1 Issi wode Musey Midiyaame biitta kahiniya, ba bolluwa Yotora dorsaanne deesha heemmees. I he wudiya laagi ekidi mela biitta gaxan Xoossa zuma geetetidi xeegetiya Koreeba*Koreeba: Koreeba zumaas hara sunthay Siina zuma. zuma bolla efis. 2 He bessan Godaa Kiitanchoy†Godaa Kiitanchoy: Ha bessan Godaa Kiitancho geetetiday asaas qonciya Godaa woyko Xoossaa guussu. tushiyan eexiya tama lacuwa giddon iyaw bentis. Musey tushey taman oyketinka tamay tushiya moonnaysa be7idi, 3 “Taani yaa bada, tushey ayis taman meetetonnaako he oorathabaa shiiqada be7ana” gidi qopis.

4 I be7anaw shiiqidaysa Goday be7idi, tushiya giddofe, “Muse! Muse!” gidi xeegis.

Musey, “Heko, abe Godaw” gidi koyis.

5 Xoossay iyako, “Haa shiiqopa. Neeni eqida biittay geeshshi gidiya gisho, ne tohuwan de7iya caammaa kessa” yaagis. 6 Goday iyako, “Taani ne aawata, Abrahaame, Yisaaqanne Yayqooba Xoossaa” yaagis. Musey Xoossaa ba7anaw yayyida gisho, ba som7uwa kammis.

7 Goday qassika haysada yaagis; “Taani Gibxen de7iya ta asay ay mela waayako be7as. Enti bantana un7ethidi haareysatape ashshana mela taako waassiya waasuwa si7as. Enta waayaka erayis. 8 Hessa gisho, taani enta Gibxe asaa kushepe ashshanawunne he biittafe enta kessada, ha77i Kanaaneti, Hiteti, Amooreti, Parzeti, Hiwetinne Yaabuseti de7iya biitta, maathinne eessi kumida lo77o biitta ehanaw wodhas. 9 Ta deriya waasoy ha77i tana gakis. Gibxe asati enta qohida qohuwa taani be7as. 10 Hessa gisho, ha77i neeni ta asaa iya biittafe kessana mela Gibxe kawako taani nena kiittayis” yaagis.

11 Shin Musey, “Kawako baanawunne Isra7eeleta Gibxefe kessanaw taani oonee?” yaagis.

12 Xoossay zaaridi, “Taani neera gidana. Qassi taani nena kiittidaysas mallay haysa; neeni ta asaa Gibxefe kessiya wode ha zuma bolla hinte tana goyinnana” yaagis.

13 Musey Xoossaako, “Gidoshin, taani Isra7eeletako bada entako, ‘Hinte aawata Xoossay tana hinteko kiittis’ yaagiko, enti tana, ‘Iya sunthay oonee?’ yaagidi oychiko, taani entaw woygada zaaro” yaagis.

14 “Xoossay Museko, ‘De7eysinne daanaysi, Tana’ neeni Isra7eeletako, ‘TAANI TANA GIDIDAYSI’ tana hinteko kiittis yaaga” yaagis.

15 Xoossay zaaridi, “Neeni Isra7eeleta Goday hinte aawata, Abrahaame, Yisaaqanne Yayqooba Xoossay, tana hinteko kiittis. Haysi ta merina sunthaa; yaana yeletetha ubbay ha sunthan tana xeegana.

16 “Bada Isra7eele cimata shiishada, Goday hinte aawata Xoossay, Abrahaame, Yisaaqanne Yayqooba Xoossay new qoncidaysa oda. Gibxen enti waayetiya waayiya taani xomoosada be7idaysa entaw oda. 17 Taani entana Gibxe waayiyape kessada maathinne eessi kumida, Kanaaneta, Hiteta, Amooreta, Parzeta, Hiwetanne Yaabuseta biitta efanaw qaala gelas.

18 “Isra7eele cimati ne giyaba si7ana. Hessafe guye, neeninne Isra7eele cimati Gibxe kawako bidi, ‘Goday, Ibraaweta Xoossay, nuus qoncis. Ha77i nuuni heedzu gallasa oge mela biitta bidi, Godaas, nu Xoossaas yarshsho yarshana mela nuna yedda’ yaagite. 19 Shin wolqan gidonna ixiko, Gibxe kawoy hintena yeddonnaysa taani erayis. 20 Hessa gisho, taani ta wolqan dumma dumma malaatata oothada Gibxeta shocana. Hessafe guye, I hintena yeddana.

21 “Qassi taani Gibxe asaa sinthan teemo hintew immana. Yaaniya gisho hinte keyiya wode mela kushe keyeketa. 22 Ibraawe maccas ubbay ba shooron de7iya Gibxe maccasaakonne ba son de7iya Gibxe maccasaako bidi, bira alleeqo, worqanne ma7o immite gidi oychana. Hinte hessa ekidi hinte nayta mayzana. Hessada oothidi hinte Gibxe shalo ubbaa ekidi baana” yaagis.