1 Kawoynne Haami Astiri gibira maanaw bidosona. 2 He nam7antho gallas gibiras bidi, enti woyne ushsha uyishin, kawoy, “Kawe Astire, neeni woossiyabay aybee? Taani new immana. Neeni tana oychiyabay aybee? Hari attoshin ta kawotethaafe baggaa gidikoka, taani ne oysha polana” yaagidi oychis.

3 Kawiya Astira zaarada, “Kawaw, neeni tanan ufaytidaba gidiko, qassi ta oyshaaka polanaw dosiyaba gidiko, ta woosaynne ta oyshay tanne ta asay hayqonna attana melasa. 4 Tanne ta asay issoyka attonna ubbay hayqos bayzetida. Nuuni bayzetiday macca ayllenne adde aylle gididi de7anaasa gidiyako, taani si77i gaana. Hessa mela metoy kawa waaysanaw bessiyaba gidenna” yaagasu.

5 Kawoy Arxekisisi zaaridi, “Hessa oothanaw xaltaamiday oonee? I he addey awun de7ii?” yaagidi kawiw Astiro oychis.

6 Astira, “Nu morkey, nuna dhaysanaw koyey, ha iita addiya Haama” yaagasu.

He wode Haami kawa sinthaninne kawe sinthan daro dagammis. 7 Kawoy daro hanqetidi, ba uttida bessaafe dendi, kawo gadho atakilte bessaa bis. Shin Haami kawoy iya bolla iitabaa ehanaw qopidaysa erida gisho, Astira iya hayqope ashshana mela woossanaw guye attis.

8 Kawoy atakilte bessaafe simmidi geliya wode, Haami kawiiw Astiro maarota woossanaw, iya uttida arsa bolla gufannidaysa be7is. Kawoy yilo eexidi, ba qaala dhoqu oothidi, “La ha addey haysan kawo keethan, ta sinthan, kawiw kawushanaw koyiyee?” yaagis.

Kawoy buroo hessa haasayishin, kawo shuufati yidi, Haama som7uwa goozidosona. 9 Entafe issoy, Harboona geetetiya shuufay, “Kawaw, Haami nena hayqope ashshida Mardikiyoosa kaqanaw essida ishatamu wadha mithi iya son de7ees” yaagis.

Kawoy zaaridi, “Haama efidi, he mithan kaqite” yaagidi kiittis.

10 Hessa gisho, Mardikiyoosa kaqana gidi giigisida mithan Haami kaqetis. Hessafe guye, kawa hanqoy dochis.