1 Goday Museko, 2 “Bayra yeletida adde ubbaa taw dummaya. Isra7eele asaa giddon bayra yeletida ubbay, ase woyko mehe gidin ubbay tabaa” yaagis.

3 Hessafe guye, Musey asaako, “Ha gallasay, hinte Gibxe aylletethaafe keyida gallas gidiya gisho iya qopite. Goday ba gita wolqan hintena kessiday he gallasaana gidiya gisho, irshoy gelidaba aykoka moopite. 4 Abiiba ageenan, hachi gallasan hinte Gibxefe keydeta. 5 Goday Kanaaneta, Hiteta, Amooreta, Hiwetanne Yaabuseta biitta hintena laatisanaw hinte mayzatas caaqis. Goday hintena maathinne eessi kumida he biitta gathiya wode laythan laythan ha koyro ageenan ha gallasaa bonchite. 6 Laapun gallas kumethi irshoy geliboonna uythi miite. Laapuntha gallasay Godaa bonchiya ba7aale gidana. 7 He laapun gallasatan irshoy geliboonna uythi miite. Irshoy woyko irshoy de7iyabay hinte giddoninne hinte zawan bentofo. 8 He gallas neeni, ‘Taani haysa oothey taani Gibxefe keyiya wode Goday taw oothidaysa qopanaasa’ yaagada ne naytas oda. 9 Ha ba7aaley hinte kushen woyko hinte som7on qashetida malla gididi hintena qofisiyaba gidana. Goday hintena ba gita wolqan Gibxefe kessida gisho, Godaa wogay hinte doonape wodhonna melanne haratas hinte odana mela hintena qofisana. 10 Hessa gisho, hinte ha baaliya laythan laythan ba wodiyan bonchite.

11 “Goday hintewunne hinte mayzatas immana gidi caaqida Kanaaneta biitta gelsidi, he biitta hintew immiya wode, 12 bayra yeletida ubbaa Godaas imma. Ne mehetan bayra yeletiya adde ubbay Godaasa. 13 Bayra yeletiya hare mari ubbaa dorsa maran woza. Wozonna ixiko iya morgiya mentha. Ne adde nayta giddon bayra yeletida ubbaa woza. 14 Sinthara yaana laythatan ne nayti nena, ‘Haysi aybee?’ gidi oychiko neeni, ‘Goday nuna ba gita wolqan Gibxe aylletethaafe kessis. 15 Gibxe kawoy ba wozana muumisidi nuna yeddonna ixin, Goday Gibxe biittan de7iya asape doomidi mehe gakanaw bayra ubbaa wodhis. Nuuni bayra yeletida mehe adde Godaas yarsheynne bayra adde nayta nuuni wozey hessasa yaaga. 16 Goday nuna ba gita wolqan Gibxefe kessida gisho, ha ba7aaley nu kushen woyko nu som7on qashetida malla gididi nuna qofisiyaba gidana’ yaaga” yaagis.

17 Kawoy asaa yeddida wode, Xoossay enta mata gidida Filisxeeme biittara kanthisiya ogiyara kaalethibeenna. Xoossay hessa oothiday, “Asaa oli gakiko, banta qofaa laammidi guye Gibxe simmana” yaagidi qopida gishosa. 18 Hessa gisho, Xoossay asaa mela biitta ogiyara yuushshidi, Zo7o Abbaako*Zo7o Abba: Ibraawetho doonan ha qaalay Mayre Abba geetetees. kaalethis. Isra7eeleti olas giigidi Gibxe biittafe keyidosona.

19 Yoosefi, “Xoossay tuma hintena ashshanaw yaana. He wode hinte ta meqethaa ha biittafe ekidi biite” yaagidi Isra7eeleta caaqisidi wothida gisho Musey iya meqethaa baara ekidi bis.

20 Enti Sukotape dendidi mela biitta gaxan de7iya Etaaman uttidosona. 21 Enti gallasinne qamma hemetana mela gallas entana kaalethanaw shaara tuussan, qamma poo7isidi enta kaalethanaw tama tuussan enta sinthan bis. 22 Gallas shaara tuussay, qamma tama tuussay asaa sinthafe kichibeenna.