1 Taani Kiruubeta huuphepe bolla baggara de7iya salo gufantho daaneysa be7as. Kirubeela bolla sanpare al7o shuchafe oosetida araata be7as. 2 Goday liino ma7ida addiyako, “Kirubeelape garsa baggara gertota giddora kanthada ba. Xiifa bonqo ne kushen kopheta ekada, katamaa bolla laalla” yaagis.

Ta xeellishin tama ekanaw gelis. 3 Addey soo geliya wode Kirubeeti Xoossa keethafe garsa baggara eqidosona; giddo dabaaban shaari kumis. 4 Godaa bonchoy Kirubeela bollafe dendidi, Xoossa keetha penge bis. Shaari keethaa kumis; dabaabay Godaa boncho phoolethan kumis. 5 Kirubeela qefiya girsay Ubbaa Haariya Godaa girsada kare dabaaban si7etees.

6 Goday liino ma7ida addiya, “Kirubeela garsa baggan de7iya gertota giddofe tama eka” yaagidi kiittin, I gelidi issi gertuwa matan eqis. 7 Kirubeelape issoy banta giddon de7iya taman ba kushiya yeddidi, iyape guuthara ekidi, liino ma7ida addiya kushen wothin, I ekidi keyis. 8 Kirubeela qefiyape garsa baggara asa kushe daaniyabay de7ees.

9 Ta xeelliya wode Kirubeela matan oyddu gertoy de7ees. Issi issi Kiruubiya matan issi issi gertoy de7eysa be7as; he gertoy al7o shuchada phoolees. 10 Enti oydday issoy issuwa daanosona; issi issi gertoy hara gerto giddora kanthi aadhidi medhetida daanees. 11 Kirubeeti biya wode oyddu bagga yaa haa simmonna boosona; issi gertoti bida ginde hanko gertoy yaa haa simmonna sitti gidi boosona. 12 Enta kumetha bolla, hessika enta zokuwan, enta kushiyan, enta qefiyaninne enta oyddu gertotan xeelliya ayfey kumis. 13 Ta si7ishin, gertoti yuuyiya gertota geetetidi xeegetidosona. 14 Issi issi Kiruubiyas oyddu som7oy de7ees. Koyro som7oy kiruube som7o, nam7anthoy asa som7o, heedzanthoy gaammo som7o; oyddanthoy argantha som7o.

15 Kiruubeti pude dendidosona. Enti taani Koboora shaafa matan be7ida de7on de7iya medhetathata. 16 Kiruubeti biya wode, enta miyen de7iya gertoti boosona; Kiruubeti biittafe pude dendanaw banta qefiya micciya wode gertoti enta miyepe shaaketokona. 17 De7on de7iya medhetethata ayyaanay gertota giddon de7iya gisho, enti eqiya wode gertoti eqoosona; enti biittafe pude dendiya wode enti dendoosona.

18 Hessafe guye, Godaa bonchoy Xoossa keetha pengefe dendidi, Kiruubetape bolla baggan eqis. 19 Ta xeellishin, Kiruubeti banta qefiya miccidi, kirikirotara issife biittafe pude dendidosona. Enti Xoossaa keethafe doloha bagga pengiya matan eqidosona. Isra7eele Xoossaa bonchoy entafe bolla baggara de7ees.

20 Enti Koboora shaafan Isra7eele Xoossaafe garsa baggara be7ida de7on de7iya medhetathata. Enti kiruubeta gideysa ta eras. 21 Enta ubbaas oyddu som7otinne, oyddu qefeti de7oosona; enta qefetape garsa baggara asa kushe daaniyabay de7ees. 22 Enta som7oti Koboora shaafa matan ta be7ida som7ota daanosona. Enti ubbay sitti gidi sinthe boosona.