Kessa Maxaafa
Gaatha Qofa
Ha maxaafa suntha birshethay “Keydi buussu” woyko “Kessi” guussu. Ha maxaafay, Isra7eele asay Gibxe biitta aylletetha duussaafe waanidi keydako qoncisees. Ha maxaafay oyddu gita qofatan shaaketees.
Isra7eele asaa aylletethafe la77a kessaa
Isra7eele asay Siina zuma gakanaw bida buussaa
Xoossay ba asara caaqida caaquwanne immida dumma dumma higgeta
Geeshsha dunkaaniya keexo, iya giddon go7etiya miishetanne kahineta ma7o.
Ha maxaafay, Xoossay ba asaa aylletethafe kessiya wode ay oothidaako, qassi ufaysa qaala immida dere waatidi oothidaako qoncisidi bessees.
Xoossay Yayqooba sheeshi gidida Isra7eele asaa Gibxe biittafe kessiya wode enta kaalethana mela Xoossay xeegida addey Muse.
Maxaafa Ayfe Qofata
Isra7eele asaa aylletetha duussaa (1:1-22)
Muse yeletethinne na7atetha wodiya (2:1-25)
Museynne Aaroni Gibxe kawa sinthan (3:1—6:30)
Tammu gadotanne Paasika Ba7aale (7:1—13:22)
Isra7eele asay zo7o abba pinethi (14:1—15:21)
Zo7o Abbaafe Siina Zuma gakanaw (15:22—18:27)
Tammu kiitatanne hara higgeta (19:1—24:18)
Geeshsha dunkaaniyanne iya giddon go7etiya miisheta (25:1—27:21)
Kahinetas imetida kiita, yarshonne sambaata (28:1—31:18)
Isra7eele asay bantaw eeqa medhidosona (32:1-35)
Xoossay ba caaquwa oorathidi hara higgeta immis (33:1—35:3)
Geeshsha dunkaaniyas imetida imotanne kahineta ma7o (35:4—36:7)
Geeshsha dunkaaniya keexida hiilanchota (36:8—38:31)
Kahineta ma7onne Geeshsha dunkaaniya eso (39:1—40:30)
1
Isra7eele Asaa Un7etetha
1 Banta soo asaa ubba ekidi, Yayqoobara Gibxe bida Isra7eele adde nayta sunthay haysafe kaallidi xaafetidaysa; 2 Entika Robeela, Simoona, Leewe, Yihuda, 3 Yisakoora, Zabloona, Biniyaame, 4 Daane, Niftaaleme, Gaadenne Aseera. 5 Yayqooba sheeshati ubbay laapun tamma. Yoosefi kaseka Gibxen de7ees. 6 Wodepe guyen Yoosefi, iya ishatinne he yeletetha ubbay hayqidosona. 7 Shin Isra7eele sheeshay yeletidi Gibxe biitta kumana gakanaw taybon daridosonanne minnidosona.
8 Hessafe guye, Yoosefa eronna hara kawoy Gibxe biittan kawotis. 9 He kawoy ba asaa, “Heko, ha Isra7eeleti nuupe aadhidi yeletethaninne wolqan daridosona. 10 Nuuni hiillatonna ixiko enti taybon kaseysafe haa darana. Qoponna oli dendiko enti nu morketara issifidi nuna olidi, biitta yeggidi baanaw danda7oosona” yaagis. 11 Hessa gisho, deexo ooson enta un7ethana mela enta bolla iita kaapota wothidosona. Enti Pitoomanne Ramse geetetiya shallo wothiya katamata kawas keexidosona. 12 Shin Gibxeti enta darsi un7ethinka enti haa daridi yeletidosonanne biitta gakidosona. Gibxeti Isra7eeleta ixida gisho yayyidosona. 13 Entana iita ooso oosisidosona. 14 Urqa yedhison, siminton xuube medhon qassi gade oosison enta de7uwa camisidosona. Qadhey bayna deexo ooso ubbaa enta oosisidosona.
15 Gibxe kawoy qantha Ibraawe maccasata ulo pittiya Sipooronne Puuho geetetiya nam7u maccasatako haysada yaagis; 16 “Ibraawe maccasati yeliya wode yeletida na7ay adde gidiko wodhite, shin macca gidiko paxa aggite” yaagis. 17 Shin ulo piteysati Xoosse babbidi, Gibxe kawoy kiitidaysada oothibookona. Enti adde nayta paxa aggidosona. 18 Hessafe guye, Gibxe kawoy he ulo pitteyisata xeegidi, “Hinte ayis haysa oothidetii? Adde nayta ayis paxa aggetii?” yaagidi enta oychis.
19 Ulo piteysati zaaridi, “Ibraawe maccasati Gibxe maccasata mela gidokona. Enti mino gidiya gisho ulo piteysati gakanaape sinthatidi yeloosona” yaagidosona.
20 Hessa gisho, Xoossay ulo pitteysatas keehis. Isra7eele asay kaseysafe haa darshenne minnishe bidosona. 21 Qassi ulo piteysati Xoossas yayyida gisho Xoossay entaw enta soo asi immis. 22 Hessafe guye, kawoy ba asaa ubbaako, “Ibraawetape yeletiya adde ubbaa Nayle Shaafan yeggite; shin macca na7i yeletiko paxa aggite” yaagidi kiittis.