1 Isra7eele asay Gibxefe keyida heedzantho ageenas koyro gallasan Siina mela biitta gakidosona. 2 Enti Rafidimape dendidi bidi, Siina zuma sinthan de7iya mela biittan uttidosona.

3 Musey Xoossara gahetanaw zuma bolla keyis. Goday zumaa huuphepe iya xeegidi, “Yayqooba sheeshi gidida Isra7eeletas haysada yaaga; 4 ‘Taani Gibxeta bolla oothidabaanne arganthi ba na7a ba qefiyan tookeysda ta hintena waata tookada taako ehidaako hinte hinte huuphen be7ideta. 5 Ha77i hinte taw kiitetikonne ta caaquwa naagiko, biitta kumethay tabaa gidikoka hinte taw dooretida dere gidana. 6 Hinte taw geeshsha dere gidana; hinte kawotethan kahine gididi tana haggaazana.’ Neeni Isra7eeletas odana qaalay haysa” yaagis.

7 Musey guye bidi, zumako cimata xeegi shiishidi, Goday odida qaala ubbaa entaw odis. 8 Enti, “Goday gidaba ubbaa nuuni oothana” yaagidosona. Musey enti gidaysa Godaas odis.

9 Goday Museko “Taani neera haasayishin asay si7anaadanne enti nena ubba wode ammananada taani muumida shaarara neeko yaana” yaagis. Hessafe guye, Musey asay gidaysa Godaas odis.

10 Goday Museko “Neeni asaako bada hachinne wonto taara gahetanaw bantana geeshshana mela entaw oda. Enti banta ma7uwa meeccidi, 11 heedzantho gallasas giigeto. He gallas asa ubbay tana be7ishin taani Siina zuma bolla wodhana. 12 Neeni ha zuma yuushuwan zawa wotha. Asay zuma bolla keyonna mela woyko zumaa xaphuwa bochonna mela entaw oda. Zumaa bochida oonika hayqana. 13 He uray shuchan cadetidi woyko dongen duketidi hayqo; iya kushen oonika bochofo. Mehey woyko asi hessada hayqo. Moyzey punetiya wode enti zumaa bolla keyanaw danda7oosona” yaagis.

14 Musey zumaa bollafe wodhidi, asay Xoossaa goyinnanaw bantana giigisana mela odis. Entika banta ma7uwa meeccidosona. 15 Musey asaako, “Heedzantho gallasaas giigetite; hinte machetara aqopite” yaagis.

16 Heedzantho gallas wonta guura deshoy dechis. Wol7anthinne sakana shaari zumaa ma7idi bentis. Wolqaama moyze waasoy si7etis. Asay dunkaanida bessa ubban yashshan kokoridosona. 17 Hessafe guye, Musey asaa Xoossara gathanaw entana dunkaaniyape kessidi efis; enti zumaa xaphon eqidosona. 18 Goday Siina zumaa bolla tama lacora wodhida gisho Siina derey cuyan kametis. Gita coocepe cuyi keyeysada iyape cuyiya zuley suure keyis. Asa ubbay daro kokoridosona. 19 Moyziya waasoy dari dari bida wode Musey odin, Xoossay deshon iyaw zaaris. 20 Goday Siina zumaa huuphe bolla wodhidi, Muse pude zumaa bolla xeegis. Musey zumaa bolla keyis. 21 Goday iyako, “Neeni duge bada asay tana be7ana gidi, zawa aadhona melanne entafe daroy hayqonna mela entaw oda. 22 Hari atto Godaa mati shiiqiya kahinetika bantana geeshsho. Enti hessa oothonna ixiko ta enta hanqana” yaagis.

23 Musey Godaako, “Neeni zuma dummayida gishonne zawa immida gisho asay zuma huuphe keyanaw danda7okona” yaagis.

24 Goday iyako, “Neeni duge bada Aarona neera ekada ya. Kahinetinne asay zawa kanthidi taako yishe dhayona mela entaw oda” yaagis. 25 Hessa gisho, Musey asaako wodhidi Goday gidaysa entaw odis.