1 He gallas asa ubbay si7ishin, Muse Maxaafay nabbabetis; he wode enti, “Moo7abe asaynne Amoone asay Xoossaa asaara merinaw gahetanaw bessenna” giya bessaa maxaafan demmidosona. 2 Ayis giiko, Isra7eele asay Gibxefe keyidi, Kanaane biya wode Moo7abenne Amoone biitta asay entaw kathinne haathe immidi mokanaysa aggidi, Isra7eele asaa baaddana mela Balaamas miishe immidi shammidosona. Gidoshin, nu Xoossay baadetha anjon laammis. 3 He higgiya Isra7eele asay si7ida wode allaga asaa banta giddofe shaakidosona.

4 Hessafe kase Xoossa keetha miisheta wothiya keethaas halaqa gidida kahiney, Eliyaseebi Xoobara dabbotethi medhis. 5 Hessafe gaason Eliyaseebi, katha imotata, ixaane, Xoossa keetha geeshsha miisheta, kathaa woyniyanne zaytiya, Leewetas, zammaretasinne naageysatas immiya asraatanne kahinetas immiya kathaa wothiya wogga kifiliyan Xoobbey daana mela immis.

6 Ha ubbay haniya wode ta Yerusalaamen de7ike. Arxekisisey Babiloone biittan kawotida hastamanne nam7antho laythan taani simmada Babiloone biitta kawako bas. Gidoshin, guutha wodepe guye kawa oychada, 7 Yerusalaame simmada yas. Xoossa keetha zabban Eliyaseebi Xoobbiyas daana kifile giigisidi wothida iitabaa si7as. 8 Daro yilotada, Xoobbiya soo miishe ubbaa kifiliyape kessada kare holas. 9 Kifilya wogaada geeshshana mela kiittas. Xoossa keetha miisheta, kathaa, imotatanne ixaaniya zaarada keethaa gelsas.

10 Qassi asay Leewetas bessiya kathaa immiboona gisho Leewetinne zammaareti banta Xoossa keetha oosuwa aggidi goshshas guye bidaysa be7as. 11 Hessa gisho, taani halaqatako, “Xoossa keetha oosuwa ayis yeggi aggidetii?” yaagada hanqetas. Hessafe guye, Leeweta xeegada ubbaa enta oosuwan oosuwan zaaras. 12 Yaatin Yihuda asay kathaafe, woyniyape, zaytiyape immiya asraata wothiya keethaa zaaridi eho doomis. 13 Taani kahiniya Salama, xaafiya Saadoqanne Leewiya Padaya miishe wothiya keethaas halaqa oothada shuumas. Qassi Mataana na7aa na7aa Zakura na7ay Hanaani enta maaddeysa. Haysati ubbay koshshiyaba ubbaa banta ishatas shaaki shaaki imon ammanetidaysata gididosona.

14 “Ta Xoossaw tana qopa; qassi ne keetha oosoy giigana mela taani oothida lo77o oosuwa dogopa” yaagas.

15 He wode taani Yihudan de7iya asay Sambaata gallas woyne gum7ishin be7as; harati kathi, woyne ushsha, woyne ayfiya, balase ayfiyanne harabata banta haren caanidi, Sambaata gallas Yerusalaame ehishin be7as. Hessa gisho, enti Sambaata gallasa zal7onaada taani entaw minthada odas. 16 Hessa bolla qassi Yerusalaamen de7iya Xiroosa asay molonne hara issi issi zal7e miisheta ehidi Sambaata gallas Yihuda asaasinne Yerusalaamen bayzoosona. 17 Taani Yihuda halaqata, “Haysa mela iita ooso oothidi Sambaata ayis tuniseetii? 18 Xoossay nu bollanne nu katamaa bolla haysa mela meto ehiday, kase hinte aawati hessa mela iitabaa oothida gisho gidennee? Ha77i hinte Sambaata tunisidi, Isra7eele asaa bolla hara hanqo ehanaw haneeta” yaagada hanqetas.

19 Hessafe guye, Sambaati gelanaape sinthe Yerusalaame gimbiya pengeti gordetanaadanne Sambaati aadhonashin dooyetonna mela kiittas. Qassi Sambaata gallasan ayba toohoyka gelonnaada naagana mela ta oosanchotape issota issota gimbe pengiya bolla essas. 20 Hessa gisho, dumma dumma zal7e miisheta ehiya zal7anchoti issi toho woyko nam7u toho Yerusalaame gimbiyafe kare baggara aqidosona. 21 Shin taani entako, “Gimbiyafe karera waananaw aqeetii? Hinte nam7antho haysada oothiko taani wolqan hintena teqana” yaagada hanqetas. He gallasape simmin nam7antho Sambaata gallas yibookona. 22 Taani Leeweti banta huuphiya geeshshana mela, pengeta naagana melanne Sambaata gallasaa geeshshi oothana mela kiittas.

“Ta Xoossaw, ha ubbaa gisho tana qopa; ne merinaa siiquwa gisho taw qadheta” yaagada woossas.

23 He wode taani Yihuda adde asape issoti issoti Ashdooda, Amoonenne Moo7abe biittafe macho ekidaysa be7as. 24 Enta naytape baggay Ashdooda biitta woyko hara biitta doona haasayoosona; banta biitta, Yihuda doona odetanaw danda7okona. 25 Taani entara ooyetas; enta baaddas; entafe issota issota dechada, enta huuphiya binaana shoddas. Hessa xalaala gidonashin, enti banta macca nayta enta adde naytas immonnaada, enta macca nayta bantawunne banta adde naytas ekonnaada Xoossaa sunthan caaqisas. 26 Qassi entako, “Kawoy Solomoney nagara oothiday allaga biitta maccasata ekoysana gidennee? Solomone mela kawoy hara biitta kawota giddon baawa; Xoossay iya dosida gisho, Isra7eele asa ubbaa bolla kawoyis. Shin, hara attoshin iyaka allaga biitta maccasati haysa mela nagara oosisidosona. 27 Yaatin, nuka hintena si7idi, allaga maccasa ekidi hessa mela iitabaa oothidi Xoossaa naaqaneyee?” yaagas.

28 Kahine halaqaa Eliyaseeba naytape issoy Yoyada. Shin iya naytape issoy Beet-Horona katama asi gidida Sanbalaaxa na7iw macho ekis. Yaatin, taani Yoyada Yerusalaame katamaape gooddas.

29 “Ta Xoossaw, haysati kahinetetha wogaanne kahinetaranne Leewetara caaqida caaquwa waati tunisidaako be7a” yaagada woossas.

30 Enta allaga biitta tunatethaafe geeshidaape guye kahinetasinne Leewetas enta oosuwa oosuwa immas. 31 Yarshos eethiya mithay woden woden yaana melanne asay baw ayfidabape koyro ayfiya imota oothidi ehana mela wogaa wothas.

“Ta Xoossaw, ne keehatethan tana qopa” yaagada woossas.