1 Ayhudeta morkey Haami kaqetida gallas kawoy Arxekisisi Haama shaluwa ubbaa kawe Astiris immis. Qassi Mardikiyoosi iw mata dabbo gideysa Astira kawas odasu. Hessa gisho, he wodepe doomidi, Mardikiyoosi kawako gelanaw danda7is. 2 Kawoy Haamape guye ekida ba migiddo maatamiya kessidi, Mardikiyoosas immis. Astira Mardikiyoosa Haama shaluwa bolla aawayada shuumasu.

3 Hessafe guye, Astira yeekashe, kawa toho bolla kundada, Agaaga koche gidida Haami Ayhudeta bolla tukida iita maqoy ooson pee7onna mela kawa woossasu. 4 Yaatin, kawoy ba worqa xam7aa iw miccin, iya denda eqada, 5 “Kawaw, neeni tanan ufaytidaba gidiko, qassi ta oyshaaka polanaw neeni dosidaba gidiko, ne kawotethaa giddon de7iya Ayhude ubbaa kumethi wodhana mela, Agaaga koche gidida Hamadaata na7ay Haami kessida awaajuwa shaariya hara awaajo kessanaada woossayis. 6 Ha ubba dhayoy ta asaa bollanne ta dabbota bolla gakiya wode taani si77i gada waanna xeello?” yaagasu.

7 Hessafe guye, kawoy Arxekisisi, kawiw Astironne Ayhude gidida Mardikiyoosa haysada yaagis; “Haami Ayhudeta wodhanaw awaajo kessida gisho, taani mithan iya kaqisidaysanne iya shaluwa ubbaa kawe Astiris immidaysa hinte ereeta. 8 Gidoshin, kawo gadho maatame wothin, kawa sunthan keyida awaajoy laametanaw danda7enna. Hessa gisho, hinte hinte baggara Ayhudeta maaddanaw koydaba xaafite. Hessa ta sunthan xaafidi, kawo maatamiya iya bolla wothite” yaagis.

9 Nisaane geetetiya heedzantho ageenan, laatamanne heedzantho gallasan, Mardikiyoosi kawa xaafeta ubbaa xeegidi, Hindefe bidi Tophe gakanaw de7iya xeetanne laatamanne laapun biittatan kawope garsara haareysatas, awuraja ayseysatasinne biitta halaqatas yeddiya awaajo xaafisis. Awaajoy dumma dumma doonaninne dumma dumma pidalen xaafetis; qassi Ayhudetaska enta doonaninne enta pidalen xaafetis. 10 Mardikiyoosi he awaajuwa ubbaa kawa Arxekisisa sunthan xaafisidi, kawo maatame wothidi, kawo gaaxatan dhiiketida, eesotiya parata toggiya asata bolla biitta ubbaa yeddis.

11 Kawoy kessida awaajoy, katamatan de7iya Ayhudeti issife shiiqanawunne banta bolla yaaba oletidi zaaranaw danda7ana mela maata immees. Qassi ola miishiya oykidi, ay biittafeka, enta olanaw yeyisata, enta naytaranne enta machetara ubbaa issuwaka ashshona wodhanawunne enta shaluwa bonqidi ekanaw maata immees. 12 Ayhudeti kawa Arxekisisa kawotethan hessa oothanaw qachida gallasay, Adaare geetetiya tammanne nam7antho ageenan, tammanne heedzantho gallasaana. 13 Kawa awaajuwa biittata ubban de7iya asay eranaada, higge gididi awaajetis. Hessika Ayhudeti banta morketa bolla halo keyanaw bantana giigisanaw danda7isees. 14 Kiiteteysati kawo keetha parata toggidi, kawa kiitaa gathanaw ellesidi bidosona. Qassi Suusa kataman ha awaajoy asa ubbaas odetis.

15 Mardikiyoosi kaalosenne bootha kawotetha ma7o ma7idi, ocha teera daaniyanne liinope oosetida kaaba bollara ma7is; qassi gita worqa kallachaa wothidi, kawa sinthafe keyis. Suusa katamay ililisaninne ufaysan noocu gis. 16 Hessi Ayhudetas gita ufaysi, ililsinne boncho wode gidis. 17 Hessa gisho, kawa awaajoy nabbabetida biittaninne katamaa ubban de7iya Ayhudeti gita ba7aale kessidi, ufaytishenne gibira mishe pee7idosona. Hessa gaason Ayhudetas yayyidi, yan de7iya hara zare asaape daroti Ayhude gididosona.