1 Godaa qaalay taako haysada yaagishe yis. 2 “Neno asa na7aw, Ubbaa Haariya Goday Isra7eele biittako haysada yaagees: ‘Wursethi matis; ubba baggara ha biitta bolla wursethi yis. 3 Ha77i, wursethi hinte bolla gakis; taani ta hanquwa hinte bolla yeddana. Taani hinte oosuwada, hinte bolla pirdana; hinte ixetida eeqa goyinnida gisho hintena seerana. 4 Taani hintew qadhetike; hintena maarike. Hinte iita oosuwada hinte bolla pirdana; hinte giddon de7iya ixetida eeqa goyinnota qoncisana. Taani Godaa gideysa hinte hessan erana’ ” yaagees.

5 Ubbaa Haariya Goday, “Heko, gadoy gakis; gadoy gado bolla yees. 6 Wursethi gakis; wursethi matis; I hinte bolla dendis; Heko, gakis. 7 Biitta bolla de7eysato, hinte pirday gakis; wodey matis; gallasay matatis. Hessi dagama gallasipe attishin, zumata bolla ufaysan ililiya gallas gidenna. 8 Ha77i mata wode taani ta hanquwa hinte bolla gussana; ta yiluwa hinte bolla wursana. Taani hinte oosuwa gisho hinte bolla pirdana; ixetida eeqa goyinnida gisho hintena seerana. 9 Ta hintew qadhetike; hintena maarike. Hinte iita oosuwada hinte bolla pirdana; hinte giddon de7iya ixetida eeqa goyinnota qoncisana. He wode hintena seerey tana Godaa gideysa hinte erana.

10 “Heko, gallasay! He gallasay gakis! Hinte dhayoy matis! Hinte iitatethay gambuxis; hinte otoroy ciiyis. 11 Geellatetha gaason iita oosoy daris. Entafe issoyka attenna; enta shaluwape woyko enta asaape woyko enta bonchuwafe attanabay baawa. 12 Wodey gakis; gallasay matis; ta hanqoy asa ubbaa bolla gidiya gisho shammeysi ufaytofo; bayzeysi azzanopo. 13 Nam7ay de7on de7iya wode ubban, bayzidaysi ba bayzidaba ekanaw guye simmenna. Isra7eele asa ubba bolla odetida ha qoncethay poletonna attenna. Enta nagaraa gaason entafe issoyka ba shempuwa ashshena. 14 Ta hanqoy asa ubbaa bolla qoncanaw de7iya gisho enti olas moyze punnidi giigetokona; oonika olas keyenna.

15 “Karen oli de7ees; son boshinne koshi de7ees. Katamaape karen de7ey olan hayqana; katamaa giddon de7ey boshaninne koshaninne wurana. 16 Kessi ekidi attidaysati, zangaarape yashshan dere bolla piradhidi keyida holleda, banta nagaraa gisho dere bolla zeleelana. 17 Kushe ubbay doccana; ubbay yashshan kokoridi sheeshi yeggana. 18 Enti kayo ma7o ma7ana; yashshan kokorana. Enta ubbaa som7oy yeella ma7ana; enta ubbaa huuphey meedettana. 19 Enti banta bira ogen holana; enta worqay tunaba gidana. Godaa wolqaama hanqo gallas enta biraynne enta worqay enta ashshanaw danda7enna. Entaw dhube gididi, nagaran gelsida, biraynne worqay ulo kumidi, enta koshape ashshena.

20 “Enti banta al7o alleeqota otortidi, ixetida eeqanne yeellayiya misile medhanaw go7etidosona. Hessa gisho, taani he al7o alleeqota entaw tunabaa kessas. 21 Taani enta alleequwa allaga biitta asaas di7o, biittan de7iya iita asaas bonqe aathada immana; enti iya tunisana. 22 He wode taani ta som7uwa hara soo zaarana; ta boncho keetha pangati gelidi tunisana.

23 “Suure pirda dhayon biittay suuthan kumida gishonne katamay geella ooson kumida gisho santhalaata giigisa. 24 Taani iita kawotethata ehada enta keethata bonqana mela oothana. Wolqaamata otoruwa dhaysana; enta geeshsha goyinno bessati tunana. 25 Enti dagammiya wode saro koyana; shin demmokona. 26 Issi gadoy hara gado kaalethana; issi worey hara wore kaallidi yaana. Enti nabetape qoncethi koyana; Kahinetas tamaarsiyabay dhayana; cimatas zoriyabay dhayana. 27 Kawoy yeekana; halaqay ufaysi qanxana; asay yashshan kokorana. Taani entaw enta oosuwada oothana; enti harata bolla pirdidaysada ta enta bolla pirdana. Taani Godaa gideysa enti hessan erana” yaagees.