1 Xoossay Isra7eele asaako haysada yaagis; 2 “Nena Gibxefe aylletethaafe kessida Goday ne Xoossay tana.

3 “Taape attishin, hara xoosse goyinnofa.

4 “Bolla saluwan de7iyaba, woyko garsa sa7an de7iyaba, woyko sa7ape garsan haatha giddon de7iyaba aybaka new goyinniya eeqa daanisada oothofa. 5 Entaw hokofa woyko enta goyinnofa. Ayis giiko, taani, Goday ne Xoossay, ta bonchuwa hara xoossatara koxonna Xoosse. Tana ixiya aawata nagaraa gisho nayta heedzantho woyko oyddantho yeletethi gakanaw hanqana. 6 Shin tana siiqeysatanne ta kiita naageysata sheesha mukulu yeletethi gakanaw keehana.

7 “Xoossaa ne Godaa sunthaa hadan denthofa. Goday ba sunthaa hadan dentheyisata seeronna aggenna.

8 “Sambaata Geeshsha gallas oothada naaga. 9 Neeni ooso oothanaw bessiya usupun gallasati de7oosona. 10 Shin laapuntha gallasay neeni Godaa bonchiya shempo gallas. He gallasan ayba oosoka oothofa. Neeni, woyko ne nayti, woyko ne aylleti, woyko ne mehey, woyko ne biittan de7iya asa gade asati he gallasan ooso oothopite. 11 Usupun gallasa giddon Goday salota, sa7aa, abbanne enta giddon de7iya ubbaa medhis, shin laapuntha gallasan shempis. Hessa gisho, Goday Sambaata gallasaa anjisinne dummayis.

12 “Goday ne Xoossay new immiya biittan ne laythay aduqana mela ne aawanne ne aayiw boncha.

13 “Ase wodhopa.

14 “Laammofa.

15 “Kaysotopa.

16 “Ne laggiya bolla wordo markatofa.

17 “Ne laggiya keethaa amottofa. Ne laggiya machiw, woyko iya aylleta, woyko iya mehiya, woyko iya hariya, woyko iyaw de7iyaba aybaka amottofa” yaagis.

18 Asa ubbay deshoy decheysanne moyzey puneteysa si7idi, wol7anthay wol7ameysanne derey cuyeysa be7idi yashshan kokorishe haahon eqidosona. 19 Enti Museko, “Neeni nuus oda; nuuni si7ana. Shin nuuni hayqonna mela Xoossay nuus odopo” yaagidosona. 20 Musey asaako, “Yayyofite; Xoossay hintena paacanawunne hinte iyaw kiitetidi nagara oothonna mela I yis” yaagis. 21 Asay banta de7iyasuwan haakidi eqidashin, Xoossay de7iyasuwa muumida shaarako Musey shiiqis.

22 Hessafe guye, Goday Museko “Isra7eele asaas haysada yaagada oda; ‘Salope taani hintew odishin hinte tana hinte huuphen be7ideta. 23 Yaaniya gisho, bira eeqa woyko worqa eeqa hintew oothidi ta bolla gujidi goyinnofite. 24 Neeni taw yarsho bessi urqafe giigisa. Ne dorsatapenne ne booratape ekada xuussa yarshonne issifetetha yarsho iya bolla yarsha. Hinte tana goyinnana mela taani doorida bessa ubban hinteko yada hintena anjana. 25 Neeni taw yarsho bessi shuchafe keexiyaba gidiko masetida shuchafe keexofa. Neeni massiya miishen iya bochiko tunisaasa. 26 Neeni keyashe kallotonna mela taw yarsho bessi kodora keyiya bessan keexofa’ ” yaagis.