1 Musey, “Enti tana ammanonna ixidi, woyko taani giyaba si7onna ixidi, ‘Goday new qoncibeenna’ giiko woygo?” yaagidi oychis.

2 Goday Museko, “Ne kushiyan de7eysi aybee?” yaagidi oychis.

“Xam7a” yaagis.

3 Goday iyako, “Ane sa7an yegga” yaagis. Musey he xam7aa sa7an yeggin, shooshi gidin, Musey iyape woxis. 4 Hessafe guye, Goday, “Ne kushiya yeddada iya goyna oyka” yaagis. Musey ba kushiya yeddidi shoosha oyki denthin shooshay iya kushen simmidi, xam7a gidis. 5 Goday, “Ne aawata Xoossay, Abrahaame, Yisaaqanne Yayqooba Xoossay new qoncidaysa enti ammanana mela haysa ootha” yaagis.

6 Kaallidi Goday Museko, “Ne kushiya ne shophen naaqa” yaagis. Musey ba kushiya shophen naaqis. I kessiya wode iya kushey baro hargen oyketidaada booxis. 7 Goday iyako, “Ne kushiya ne shophen zaarada naaqa” yaagis. Musey ba kushiya ba shophen zaari naaqidi kessiya wode iya kushey simmidi hanko asatethi mela gidis.

8 Goday, “Enti nena woyko koyro malaata ammanonna ixiko, nam7antho malaata ammanana. 9 Shin enti ha nam7u malaatata ammanonna ixiko, woyko neeni giyaba si7onna ixiko, Nayle Shaafape haathe ekada, mela biitta bolla gussa. He haathay biitta bolla suuthan laametana” yaagis.

10 Musey Godaako, “Abeeti Godaw, kaseka woyko ha77i ne tana odiso oykidaysafe doomin odidi ammanthoy taw hanenna. Ta geeshshada odetanaw danda7ike; ta inxarsay lufa” yaagis.

11 Goday iyako, “Asas doona immiday oonee? Muume woyko tulle oothey oonee? Xeeliseynne qooqisey oonee? Tana Godaa gidikinaayee? 12 Ha77i neeni ba; neeni odetana mela ta nena maadana. Ne gaanaba ta new immana” yaagis.

13 Shin Musey, “Godaw, hayyana, hara asi kiitta” yaagis.

14 Hessafe guye, Goday Muse bolla daro hanqetidi iyako, “Leewe gidida ne ishaa Aaroni baawee? I oda loythidi ereysa ta erayis. Ha77i I neera gahetanaw yishe oge bolla de7ees; I nena be7iya wode wozanape ufaytana. 15 Neeni, ‘Yaaga’, gada iyaw odana. Taani hinte nam7ayka woygi odanekonne waatidi oothaneko hintena tamaarsana. 16 I ne doona gididi asas ne gisho odana. Neeni Xoossa bessan gidada I gaanaba iyaw odana. 17 Ha xam7a eka bada iyara malaata oothada bessa” yaagis.

18 Hessafe guye, Musey ba bolluwa Yotarako simmi bidi, “Hanno gakanaw asay paxa de7iyako be7anaw, taani guye Gibxe ta asaako boo?” yaagis. Yotori Museko, “Ee ba; saro gaka” yaagis.

19 Musey Midiyaame biittan de7ishin Goday iyako, “Nena wodhanaw koyida asati ubbay hayqida gisho guye Gibxe simmada ba” yaagis. 20 Musey ba machiwunne ba adde nayta hare togisidi guye Gibxe simmis. Musey Xoossaa xam7a ba kushen oykidi bis.

21 Goday Muse, “Neeni Gibxe simmada biya wode, taani new immida wolqan Gibxe kawa sinthan malaatata oothanaysa balopa. Shin hessanka I asaa yeddonna mela taani iya wozanaa muumisana. 22 He wode taani Goday giyaba kawas hayssada yaagada oda. ‘Isra7eeli ta bayra na7a. 23 I taw goyinnana mela iya yedda gada taani new odas. Shin neeni yeddonna ixadasa. Hessa gisho, taani ne bayra adde na7aa wodhana’ yaagees gada oda” yaagis.

24 Ogen shempo bessan Goday Musera gahetidi iya wodhanaw koyis. 25 Iya machiya Sipoora qara shuchu ekada, ba na7aa qaxarasu. Qaxara shoohuwara Muse tohuwa bochasu. Iya Museko, “Neeni taw tuma suutha medda” yaagasu. 26 Hessa gisho, Goday iya wodhonna aggis. He wode iya Museko, “Ha qaxaruwa gaason neeni attadasa” yaagasu.

27 He wode Goday Aaronako, “Musera gahetanaw mela biitta ba” yaagis. I bidi, Xoossaa zuma bolla Musera gahetidi iya yeeris. 28 Musey Gibxe bidi gaanabaanne oothana malaatata ubba Goday iya kiitidaysa Aaronas odis. 29 Museranne Aaronara Gibxe bidi, Isra7eele cimata ubbaa shiishidosona. 30 Aaroni Goday Muses odida qaala ubbaa entaw odis. Qassi Musey malaatata he asaa sinthan oothis. 31 Entika ammanidosona. Goday entaw qopidaysanne enta waayiya be7idaysa si7ida wode gufannidi goyinnidosona.