1 Soqala mithafe xuussa yarsho bessi oothis. He yarsho bessa adussatethaynne gompay, ichashu ichashu wadha, qassi geesay nam7u wadhanne takadho. Iyaw oyddu maazaney de7ees. 2 Oyddu maazanetara oyketidi oosetida kaceta medhis. Yaatidi, he yarsho bessa naase biratan lanxis. 3 He yarsho bessan go7etiya miisheta, disteta, baldeta, akaafata, ashuwa qaphiya qaphetanne tama cooceta ubbaa naase biratape medhis. 4 Naase biratape gite daaniya teqe yarsho bessaas giigisidi, yarsho bessaas giddo zawa yuushshi aathidi wothis. 5 Tookanaw maaddiya kasota aathanaw, oyddu sagaayota medhidi, oyddu maazaneta bolla wothis. 6 Soqala mithafe yarsho bessa tookiya kaso mithata kessidi, naase biratan lanxis. 7 Ha kasota nam7u miyen de7iya sagaayotan aathis. Yarsho bessaa xawulape giigisidi, gidduwa kaysi oothis.

8 Naase biratape meecha kerenne iya wothiya toho medhis. He naase biratay, Geeshsha Dunkaaniya pengen oothiya maccasati ehida mastootiyape eketis.

9 Geeshsha Dunkaaniyas dabaaba baggaa gechanaw al7o liinope magarajo oothis. Dugeha bagga geshetas adussatethay xeetu wadha. 10 Geshetas kate gidana mela laatamu tuussatanne enti eqiya tohota naase biratape oothis. Enta xam7atanne kaceta bira biratape oothis. 11 Pudeha bagga dabaabayka hessada hanidi oosetis. 12 Wuloha bagga gesheta adussatethay ishatamu wadha. Entaw tammu tuussatinne tuussati eqiya tammu tohoti de7oosona. Tuussatas bira biratape oosetida xam7atinne kaceti de7oosona. 13 Dabaaba geliya pengey de7iya, doloha bagga magarajuwa gompay ishatamu wadha. 14 Issi baggara de7iya magarajuwa adussatethay tammanne ichashu wadha. Iyaw heedzu tuussatinne tuussati eqiya tohoti de7oosona. 15 Hanko baggara de7iya magarajuwa adussatethay tammanne ichashu wadha. Iyaw heedzu tuussatinne tuussati eqiya tohoti de7oosona. 16 Dabaaba yuushuwan de7iya gesheti ubbay al7o liinope oosetidosona. 17 Tuussati eqiya tohoti naase biratape oosetidosona. Xam7ati, kacetinne tuussata xeera goossati bira biratape oosetidosona. Dabaaba yuushuwan de7iya tuussati ubbay bira xam7atan oyketidosona. 18 Dabaaba pengiyan de7iya magarajuwa al7o liinope oothidi, kaalosen ocha teera daaneysaninne zo7o qacinan daddidi alleeqisis. Iyaw hanko dabaaba geshetada adussatethay laatamu wadha; qassi geesay ichashu wadha. 19 Iya, oyddu tohoti de7iya oyddu tuussata bolla kaqis. Kaceti, xaara kammeysatinne xam7ati bira biratape oosetidosona. 20 Geeshsha Dunkaaniya dhishetinne iya yuushuwan de7iya gesheta dhisheti ubbay naase biratape oosetidosona.

21 Tammu kiitata oykida nam7u loche shuchati de7iya bessan, Geeshsha Dunkaaniyan, go7etiya miisheta mazgabey haysa. He miisheta mazgabana mela kahiniya Aarona na7a Itamaara aawatetha garsan de7iya Leeweta Musey kiittis.

22 Yihuda sheeshape gidida Huura na7aa na7aa, Ure na7aa, Basili7eeli, Goday kiitidaysada ubbaba oothis. 23 Daane sheeshape gidida Ahisamaaka na7aa Eliyaabi, kushe hiillanchoy, oothiyabas koyro halcho kessiya asi; I, kaalose, ocha teera daaneysanne zo7o qacinan al7o liino daddidi alleeqisiya asi. 24 Geeshsha dunkaaniya oosuwas hanana mela Godaas imetida worqay geeshsha dunkaanen eretida mizaanen issi mukulu kilo giraame gidis. 25 Taybon de7iya asaape eketida biray geeshsha dunkaanen eretida mizaanen, heedzu mukulunne oyddu xeetanne hastamu kilo giraame gidis. 26 Hessika, taybon gelida adde asay, issoy issoy geeshsha dunkaanen eretida mizaaniya liken koyetiya ubbaa immidosona. Laatamu laythinne iyape bolla gidida, mazgaben gelida, adde asaa tayboy usupun xeetanne heedzu mukulunne ichashu xeetanne ishatama. 27 Geeshsha Dunkaaniyanne magarajota essanaw maaddiya xeetu tohota oothanaw 3,400 kilo giraame bira birata ekidosona. Hessika, issi issi tohoy hastamanne oyddu kilo giraame bira birata ekis. 28 Basili7eeli, attida hastamu kilo giraame bira biratan xam7ata, kacetanne tuussatas xeera goossata oothis. 29 Asay Godaas immida naase biratay 2,425 kilo giraame. 30 He naase biratan Geeshsha Dunkaaniya pengiya essiya tohota, gite daaniyabara naase birata yarsho bessaanne iya giddon go7etiya dumma dumma miisheta medhis. 31 Qassi dabaaba yuushuwan de7iya dirsaa tohotinne pengiya bolla eqida tohoti, Geeshsha Dunkaaneynne iya yuushuwan de7iya dabaaba dirsaa dhisheti ubbay he naase biratape oosetidosona.