1 Hessafe guye, Goday Museko, “Gibxe kawako ba. Taani ha malaatata enta giddon oothanaw koyada kawa wozanaanne iya moorinnata wozana muumisas. 2 Taani hessa oothiday ta malaatatan waatada Gibxeta seeridaako hinte hinte naytasinne hinte nayta naytas odana mela koyida gishosa. He wode taani Godaa gideysa hinte erana” yaagis.

3 Museynne Aaroni kawako bidi, “Goday, Ibraaweta Xoossay neeko, ‘Neeni taw kiitetethi ixey awude gakanaasee? Tana goyinnana mela ta asaa yedda. 4 Neeni enta yedo ixiko, wonto ne biitta bolla taani boole yeddana. 5 Booley darotethaafe dendoysan biitta ubba kammana. Enti shacha gaduwape attida guuthabanne mitha haythi ubbaa maana. 6 Ne keethaa, ne moorinnata keethaanne Gibxe asaa ubbaa keethaa enti kumana. Hessi ne mayzati ha biittan de7osape hano gakanaw be7ida iitabaape aadhiyaba gidana’ yaagees” yaagidosona.

Hessafe guye, Musey kawa sinthafe keyidi bis.

7 Kawa moorinnati kawako, “Ha uray awude gakanaw nuus xihe gidanee? Asay Godaa, banta Xoossaa goyinnana mela enta yedda. Gibxe biittay dhayeysa neeni akeekikii?” yaagidosona.

8 Kawoy Musenne Aarona guye xeegisidi, “Bidi Godaa, hinte Xoossa goynite, shin beysati oonantee?” yaagis.

9 Musey, “Nuuni biya bessan Godaa bonchanaw ba7aale oothana gisho, nuuni nu guutha nayta, nu cimata, nu adde nayta, nu macca nayta, nu dorsatanne nu miizata ekidi issife baana” yaagis.

10 Kawoy, “Hinte hinte naytanne hinte maccasata eki boonna mela taani Godan caaqisayis. Hinte hinte wozanan iitaba qopidaysi eretees. 11 Hinte, bidi Godaa goyinnanaw koyaba gidiko addeta xalaala eki biite” yaagis. Hessafe guye, Musenne Aarona kawa sinthafe goodetidi keyidosona.

12 Goday Museko, “Booley yidi shacha gaduwape attida ubbaa maana mela ne kushiya Gibxe biitta bolla dentha” yaagis.

13 Musey ba xam7aa Gibxe biitta bolla denthida wode, Goday doloha bagga carko he qammanne gallas kumethi biitta bolla carkisis. Wontiya wode he carkoy boole ehis. 14 Booley Gibxe biitta ubbaa gakidi ma7is. Hessa mela boole gadoy he biittan kaseka hanibeenna; sinthafeka hanenna. 15 Biitti dhumana gakanaw booley biitta ubbaa ma7is. He booley shachafe attidi gaden dicciyaba ubbaanne mitha ayfe ubbaa midosona. Gibxe biittan de7iya mitha haythinne cil7oba ubbaa midigis.

16 Kawoy Musenne Aarona ellesi xeegisidi, “Taani Godaa hinte Xoossaanne hintena naaqas. 17 Hiza ta nagara taw issi toho atto giite. Ha dhaysiya gaduwa taape diggana mela Godaa hinte Xoossaa woossite” yaagis.

18 Musey kawa matape keyidi Godaa woossis. 19 Goday wuloha wolqaama carkuwa kiittidi booliya biittafe denthidi, Zo7o Abba yeddis. Gibxe biitta ubban issi booleyka hayqibeenna. 20 Shin Goday kawa wozanaa muumisida gisho Isra7eeleta yeddonna ixis.

21 Goday Muse, “Gibxe biittan asi oyki be7iya dhumi dhumana mela ne kushiya salo dentha” yaagis. 22 Musey ba kushiya salo denthis. Gibxe biitta ubban heedzu gallas kumethi sakana dhumay dhumis. 23 He heedzu gallasatan Gibxeti issoy issuwa be7ibookona woyko oonika ba soope keybeenna. Shin Isra7eeleti de7iya Geesamen poo7oy de7ees.

24 Kawoy Muse xeegisidi, “Bidi hinte Godaa goyinnite. Hinte maccasaynne hinte nayti hintera baanaw danda7oosona. Hinte dorsaa wudiyanne hinte miiza wudiya xalaala aggidi biite” yaagis.

25 Shin Musey, “Nuuni xuussa yarshonne hara yarsho Godaa Xoossaas yarshana mela mehe neeni nuus immanaw koshshees. 26 Issoyka guye attona nu mehey nuura baanaw koshshees. Godaa, nu Xoossaa goyinnanaw mehiyape dooranaw bessey nuna. Nuuni ya gakonna de7ishe ay mehe yarshaneko eranaw danda7oko” yaagis.

27 Shin Goday kawa wozanaa muumisida gisho, I enta yeddanaw koybeenna. 28 Hessafe guye, kawoy Museko, “Ta sinthafe kicha; ta sinthan zaara bentada nena era. Ta ayfiya ne be7ida gallas hayqana” yaagis. 29 Musey iyako, “Tumaka ne gidaysada neeni ta ayfiya zaarada be7aka” yaagis.