1 Yoosefi ba aawa aha bolla kundidi, yeerishe iyaw yeekis. 2 Hessafe guye, Yoosefi dhale shiishiya ba oosanchota, ba aawa Isra7eele aha shitto tiyidi melisana mela kiittis. Enti tiyidi melisidosona. 3 Shitto tishsha wogay oytamu gallas kumethi ekees. Gibxe asati iyaw laapun tammu gallas yeekidosona.

4 Yeeho gallasati aadhida wode, Yoosefi Gibxe kawa oosanchota, “Taani hinte sinthan saba demmidaba gidiko, taw kawas haysada yaagidi odite. 5 ‘Ta aaway tana issi caaqo caaqisis. Taani hayqanaw matas. Taani ta huuphen Kanaane biittan bookida gongolo duufuwan tana mooga’ yaagis. Hessa gisho, ‘Ha7i taani yaa bada ta aawa moogada simmana mela tana yeddarki’ yaagite” yaagis.

6 Yaatin Kawoy, “I nena caaqisidaysada bada ne aawa mooga” yaagis.

7 Yaatin Yoosefi ba aawa mooganaw bis. Kawa moorinnati ubbay, kawa keethaninne Gibxen de7iya gita asati ubbay Yoosefa kaallidi bidosona. 8 Yoosefa soo asa ubbay, iya ishatinne iya aawa soo asati Yoosefara bidosona. Enta yooga nayti, enta dorsati, enta deeshatinne enta miiza wudiya xalaali Geesamen attis. 9 Para gaaretinne togati iyara bidosona. Iya kaallidi bida asay daro.

10 Enti Yordaanose Shaafa matan de7iya Axaade geetetiya wudumma gakidi, banta qaala dhoqu oothidi, zeleelidi yeekidosona. Yan Yoosefi ba aawa yeehuwan laapun gallas uttis. 11 He biittan de7iya Kanaane asati Axaade wudumman he yeehuwa be7ida wode, “Gibxeti aybi yibbata yeeho yeekona?” yaagidosona. Hessa gisho, Yordaanose matan de7iya he bessay Abeel-Mixraama (Gibxeta Yeeho) geetetis.

12 Yayqooba nayti enta aaway enta kiitidaysada oothidosona. 13 Enti iya aha Kanaane biitta efidi, Mamirepe ushacha baggan de7iya Makifeela gongoluwan moogidosona. Hessika, Abrahaamey Hite addiya Efroonape moogoos shammida gadiya. 14 Yoosefi ba aawa moogidaape guye, ba ishataranne iya aawa mooganaw iyara bida hara asata ubbatara Gibxe simmis.

15 Banta aaway hayqidaape guye, Yoosefa ishati banta giddon, “Nuuni iyaw oothida iitaba ubbaas Yoosefi nuna ba ulon morkidi halo keyanaw koyiko nuuni waananee?” yaagidosona. 16 Hessa gisho, Yoosefako yaagidi kiita kiittidosona; “Ne aaway hayqanaape sinthe nuuko, 17 ‘Neeni, ne ishata nagaraanne enta iita naaquwa hayyana atto yaaga yaagis gidi odite’ yaagis. Hessa gisho, ha7i hayyana, nu nagara, ne aawa Xoossa aylleta naaquwa atto yaaga” yaagidosona. Yoosefi hessa si7idi yeekis.

18 Hessafe guye, iya ishati banta huuphen iyako yidi, iya sinthan gufannidi, “Nuuni, ne aylleta” yaagidosona.

19 Shin Yoosefi entako, “Babofite, Tana hintew Xoossa gidetiyee? 20 Hinte taw iita oothideta, shin ha7i daro asay hayqonna attana mela Xoossay haysa lo77otethas oothis. 21 Hessa gisho, hiza babofite. Taani hintenanne hinte nayta muzana” yaagidi, enta minthethidi lo77o qaala hassayis.

22 Yoosefi, iyaw laythi xeetanne tamma gidana gakanaw ba aawa soo asaara Gibxen de7is. 23 Efreema naytanne, enta nayta nayta be7is. Qassi Minaase na7aa Makira nayta, ba nayta oothis.

24 Hessafe guye Yoosefi ba ishata, “Taani hayqanaw matas, shin Xoossay hintena maaddanaw xomoosana. I hintena ha biittafe kessidi, Abrahaames, Yisaaqasinne Yayqoobas immana gidi caaqida biitta efana” yaagis. 25 Yoosefi Isra7eele nayta, “Xoossay hintena maaddanaw xomoosiya wode, hinte ta meqetha ha biittafe ekidi biite” yaagidi caaqisis.

26 Yoosefi xeetanne tammu laythi de7idi hayqin, shittuwan iya aha tiyidi melisidaape guye, Gibxe biittan saaxinen wothidosona.