1 Musey Isra7eele asaa ubbaa xeegidi, “Hinte oothana mela Goday kiittidabay haysa; 2 Saaminta giddon usupun gallasa xalaalan ooso oothite; shin laapuntha gallasay hintew geeshsha gallas; Godaaska dummatida shempo Sambaata. He gallasan ooso oothiya oonika hayqanaw bessees. 3 Sambaata gallas hinte son tama eethofite” yaagis.

4 Musey Isra7eele asaako, “Goday haysada yaagidi hintena kiittis; 5 Godaas hinte wozanay immo giyaba immanaw ehite. Hinte immanaw ehiyabati worqaa, bira, naase birata, 6 kaalose qacina, ocha teera daaniya qacina, zo7o qacinanne al7o liino, deesha ikise, 7 zo7o qalamen yeggi kessida dorsa ite, lo77o do7a ite, soqala mithi, 8 xompes shamaho zayte, shuumatetha zayte, iyan yegetiya sawuwanne ixaane sawo, 9 efuudiyasinne tiran ma7etiya ma7uwas haniya margide geetetiya shuchaanne hara alleeqota eho.

10 “Hinte giddon de7iya kushe hiillancho ubbay yidi, Goday kiitidaysa ubbaa ootho. 11 Geeshsha Dunkaaniya, iya gaatha kamaanne kare kamaa, kaqota, tuuqeta, liyoota, tuussatanne enti eqiya tohota; 12 Taabotiyanne iya tookiya kaso mithata, nagara atotetha kamaanne Taabotiya genthiya magarajuwa; 13 xarpheezaa, iya tookiya kaso mithatanne, iya miisheta ubbaanne Godaa sinthan wothiya geeshsha uythaa; 14 xompe wothiya kocaa, iya miisheta, xompiyanne xompe zaytiya; 15 ixaane cuyisiya xarpheezanne iya tookiya kasota, shuumatetha zaytiyanne sawiya ixaane, Geeshsha Dunkaaniya penge magarajuwa; 16 xuussa yarsho bessinne iya naase birata zarzariya, iya tookiya kasotanne iya miisheta ubbaa, naase biratape oosetida meecha keriyanne iya tohuwa; 17 dabaaba godaa gesheta, tuussatanne enta tohota, dabaaba penge magarajuwa, 18 Geeshsha Dunkaaniyanne dabaaba dunkaaniya tole dhishetanne enta wodorota; 19 Aaroninne iya nayti Geeshsha bessan haggaazishe ma7anaw alleeqetidi oosetida boncho ma7ota ootho” yaagis.

20 Hessafe guye, Isra7eele asa ubbay Muse sinthafe keyidosona. 21 Asa ubbay ba wozanan immo immo gidaba Geeshsha Dunkaaniyas, iya giddon oosetiya ooso ubbaasinne boncho kahine ma7otas koshshiyaba ubbaa ehidosona. 22 Immanaw koyida macci adde ubbay worqa alleeqota, siidhe worqata, migidota, qoodhe worqa ehidi, Godaas imo oothidi immidosona. 23 Kaalose qacina, ocha teera daaniya qacina, zo7o qacina, al7o liino, woyko deesha ikise, woyko zo7o qalamen yeggi kessida dorsa ite woyko, lo77o do7a itey de7iya asi ubbay ehis. 24 Bira woyko naase birata immanaw danda7iya ubbay banta imota Godaas immidosona. Qassi soqala mithi de7iya asi ubbay dumma dumma oosuwas ehis.

25 Kushe hiilla maccasa ubbay banta kushen suqida kaalose qacina, ocha teera daaniya qacina, zo7o qacinanne al7o liino ehidosona. 26 Qassika imota immanaw koyida maccasa ubbay deesha itepe dooqetida wodoro ehidosona. 27 Halaqati efuudiyasinne tiran ma7etiya ma7uwas haniya margidenne hara lo77o shuchata, 28 qassika enti ixaanen, shuumatethasinne xompes maaddiya shamaho zayten yegetiya sawo ehidosona. 29 Isra7eele asa ubbay, oothana mela Goday Muse baggara kiitida oosuwas haniya imotata ubbaa banta dosan Godaas ehidosona.

30 Musey Isra7eele asaako haysada yaagis; “Goday Yihuda sheeshape gidida Huura na7aa na7aa, Ure na7aa, Basili7eela dooris. 31 Goday iya ba Ayyaanan, hiillan, akeekaninne ooso ubbaa oothiya eran kunthis. 32 Hessika, hiillan oothana oosota halchidi worqafe, birapenne naase biratape dumma dummaba kessidi oothanaasa. 33 Hessadaka, al7o shuchu massidi giigiso, mithi masethinne hara ooso ubbaa oothana mela cincatethi immis. 34 Qassi iyasinne Daane sheeshi gidida Ahisamaaka na7aa Eliyaabas, banta hiilla harata tamaarsana mela eratethi immis 35 Enti dumma dumma ooso oothana mela ooso halcho kessana mela, kaalosen, ocha teera daaneysaninne zo7o suufe qacinan al7o liino alleeqisidi, daddiya hiillatethi immis. Goday enta, eratethan kunthis. Enti ubbay dumma dumma ooson luxida hiillancho gididosona.