1 Goday Museko, “Neeni, Aaroni, Naadabi Abyoodanne Isra7eele cimatape laapun tammu asati taako zuma bolla keyidi, haahon eqidi, gufannidi, taw goyinnite. 2 Shin neeni nerka taako shiiqa; harati ta mati shiiqopo. Qassi asayka neera zuma bolla keyopo” yaagis.

3 Musey bidi, Godaa qaalanne woga ubbaa asaas odin, asa ubbay issi qaalan, “Goday gidaba ubbaa nuuni oothana” yaagidosona. 4 Musey Goday odidaba ubbaa xaafis.

Wontetha gallas guura dendidi, zumaa garsan yarsho besse giigisis. Tammanne nam7u Isra7eele sheeshata sunthan, tammanne nam7u shucha tuussi essis. 5 Isra7eele panthata I kiittin, enti bidi xuussa yarshuwanne issifetetha yarshuwas kormata shukidi, Godaas yarshidosona. 6 Musey mehiya suuthaafe bagga ekidi keriyan tigis; attida bagga suuthaa yarsho bessan dharcis. 7 Hessafe guye, Caaqo Maxaafa ekidi, asaas nabbabin, enti, “Goday gidaba ubbaa nuuni oothana; nuuni iya kiita polana” yaagidosona.

8 Hessafe guye, Musey he suuthaa ekidi, asaa bolla dharcidi, enta, “Goday hintew ha kiitata immiya wode hintera gelida caaquwa minthiya suuthay haysa” yaagis.

9 Musey, Aaroni, Naadabi, Abyoodanne Isra7eele cimatape laapun tammay zumaa bolla keyidi, 10 Isra7eele Xoossaa be7idosona. Iya tohuwape garsan saloda geeyida, sanpare geetetiya shuchafe oosetidaba daaniya demba bessi de7ees. 11 Shin Xoossay Isra7eele asaa halaqata wodhibeenna. Enti Xoossaa be7idosona; iya sinthan midosonanne uyidosona.

12 Goday Museko, “Neeni taako zumaa bolla haa keyada, haysan gam7a. Ta asay taw kiitetana mela nam7u loche shuchata bolla ta kushen ta xaafida higgeta new immana” yaagis.

13 Museynne iyaw kiitetiya Iyyasuy baanaw dendidosona; Musey Xoossara gahetanaw zumaa bolla keyis. 14 Musey Isra7eele cimatako, “Nuuni hinteko simmana gakanaw haysan gam7ite. Aaroninne Huuri haysan hintera de7oosona; odi de7iya oonika entako boo” yaagis.

15 Musey zumaa bolla keyida wode shaaray zumaa ma7is. 16 Godaa bonchoy Siina Zumaa bolla uttis. He shaaray usupun gallas zuma bolla ma7is; laapuntha gallas Goday shaara giddon gididi Muse xeegis. 17 Zumaa bolla qoncida Godaa bonchoy Isra7eeletas tama laco daanidi bentis. 18 Hessafe guye, Musey zumaa huuphiya keyidi shaara giddo gelis; yan oytamu gallasinne oytamu qamma gam7is.