1 Basili7eeli Taabotiya soqala mithafe giigisis. Taabotiya adussatethay nam7u wadhanne bagga, gompaynne geesay issi wadhanne bagga. 2 Taabotiya giigisidi, gaathaanne kariya walahi bayna worqan lanxis. Iya yuushuwa bollaka worqan lanxis. 3 Oyddu worqa sagaayota Taabotiyas oyddu gedata bolla, issi baggara nam7u sagaayota, qassi hanko baggara nam7u sagaayota aathis. 4 Yaatidi soqala mithafe oosetida kasota kessidi enta worqan lanxis. 5 Taabotiya tookanaw, Taabotiyas miyiyan de7iya sagaayotan kasota aathis.

6 Walahi bayna worqafe, adussatethay nam7u wadhanne bagga, gompay issi wadhanne bagga gidida nagara atotetha kamaa oothis. 7 Qefey de7iya nam7u kiruubeta qoxetida worqafe oothidi, 8 issi kiruubiya issi baggan, hanko kiruubiya hanko baggan wothidi, atotetha kamuwara issino oothidi medhis. 9 Kiruubeti banta qefiya miccidi, atotetha kamuwa kammidi, issoy issuwa xeelloosona.

10 Adussatethay nam7u wadha, gompay issi wadha, geesay issi wadhanne bagga gidida xarpheezaa soqala mithafe medhis. 11 Walahi bayna worqan iya lanxidi, yuushuwaka worqan lanxis. 12 Hessadaka, gompay takadho gidiya goosse oothidi, iya worqan yuushshi aathidi lanxis. 13 Taabotiya tookanaw maaddiya oyddu worqa sagaayota medhidi, oyddu gedata oyddu maazaneta bolla wothis. 14 Xarpheeza tookanaw kasota aathiya sagaayoti xarpheezaa goossa matan oosetidosona. 15 Xarpheezaa tookiya kaso mithata soqala mithafe kessidi, worqan lanxis. 16 Hessadaka, xarpheezaa bolla wothiya dumma dumma miisheta walahi bayna worqafe medhis. Hessatika saaneta, cilpata, kereta, woyne yarshsho tigiya xuu7ata.

17 Hessafe guye, Basili7eeli xompe wothiya kocaa walahi bayna worqafe oothis. Kocaa essiya tohuwanne tooma qoxetida worqafe giigisis. Alleeqos oosetiya, iya gambuthata, iya wallaxatanne iya ciishshata ubbaa iyara issife oythidi medhis. 18 Issi baggara heedzu tasheti, qassi hanko baggara heedzu tasheti de7iya usupun tasheta iya miyiyan medhis. 19 Usupun tashetas xeeran xeeran heedzu heedzu alleeqo gambuthatinne ciishshati de7iya lawuze mitha ciishshe daaniyaba medhis. 20 Xompe wothiya kocaa giddon de7iya tooma xeeran oyddu alleeqo gambuthatinne ciishshati de7iya lawuze mitha ciishshe daaniyaba medhis. 21 Waathan de7iya heedzu heedzu tashetape garsan issi issi gambuthi oosetis. 22 Gambuthati, tashetinne xompe wothiya kocay issino gididi, walahi bayna worqafe qoxetidi oosetidosona.

23 Xompe wothiya kocaas laapun xompeta, xompe toysiya qaphetanne enta wothiyabata walahi bayna worqafe oothis. 24 Xompe wothiya kocaanne iyaw go7etiya miishe ubbaa oothanaw hastamanne ichashu kilo giraame gidiya, walahi bayna worqa ongis.

25 Basili7eeli ixaane cuyisiya xarpheeza soqala mithafe giigisis. Iyaw oyddu maazaney de7ees. He xarpheezas adussatethaynne gompay issi wadha; qassi geesay nam7u wadha. Oyddu maazaniyan de7iya kaceti iyara issino gidi oyketidi oosetidosona. 26 Iyaw bolla bagga, oyddu miyanne kaceta walahi bayna worqan lanxis, iya yuushuwaka worqan lanxidi yuushshi aathis. 27 Iyaw gaxa bolla tookanaw maaddiya nam7u worqa sagaayota medhidi, nam7u bagga miyiyan wothis. Enti ixaane xarpheezaa tookiya wode kaso mithata aathanaw maaddeyisata. 28 Kaso mithata soqala mithafe kessidi, worqan lanxis.

29 Geeshsha shuumatetha zaytiyanne sawiya lo77o ixaane shittoda walakidi oothis.