1 Goday Museko, “Koyroyisata daaniya nam7u loche shuchata massada giigisa. Taani he shuchata bolla kase neeni menthida shuchata bolla de7iya qaalata xaafana. 2 Wonto wonta guura taara gahetanaw Siina Zumaa huuphiya keya. 3 Neera oonika keyopo woyko zumaa bolla awunka bentofo. Hari attoshin dorsa woyko mehe wudey zumaa xaphon heemetofo woyko moopo” yaagis.

4 Hessa gisho, Musey koyro shuchata daaniya nam7u shuchata massidi, Goday kiitidaysada, shuchata oykidi wonta guura Siina zuma bola keyis. 5 Goday shaarara wodhidi, iyara yan eqidi, “Taani Godaa” yaagidi ba geeshsha sunthaa awaajis. 6 Goday Muse sinthara aadhishe haysada yaagidi awaajis; “Taani Xoossaa, ta sunthay Godaa. Taani, qadheynne maarotay kumida Xoossaa. Taani danda7aninne merina siiqon kumidaysanne daro ammantheysa. 7 Taani, ta asaas geliya qaala mukulu yeletethi gakanaw naageysanne iitatethaa, makallanne nagaraa atto geysa. Shin heedzanthonne oyddantho yeletethi gakanaw aawata nagara gisho nayta seeronna aggike” yaagis.

8 Musey ellesidi biittan gufannidi goyinnis. 9 I zaaridi, “Abeeti Godaw, neeni tanan ufaytiyaba gidiko, nuura issife yedha. Haysi asay si7onna asi; nu iitatethaanne nu nagaraa atto yaagada, nuna ne ase ootha” yaagis.

10 Goday Museko, “Taani Isra7eele asaara caaqana. Haysafe kase biitta bolla awunka hani eronna malaalsiyaba ne asaa sinthan oothana. Taani Goday, ay mela malaalsiyaba oothiyako, neeni enta giddon de7iya asay be7ana. 11 Hachi taani hintena kiittiya kiita naagite. Hinte sinthafe Amooreta, Kanaaneta, Hiteta, Parzeta, Hiwetanne Yaabuseta taani gooddana. 12 Enti hintew xihe gidonna mela hinte geliya biittan de7iya asaara caaqofite. 13 Enta yarsho bessata laallite; goyinno tuussata mentherethite. Asheera geetetiya macca xoosse misile tuussata qanxerethite. 14 Taani Goday, ta bonchuwa hara xoossatara koxonna Xoosse gidiya gisho, taape hara xoossatas goyinnofite. 15 He biittan de7iya asatara ayba caaqoka caaqofite. Enti banta xoossata goyinniya wodenne entaw yarshiya wode, enti hintena bantara issifana mela oychiko, hinte enti banta xoossatas yarshiya kathaa maanaw paacetidi, taw ammanetona ixana. 16 Qassi hinte enta macca naytape hinte adde naytas immiko, he wode he macca nayti banta xoossata goyinnidi, hinte adde naytika taw ammanetona ixidi, banta xoossata goyinnana mela oothana.

17 “Biratape qoxetidi, medhetida xoossata goyinnofite.

18 “Uythaa Ba7aale bonchite. Hinte Gibxefe keyday, Abiiba ageenan gidiya gisho, taani hintena kiitidaysada, he ageenan, laapun gallas gakanaw uythi miite.

19 “Bayra yeletiya adde na7i ubbaynne bayra yeletiya mehe adde ubbay tabaa. 20 Koyro yeletida hare mari dorsa marara laammada woza. Wozonna ixiko, iya morgiya mentha. Bayra yeletida adde na7a ubbaa woza.

“Oonika immiyaba oykonna mela kushe ta sinthan shiiqopo.

21 “Usupun gallas oothite, shin laapuntha gallasan shempite. Zeriya wode gidin woyko kathaa cakiya wode laapuntha gallasan shempite.

22 “Koyro hinte gistiya cako doomiya wode, Katha Shiisho Ba7aale bonchite. Qassi laytha wursetha kathaa shiishiya wode, Shaqara Ba7aale bonchite. 23 Laythan heedzu toho Isra7eele adde ubbay medhetetha Godaa, Isra7eele Xoossaa goyinnanaw yo. 24 Kawotethata taani hinte sinthafe yedetha kessada hinte zawa aassana. Hinte tana goyinnanaw laythan heedzu toho yaa wode, oonika hinte biitta olidi ekanaw amottenna.

25 “Hinte taw mehe yarshiya wode, irsho yeggidi uukida uythara shishopitte. Paasika bonchiya gallasas yarshida yarshuwafe wontas aybaka ashshofite.

26 “Hinte gaden bayra kaxida kathaafe koyro ayfiya Godaa hinte Xoossaa keethi ehite.

“Deesha mari iya aaye maathan doysopite” yaagis.

27 Goday Museko, “Taani neeranne Isra7eele asaara caaqo geley ha qaalatan gidiya gisho, ha qaalata xaafa” yaagis. 28 Musey moonnanne uyonna, oytamu gallasinne oytamu qamma Godaara zuma bolla gam7is. I, caaqo qaala gelida tammu kiitata loche shuchatan xaafis.

29 Musey Godaara odetishe gam7idi, tammu kiitata oykida nam7u loche shuchata ekidi Siina Zumaape wodhiya wode iya som7oy phoolees, shin I hessa eribeenna. 30 Aaroninne Isra7eele asa ubbay Muse xeellidi, iya som7oy phooleysa be7idi, iyako shiiqanaw yayyidosona. 31 Shin Musey enta xeegis. Aaroninne Isra7eele halaqati ubbay iyako shiiqin, I enta odisis. 32 Hessafe guye, Isra7eele asa ubbay iyako shiiqin, Goday iyaw Siina zuma bola immida kiita ubbaa I entaw immis.

33 Musey entara odeteysa wursida wode ba som7uwa laxanan kammis. 34 Shin Musey Godaa sinthe, iyara odetanaw geliya wode laxana ba som7uwafe qaarees. Yaape keyiya wode, Goday iya kiittidaba ubbaa Isra7eele asaas odees. 35 He ubban enti iya som7oy phooleysa be7oosona. Hessa gisho, Musey Godaara odetanaw baana gakanaw, ba som7uwa laxanan kammees.