1 “Wordo oda gasethofa; wordo markatada bala asi maaddofa. 2 Iitaba oothanaw daro asaa kaallofa. Pirda wobisanaw daro asaara issifada markatofa. 3 Manqoy pirdas shiiqiya wode iya manqotetha be7ada maaddofa.

4 “Ne morkiya booray woyko harey dhayin demmiko, zaarada iyaw efa. 5 Nena ixiya uraa harey caanara kundin be7ada, uraa maaddada denthona aggada aadhofa.Zaare 22:1-4.

6 “Pirda dabaaban manqoy pirdas shiiqiya wode iya pirdaa wobbisopa. 7 Oonaka malten mootopa; xilluwa wodhopa. Hessa melaba oothidaysa taani pirdonna aggike. 8 Wodhaafe ekofa; wodhaafey suure xeelliya asa ayfe qooqisees, xillota pirdaa mirqees.

9 “Betanchuwa naaqofa. Hinte Gibxe biittan bete asi gididi de7ida gisho, asa gade asi gidoy ay mela si7etiyako ereeta.

10 “Neeni ne gadiya usupun laythi goyada ma. 11 Laapuntha laythan gadiya goyonna shaacha; iyan dolidi kaxiyaba shiishopa. Ne asaa giddon de7iya manqoti iyape mo; qassi entafe attidaysa do7ati mo. Ne woyne gadiyanne ne shamaho gadiya hessada ootha.

12 “Neeni usupun gallas ooso ootha. Ne booraynne ne harey shempana melanne ne son yeletida aylleynne bete asi shempana mela laapuntha gallasan ooso oothofa. 13 Taani hintew odidaba ubbaa minthidi oothite. Hara xoossata sunthaa xeegidi woossofite; enta sunthaa denthofite.

14 “Tana bonchanaw laythan heedzu ba7aale gallasati hintew de7o. 15 Hinte Gibxefe keyida Abiiba geetetiya ageenan, taani hintena kiitidaysada Uytha Ba7aale bonchite. Laapun gallas irsho yeggidi uukida uythi moopite. Tana goyinnanaw yishe mela kushe yoopite.

16 “Qassi hinte, hinte gaden zerin, koyro gakida kathaa cakiya wode Kathaa Cako Ba7aale bonchite.

“Laytha wursethan, woyniyanne hessa mela mithata ayfiya hinte gadepe maxiya wode Shaqara Ba7aale bonchite. 17 Laythan laythan bonchetiya ha heedzu ba7aaletan adde ubbay tana, hinte Godaa goyinnanaw yo.

18 “Neeni taw mehe yarshiya wode irsho yeggidi uukida uythara taw yarshofa. Ba7aale bonchiya gallas yarshetida modhuwafe wontas aybika attofo. 19 Hinte gaden bayra kaxida katha ubbaafe lo77uwa Godaa, hinte Xoossaa soo ehite. Deesha mari woyko dorsa mari iya aaye maathan doysopa.

20 “Ne ogiyan nena naagana malanne taani new giigisida bessaa nena efana mela taani kiitancho ne sinthan kiittana. 21 I odiyaba si7ada iyaw kiiteta; iya bolla Makallofa. Ta iyaw maata immida gisho, hinte nagara oothiyaba gidiko, hinte nagaraa maarenna. 22 Hinte iyaw kiitetikonne ta kiita ubbaa poliko, hinte morketa ubbaa morkana; hintera eqeteyisata taani olana. 23 Ta kiitanchoy hinte sinthan bidi, hintena Amooreta, Hiteta, Parzeta, Kanaaneta, Hiwetanne Yaabuseta biitta ehana. Taani enta dhaysana. 24 Enta xoossatas ziggofite woyko goyinnofite, woyko enta ammano wogaa kaallopite. Enta xoossata dhaysite, enta eeqa shuchata mentherethite. 25 Godaa, hinte Xoossaa tana, goyinnite. Hessada hinte oothiko, taani hinte kathaanne hinte haatha anjana; hargiyaka hinte giddofe diggana. 26 Hinte biittan maccasay boshetenna; maynnena. Taani hinte laytha adussana.

27 “Taani ne morketa bolla ta yashsha yeddana. Hintera eqetiya kawotethata ubbaa daganthana. Hinte morketi ubbay hintew zoko zaaridi baqatana mela oothana. 28 Taani hinte morketa bolla kazhe yeddada Hiweta, Kanaanetanne Hiteta hinte sinthafe goodda kessana. 29 Shin biittay mela attonaadanne bazzo do7i hintena waaysonaada issi laythan enta goodike. 30 Shin hinte taybon daridi, minnidi, he biitta laattana gakanaw enta guuthara guuthara goodda kessana. 31 Taani hinte zawa Zo7o Abbaafe Filisxeeme Abbaa, mela biittafe bidi Efraxiisa Shaafa gakanaw dalgisana. He biittan de7iya ubbaa taani hinte kushen aathada immana; hinteka enta gooddidi kessana. 32 Entara woyko enta xoossatara caaqo oothopite. 33 Enta hinte biittan wothofite. Hankoode enti hintena ta bolla nagara oosisana. Enta xoossata hinte goyinniko hintew xihe gidana” yaagis.