1 Goday Museko, “Taani Gibxe kawa bollanne iya asaa bolla issi hara gado yeddana. Hessafe guye, I hintena kessi yeddana. I hintena ubbaa gooddidi kessana. 2 Isra7eele asay, addeynne maccasi banta shoorotape biranne worqa alleeqo oychana mela entaw oda” yaagis. 3 Goday Isra7eele asaas Gibxeta sinthan teemo immis. Gibxe kawa moorinnatinne asay Muse daro bonchetida asada xeellidosona.

4 Musey kawako, “Goday haysada yaagees; ‘Qamma bilahe taani Gibxe biitta giddora kanthana. 5 Gibxe biittan de7iya bayra adde na7i ubbay, kawa araata laattanaw de7iya bayra na7aape doomidi, woxan gaaciya macca aylle bayra na7a gakanaw, bayra yeletida mehe ubbay hayqana. 6 Gibxe biitta ubban hessafe kaseka sinthafeka hanonna gita yeehoy yeekeettana. 7 Shin Isra7eele asaa bolla woyko enta mehiya bolla kanika boccenna.’ He wode taani Goday Gibxeta giddoninne Isra7eele giddon dummatethi medheysa neeni erana. 8 Ne moorinnati ubbay yidi ta sinthan gufannana. Ta asaa ekada ha biittafe keyana mela enti tana woossana. Hessafe guye, taani baana” yaagis. Musey shenen xuugetidi kawa sinthafe keyidi bis.

9 Goday muses kase, “Gibxe biittan taani malaalsiyaba darsada oothana gaso kawoy hintena si7enna” yaagidi odi wothis. 10 Museynne Aaroni malaalsiyaba ubbaa kawa sinthan oothidosona. Shin Goday kawa wozanaa muumisida gisho, Isra7eeleta ba biittafe yeddonna ixis.