neno dhiskeyso barka;
hayqope denda;
Kiristoosi ne bolla poo7ana” yaagetis.
15 Hiza, hinte waanidi de7iyako akeeki be7ite. Cincata giditepe attishin, eeyata gidopite. 16 Laythay iita gidiya gisho injetiya wode ubbaa go7etite.Qola 4:5. 17 Hessa gisho, Godaa sheney aybeko akeekitepe attishin, eeyopite.
18 Geeshsha Ayyaanan gallas gallas kumitepe attishin, dhayoko hintena kaalethiya gisho woyne ushshan mathotofite. 19 Mazmuren, sabaninne ayyaana yethan, issoy issuwara odetite. Qassi hinte wozanan yexishenne sabbishe Godaa galatite.Qola 3:16-17. 20 Nu Godaa Yesuus Kiristoosa sunthan ubba wode Xoossaa Aawa ubbabaas galatite.
21 Kiristoosa bonchuwas gidi issoy issuwas haaretite.
Azinabanne Machiba
22 Macheto, Godaas haareteysada hinte azinatas haaretite.Qola 3:18; 1 Phex 3:1. 23 Kiristoosi woosa keethaas huuphe gideysada azinika ba machees huuphe. Qassi Kiristoos ba asatethi gidida woosa keethaa ashsheysa. 24 Shin woosa keethay Kiristoosas haareteysada macheti banta azinatas ubbaban haaretanaw bessees.
25 Azinatoo, Kiristoosi woosa keethaa dosidi bana iw immidaysada hinteka hinte macheta dosite.Qola 3:19; 1 Phex 3:7. 26 I woosa keethaa ba qaala baggara haathan meeccidi geeshshis. 27 Kiristoosi woosa keethaa qiti woyko som7o tuussi woyko hessa melabay bayna I kumetha bonchuwara geeshshinne boretonaaro oothidi baako shiishanaw koyidi hessa oothis. 28 Hessadaka, azinati bantana doseysada banta macheta dosanaw bessees. Ba machiw doseysi bana dosees. 29 Bana ixiya asi oonika baawa, shin Kiristoosi woosa keethaas ootheysada ba asatethaa muzeesinne naagees. 30 Nuuni Kiristoosa asatethaa billiteta.
31 Xoossaa qaalay, “Hessa gisho, asi ba aawanne ba aayiw aggidi, ba machera issife daana; enti nam7ayka issi asho gidana” yaagees.Medhe 2:24. 32 Haysi gita xuura, shin taani hessa Kiristoosabaanne woosa keethabaa leemiso oothada odayis. 33 Gidoshin, hinte issoy issoy hinte macheta hinte, hintena doseysada dosite. Issi issi macha ba azinaa bonchanaw bessees.