1 “Neno, asa na7aw, oco mashshi ekada, maqlara meediyada ne huuphiyanne ne buuchaa meeda. He huuphiya mizaanen mazzana; ne binaana heedzu bessan shaaka. 2 Neeni teqiya gallasay wuriya wode, ne shaakida binaanape sikuwa ne giigisida katama misiliyas gidduwan wothada taman xuugga. Nam7antho sikuwa he katamaa yuushuwa ubban mashshan qanxeretha. Heedzantho sikuwa carko bolla laalla; ta enta mashshan yedethana. 3 Iyape guutha binaana ekada, ne ma7uwa macaran qacha. 4 Qassi iyape guuthara ekada, taman yeggada xuugga. Yan doomida tamay Isra7eele asa ubbaa gakana” yaagis.

5 Ubbaa Haariya Goday, “Kawotethata ubbaa iya yuushon essada, iya giddon wothida, Yerusalaame katamaa haysa be7a. 6 Shin I ba iita oosuwan ba yuushuwan de7iya biittatapenne kawotethatape aadhidi ta higgiyanne ta wogaa bolla makallis. Tuma I ta higgiya menthis; ta wogaa kaallibeenna” yaagees.

7 Hessa gisho, Ubbaa Haariya Goday, “Ne yuushuwan de7iya kawotethatape aadhada meto medhadasa; ta higgiya menthadasa; ta wogaa naagonna ixadasa. Hari attoshin, ne yuushuwan de7iya kawotethata wogaadaka de7ibeeketa” yaagees. 8 Hessa gaason, Ubbaa Haariya Goday, “Neno, Yerusalaame, taani ne bolla dendana; hara kawotethati ubbay be7ishin, ne bolla taani pirdaa ehana. 9 Ixetida eeqa goyinno ubbaa ne oothida gisho, haysafe kase oothaboonna, sinthafeka yoonna pirdaa ta ne bolla ehana. 10 Hessa gaason, ne giddon aawati banta nayta maana; nayti banta aawata maana. Ta hintena pirdana; attidaysata carko bolla laallana. 11 Hessa gisho, Ubbaa Haariya Goday, taani ta de7uwan caaqayis. Hinte eeqataninne ixetida oosotan ta keetha tunisida gisho, ta hintena biittafe pittada dhaysana. Ta hintew qadhetike; hintena maarike. 12 Ne giddon de7iya asaape issi sikoy katamaa giddon boshaninne koshan hayqana; nam7antho sikoy mashshan wurana; heedzantho sikuwa carko bolla laallada, enta mashshan yedethana” yaagees.

13 “Ta yiloy enta bolla poletana; ta wolqaama hanqoy irxana. Taani ta hanquwa enta bolla wursiya wode taani qanaaten odidaysa enti erana.

14 “Ne yuushuwan de7iya kawotethata giddoninne hinte matara aadhiya ubbaa sinthan ta hintena baysa oothana; hintena miichas aggana. 15 Ta hintena ta hanquwan, ta yiluwaninne, qadhey bayna seeran pirdiya wode hinte yuushuwan de7iya kawotethata sinthan qelqisethas, cashshas, hintena be7ida asi naagetiyabaanne dagammiyaba oothana. 16 Dukiya donge toorada, ta hintena wodhiyanne dhaysiya kosha hinte bolla yeddana. Taani zaara zaara kosha hinte bolla ehana; kathi Yerusalaame gelonna mela teqana. 17 Taani koshanne do7a hinte bolla yeddana; enti hinte nayta dhaysana; boshanne shempo wodho hinte bolla ehana” yaagees Goday.