1 Goday Gibxe biittan Musenne Aarona haysada yaagis; 2 “Ha ageenay hintew laythas koyro ageena gido. 3 Isra7eele asa ubbaas ha wogaa odite. Ha ageenay gelida tammantho gallasan, issi asi ba soo asaas issi maraze woyko issi kole eko. 4 He keetha asaa tayboy he mehiya wursidi maanaw danda7onna ixiko, iyaranne iya mata shooruwara banta soo asaa taybuwa melanne issi issi asi midi wursanaw danda7iya keena ekidi he mehiya shukidi issife mona. 5 Hinte dooriya mehey dorse woyko deeshe gidanaw danda7ees, shin issi laythi kumidaysanne iya bolla borey bayna adde gido. 6 Ha ageenas tammanne oyddantho gallas gakanaw enta heemmite. He gallas omarsi laadiya wode Isra7eele asaa maabara ubbay enta shukanaw bessees. 7 Asay he suuthaafe ekidi enti miya keetha wula garsa, qomuwanne bokoluwa tiyo. 8 Ashuwa he gallas qamma taman caacidi cammiya boncoranne uythara miite. 9 Ashuwa qaye woyko kathidi moopite. Huuphiya, gedatanne ulo ashota ubbaa caacidi miite. 10 He ashuwape wontana gakanaw aykoka ashshofite. Wontana gakanaw attiko hessa xuuggite. 11 Oges giigiya ma7o ma7idi, hinte caammaa aathidi, hinte xam7aa oykidi eeson miite. Hessi tana Godaa bonchiya Paasika ba7aale hintew gido.

12 “Taani he qamma Gibxera kanthada bayra yeletida ubbaa, asenne mehe wodhana. Gibxe eeqata ubbaa pirdana; taani Godaa. 13 He suuthay hinte de7iya keethaa erisiya malla gidana. Taani Gibxeta pirdiya wode he suuthaa be7ada hintena qohonna agga aadhana.

14 “Ha gallasay taani Goday hintew oothidaysa laythan laythan qofisiya Godaa bonchiya ba7aale gido” yaagis.

15 “Laapun gallas gakanaw irshoy gelonna uythi miite. Koyro gallas irsho hinte soope diggite. He laapun gallasatan irshoy de7iya uythi miya asi Isra7eele asaa giddofe duuxidi kureto. 16 Koyro gallasaninne laapuntha gallasan goyinnanaw shiiqite. He gallasatan aybi oosoka oothopite, shin kathi kathanaw danda7eeta.

17 “Taani Isra7eele deriya Gibxefe kessiday he gallas gidiya gisho ha uytha baaliya laythan laythan bonchite. Hessi hintew merina woga gido. 18 Koyro ageenan, tammanne oyddantho gallas omarsafe doomidi, laatamanne issintho gallas omarsi gakanaw irshoy geliboonna uythaa miite. 19 Laapun gallas gakanaw irshoy hinte son bentofo. Irshoy gelidaba miya biitta aawu na7a gidin woyko asa gade asi gidin, he keetha aaway Isra7eele maabara giddofe kureto. 20 Irshoy gelidaba aykoka moopite. Hinte de7iyason awunka irshoy geliboonna uythu miitepe attishin, irshoy gelida uythu moopite” yaagis.

21 Musey Isra7eele cimata ubbaa xeegisidi haysada yaagis; “Hinte issoy issoy soo bidi paasika ba7aale bonchanaw maraze woyko kole shukite. 22 Hisoophe mitha haythafe danki ekidi, keren de7iya suuthan yeddi ekidi wula garsa, qomuwanne bokoluwa tiyite. Wontana gakanaw hintefe issoyka ba keethaafe kare keyopo. 23 Goday Gibxe bayrata wodhanaw he biittara kanthiya wode, he suuthaa wula garsa, qomuwaninne bokoluwa bolla be7idi aggidi aadhana. Hayqo ehiya kiitanchoy hinte soo gelidi hintena wodhonna mela diggana.

24 “Hintenne hinte nayti ha kiita merinaw naagite. 25 Goday kase immana gidi qaala gelida biitta hinte geliya wode ha wogaa oothite. 26 Hinte nayti hintena, ‘Ha baaliya nu ayis bonchiw?’ gidi oychiya wode, 27 hinte entako, ‘Haysi Godaa bonchiya Paasika yarsho. Hessika Goday Gibxe biittan Isra7eele asa keethaa aggidi, aadhidi, Gibxe bayrata wodhidi, nuna ashshida gishosa’ yaagite” yaagis.

Hessafe guye, Isra7eeleti gulbatidi goyinnidosona. 28 Isra7eeleti, Goday Musenne Aarona kiitidaysada oothidosona.

29 Giddi bilahe Goday Gibxen bayra yeletida ubbaa, kawa araata laattanaw de7iya bayra na7aape doomidi, qasho keethan de7iya asata bayra nayta gakanawunne bayra yeletida mehe ubbay hayqidosona. 30 Kawoy, iya moorinnatinne Gibxe biitta asa ubbay qamma dendidosona. Gibxe biittan asi hayqiboona issi keethika bayna gisho, asay banta qaala dhoqu oothidi gita yeeho yeekidosona. 31 He qamma kawoy Musenne Aarona xeegisidi, “Hintenne hinte Isra7eeleti ta biittafe keyidi biite. Hinte tana oychidaysada bidi hinte Godaa goyinnite. 32 Hinte gidaysa mela hinte dorsaanne mehiya wudiya ekidi biite. Qassi hinte Xoossay tana anjana mela woossite” yaagis.

33 Gibxe asay, “Isra7eeleti banta biittafe ellesidi keyana mela dirgisidosona. Hinte keyonna ixiko nu ubbay wuroos” yaagidosona. 34 Hessa gisho, Isra7eele asay irshoy geliboonna munaqa keren kunthidi, banta ma7uwan kammidi, banta hashen tookidosona. 35 Isra7eeleti Musey enta kiitidaysada Gibxeta, bira alleeqo, worqa alleeqonne ma7o immana mela oychidosona. 36 Goday, Isra7eeleti Gibxeta sinthan sabetanaada oothin, Gibxeti enti oychidaba ubbaa immidosona. Hessada yaatidi enti Gibxeta shaluwa bonqi ekidi bidosona.

37 Isra7eeleti Ramse katamaape dendidi Sukota geetetiya bessi tohon bidosona. Asaa tayboy naytanne maccasaa gujonna usupun xeetu mukula. 38 Qassi entara hara daro walaka asay, meheynne dorsa deesha wudey laagetidi bis. 39 Gibxefe enti dirgon keyida gisho kathi kathanaw wode dhayidosona. Enti keyishe eki keyida irshoy geliboonna munuqape ekidi uythi uukidosona.

40 Isra7eeleti Gibxe biittan de7ida laythay oyddu xeetanne hastama. 41 Oyddu xeetanne hastamu laythay wuriya he wursetha gallas Godaa asa ubbay Gibxe biittafe keyidosona. 42 Goday ba asaa naagidi, Gibxefe kessida wode sa7i qamma. He qammay yeletethaafe yeletethaa gakanaw Isra7eele asay barkidi naagishe aqiya, Godaas dummatida qamma.

43 Goday Musenne Aarona, “Paasika gallasaa bonchiya wogay haysa yaagis; asa gade asi paasika kathaafe moopo. 44 Hinte hinte miishen shammida aylley qaxaretidaape guye mo. 45 Shin hintera gam7iya imathinne une oothiya asi iyape moopo.

46 “He Paasika kathay kaxida keethan yan miite. He ashuwape aykoka kare kessofite. Meqethatape issuwaka menthofite. 47 Isra7eele maabara ubbay Paasika ba7aale bonchanaw koshshees.

48 “Asa gade asi gididi hinte giddon de7iya asi Godaa Paasika Ba7aale bonchanaw koyko, iyaranne iya son de7iya adde ubbay qaxareto. Hessafe guye, I biitta aawu na7ada taybetidi Paasika Ba7aale bonchanaw danda7ees. Shin qaxaretiboona asi iyape moopo. 49 Ha wogay biitta aawu naytasinne hara biitta asi gididi hinte giddon de7iya asaas issino” yaagis.

50 Isra7eele ubbay, Goday Musenne Aarona kiitidaysada oothidosona. 51 He gallas Goday Isra7eeleta cugan cugan Gibxe biittafe kessis.