1 “Neno asa na7aw, biittafe medhida xuube ekada, ne sinthan wotha; yaatada Yerusalaame katamaa misile iya bolla medha. 2 Katamaa yuushuwa dira; iya biitta doora; miixa keetha; olanchoti uttiya bessi giigisa; gimbiya laaliya duruma iya yuushon giigisa. 3 Birata bashe ekada, ne giddoninne katamaa giddon dirsi oothada essa. Ne som7uwa iyako zaarada dereeqa; katamaa yuushuwa teqa; iya teqeyka nena; hessika Isra7eele asaas malla gidana.

4 “Isra7eele asaa seeretethas malla gidana mela neeni ne haddirsa miyen zin7a. Neeni ne haddirsa miyen zin7iya gallasata taybuwan Isra7eele asay waanidi seeretanaw de7iyako bessaana. 5 Isra7eele asay waanidi seeretanaw de7iyako bessanaw neeni zin7ana mela heedzu xeetanne uddufun tammu gallas new immas; issi gallasi issi laythara gina gidana.

6 “Neeni he gallasata polidaape guye, zaarada, Yihuda asay waanidi seeretanaw de7iyako bessanaw ne ushacha miyen zin7ana mela oytamu gallas new immas. Issi gallasi issi laythara gina gidana. 7 Ne som7uwa teqetida Yerusalaameko zaarada, ne kushiya denthada mandashe, Yerusalaame bolla tinbite oda. 8 He teqethay wurana gakanaw issi miyepe hara miye shiretonna mela ta nena wodoron qachana.

9 “Neeni gistenne banga, qom7olonne misire, maldonne murqa ekada, kathi wothiya miishen qolada, neeni zin7iya heedzu xeetanne uddufun tammu gallas iyape kathada maana. 10 Gallas gallas ne miya katha mazanna; ika nam7u xeetanne hastamu giraame gido; hessa iya woden woden ma. 11 Gallas gallas ne uyaa haathayka likera gido; ika nam7u kubbaya gido; hessa iya woden woden uya. 12 Wora sheesha kem7ele eethada, asay xeellishin, he walakida kathaa banga uythada uukada ma. 13 Hessi Isra7eele asay ta enta laaliya kawotethata giddon de7ishe, tunida kathi maanaw de7eysas malla” yaagis.

14 Taani, “Hay7i! Ubbaa Haariya Godaw, hessi hanenna; taani tunada erike. Ta na7atethafe doomada hachi gakanaw, bawuta woyko do7i wodhidaba ma erike; tunida ashoy ta doonako shiiqi erenna” yaagas.

15 I zaaridi, “Lo77o, yaatiko, wora sheesha kem7elen uukeysa aggada, osha kem7elen ne uythaa uuka” yaagis.

16 I gujidi, “Neno, asa na7aw, akeeka! Yerusalaame katamaa kathi gelonna mela taani teqana hanayis. Asay kathi hirgishe makidi maana; haathe yayyishe likidi uyana. 17 Hiza, entaw de7iya kathaynne haathay wurana; enti dagaman issoy issuwa xeellana; banta nagaraa gaason seeretidi gilqana.