1 Godaa qaalay taako haysada yaagishe yis. 2 “Neno, asa na7aw, Isra7eele zumata dereeqa xeellashe, enta bolla tinbite oda. 3 Hinteno, Isra7eele dereto, Ubbaa Haariya Godaa qaala si7ite. Ubbaa Haariya Goday Isra7eele zumatako, zoozetako, zangaaratakonne kakatako haysada yaagees: ‘Asay eeqa goyinniya bessata taani dhaysanaw mashsha yeddana. 4 Hinte yarsho xarpheezati laaletana; hinte ixaane cuyisiya miisheti meqana; hayqida hinte asay hinte eeqata sinthan yegetana. 5 Taani Isra7eele asaa aha enta eeqata sinthan zin7isana; hinte meqethata hinte yarsho xarpheezata yuushon laallana. 6 Hinte de7iya bessa ubbaan, hinte katamatinne hinte goyinno bessati laaletana. Hessadaka, hinte yarsho bessay tunananne laaletana; hinte eeqati meqana; hinte ixaane cuyisiya miisheti meqana; hinte oothidaba ubbay pitetidi dhayana. 7 Hayqida asay hinte giddon kundana. Taani Godaa gideysa hinte hessan erana. 8 Taani hinte giddon mashshafe attida guuthata paxa ashshana; hinte biittataninne kawotethata giddon laaletana. 9 Mashshafe attida enti, di7etidi bida kawotethata giddon de7ishe tana hassayana. Enti banta layma wozananinne amotiya ayfiyan eeqa goyinnanaw simmidi ta wozanaa menthidaysa enti akeekana. Enti banta iita oosuwaninne ixetida eeqa goyinno gaason bantana shaatettana. 10 Taani Godaa gideysa enti erana. Taani enta bolla iitabaa ehana giday coo babiso gidonnaysa enti akeekana’ ” yaagees.

11 Ubbaa Haariya Goday taako haysada yaagees: “Isra7eele asaay ixetida eeqa goyinnida gisho, ne hanquwa biradhen mallada bessa; ne yiluwa biitta qakada qoncisa. Entana ayye! Enti olan, koshaninne gadon wurana. 12 Haahon de7ey gadon dhayana; matan de7ey olan hayqana; paxa attiday, koshan wurana. Hessada oothada, ta hanquwa enta bolla polana. 13 Enta ahay enta eeqata giddo ubban, enta yarsho bessa yuusho ubban, zumata bolla ubban, dere bolla ubban, cil7o mitha garsa ubban, daashsha mitha garsa ubban, banta eeqatas sawiya yarsho yarshida bessa ubban kundida wode taani Godaa gideysa erana. 14 Taani ta kushiya yeddada, enti de7iya biitta ubbaa, dugeha mela biittafe bidi pudehan de7iya Deblaata gakanaw baysa oothana. Taani Godaa gideysa enti hessan erana” yaagees.