1 Nuuni di7etida usupuntho laythan, usupuntho ageenan, ichashantho gallasan, taani ta son uttidashin, Yihuda cimatika ta sinthan uttidashin, Ubbaa Haariya Godaa wolqay tana haaris. 2 Heko, taani dhoqu gada xeelliya wode ase daaneysa be7as. Iyaw xeesse daaneysafe garsa baggay tama laco daanees; bolla baggay phooliya naase birata daanees. 3 I kushe daaniyaba taako yeddidi, ta binaana oykis. Ayyaanay tana sa7apenne salope giddo pude denthidi, Xoossaa qoncethan tana Yerusalaame efis. Yan qommo baggara Xoossaa keetha giddo dabaaba geliya pengiyara gelsidi, Godaa qanaatiya denthethiya eeqay eqida bessaa bessis. 4 Heko, kase taani zangaaran be7idaysada, Isra7eele Xoossaa bonchuwa yan be7as.

5 Goday taako, “Neno asa na7aw, pudeha bagga xeella” yaagis. Taani xeelliya wode qanaate denthethiya eeqay, dirsa pengiya sinthan de7iya yarsho bessa matan de7eysa be7as. 6 I taako, “Neno, asa na7aw, enti oothiyaba be7ay? Tana ta geeshsha keethafe haassanaw, Isra7eele asay oothiya ixetida eeqa goyinnuwa be7ay? Haysafe aadhiya ixetida eeqa goyinno neeni buroo be7ana” yaagis.

7 I tana Xoossaa keetha dabaaba penge ehin, taani xeelliya wode, Heko, godaa bolla xoo7e be7as. 8 I taako, “Neno, asa na7aw, godaa booka” yaagin, ta bookiya wode issi penge yan be7as. 9 I taako, “Gelada enti yan oothiya iita oosuwanne ixetida eeqa be7a” yaagis. 10 Ta giddo gelada xeelliya wode, Heko, sa7ara gooshetiya dumma dumma medhetethata misiley, tuna do7ata misileynne Isra7eele asaa eeqata ubbaa misiley godaa bolla yuuyi aadhidi medheti uttidaysa be7as. 11 Entafe sintha baggara Isra7eele asaape laapun tammu cimati eqidosona; Safaana na7aa Ya7izaani enta giddon eqis. Ubbay ixaane cuyisiyaba banta kushen oykidosona; ixaaniya cuyay tuqu gees.

12 Goday taako, “Neno, asa na7aw, Isra7eele asaa cimati ubbay dhuman banta eeqa misiliya keethan oothiyaba be7ay? Enti, Goday nuna be7enna; Goday ha biitta aggis” yaagosona. 13 I taako, “Haysafe aadhiya ixetida eeqa goyinno neeni buroo be7ana” yaagis.

14 Hessafe guye, pudeha baggan de7iya Xoossa keethaa pengiyako efin, Heko, maccasay yan uttidi, Tamuuza geetetiya banta xoossas yeekishin be7as. 15 I taako, “Neno asa na7aw, haysa be7ay? Haysafe aadhiya ixetida eeqa goyinno neeni buroo be7ana” yaagis.

16 Hessafe guye, I tana Xoossaa keetha giddo dabaaba efis; yan Xoossaa keetha pengiya matan, barandaafenne yarsho bessaafe giddon, laatamanne ichashu gidiya asata be7as. Enti banta zokuwa Xoossa keethaako, banta som7uwa dolohako zaaridi, dolohara keyiya awa goyinnoosona.

17 Goday taako, “Neno asa na7aw, haysa be7adii? Yihuda asay ha ixetida eqa goyinnoy haysan ootheysi entaw laafaba gididee? Enti biitta geella ooson kunthidi, zaari zaaridi tana hanqethanaw bessii? Enti bantaw danda7etida mela tana iissidi cayoosona. 18 Hesaa gisho, ta entara hanqon gahetana; ta entaw qadhetike; entafe issuwaka ashshike. Enti banta qaala dhoqa oothidi waassinka, ta enta si7ike” yaagis.