1 Kawoy Arxekisisi Hinde biittafe Tophe biitta gakanaw de7iya, xeetanne laatamanne laapun biitta aysiya wode hanidaba. 2 Kawoy ba araatan uttidi aysiya waanna katamay Suusa geetetees.

3 I kawotida heedzantho laythan, baape garsara daynnatasinne biitta ayseysatas gita gibira giigisis. He gibira bessan Meedonanne Farse toora moconati, biitta haareysatinne ayseysati bentidosona. 4 Kawoy issi xeetanne hospun tammu gallas kumethi ba kawotethaa duretethaanne ba yashshiya bonchuwa ubbaa enta bessis.

5 He gallasatape guye, kawoy qassi hara laapun gallas gam7iya gibira, Suusa kataman, durepe manqo gakanaw de7iya asa ubbaas giigisis. He gibiray kawo gadhoy de7iya atakilte bessan giigis. 6 He bessan de7iya dabaabay, liinope oosetida boothinne kaalose geshetan alleeqis. Gesheti ocha teera daaniya al7o liino kiren aathin, ibnebarade geetetiya shuchafe oosetida tuuqiya bolla de7iya bira migiddotan kaqetidi uttidosona. Qassi worqafenne birape oosetida arsati, dumma dumma mali de7iya al7o shuchatape oosetida baasuwan maaran yegetidosona. 7 Issoy issuwafe dumma gidida worqa burcukon woyne ushshi asa ubbaas imetis. Kawoy daro keeha gidida gisho, woyne ushshas zawi baawa. 8 Issi issi asi ba koyida mela uyees; hessa kawoy koyrottidi ba aylletas odis.

9 He wode Kawiya Asxiina maccasa ubbaas gibira kawo gadhon giigisasu.

10 Gibiray doometida laapuntha gallas, kawoy Arxekisisi woyne ushsha alidi ufaytida wode, ba aylleta Mehumana, Bizita, Harboona, Bigita, Abagita, Zataranne Karkasa geetetiya laapun shuufata xeegidi, 11 “Kawiw Asxiino kawotetha kallacha wothidi haa ekidi yiite” yaagidi kiittis. Iya daro mala lo77o gidiya gisho, halaqatinne asa ubbay iyo be7ana mela kawoy koyis. 12 Shin kawa kiitaa iw odin, kawiya Asxiina kawa sinthe yoonna ixasu. Hessi kawa daro hanqethis.

13 He biitta higgiyanne de7o wogaa eriya asaa zore oyshoy kawa matan meezetidaba gidiya gisho, wodiyaba shaakidi eriya cinca asatara odetis. 14 Kawoy gita maati de7iya laapun Farsenne Meedona shuumata, Arqesiyoosa, Shetara, Adimata, Tarshesha, Mareesa, Marsananne Memukaana xeegisis. 15 Kawoy enta, “Taani, kawoy Arxekisisi, ta shuufata kiittin, Kawiya Asxiina ta kiitaa polonna ixasu. Hessa gisho, higgey odiya maaran iyo waatanaw bessii?” yaagidi oychis.

16 Entafe issoy, Memukaani kawa sinthaninne halaqata sinthan haysada yaagis; “Kawiya Asxiina kawa xalaala gidonashin, iya halaqata ubbaanne iya kawotetha giddon de7iya asa ubbaa naaqasu. 17 Ha kawotetha giddon de7iya maccasi ubbay kawiya Asxiina oothidaysa si7idi, banta azinata kadho doomana. Enti, ‘Kawoy Arxekisisi baako yaana mela xeegisin, kawiya Asxiina ixabekeyee?’ yaagana. 18 Hessa xalaala gidonashin, Farsenne Meedona halaqata maccasay hessa si7ida wode, hachi awi wullana gakanaw banta azinata hessada gidi kadhana. Hessa gaason macheta giddoninne azinata giddon ooshshi keyana. 19 Hessa gisho, kawaw, neeni dosiko, kawiya Asxiina nam7antho ne sinthe aadhona mela teqiya awaajo kessa. He awaajoy nam7antho laametonna mela Farsenne Meedona higgiya giddon xaafeto. Hessafe guye, kawotetha bonchuwa iipe ekada hara lo77o maccasas imma. 20 Ha neeni aathida awaajoy ha gita kawotetha ubban odetiya wode issi issi maccasi dure gidin manqo gidin, shaakonna ba azinaa bonchana” yaagis.

21 Kawoynne iya halaqati ha zoriyan ufaytidosona. Hessa gisho, Memukaani gidaysada kawoy oothis. 22 I ba kawotethaa giddon de7iya dumma dumma biittatas enta pidaleninne enta doonan xaafidi, dabdaabe yeddis. He awaajoy, issi issi azini ba keethaa keethaa aysiya halaqa gideysa odees.