1 Xoossa Ayyaanay tana denthidi, Xoossa keethas doloha bagga pengiyako efis. Pengiya matan laatamanne ichashu addeti de7oosona; enta giddon asaa kaalethiya Azuura na7aa Ya7izaana Banaya na7aa Palaxa be7as. 2 Goday taako, “Neno asa na7aw, ha asay katamaa bolla iita qofa qopoosona; iita zore zoretoosona. 3 Enti, ‘Nuuni keethe zaaridi keexana wodey matatis. Ha katamay asho xaaro; nuuni qassi asho’ yaagosona. 4 Hessa gisho, tinbite oda; asa na7aw, enta bolla tinbite oda” yaagis.

5 Godaa Ayyaanay ta bolla wodhidi, taako haysada yaagis: “Isra7eele asaw, hinte hessada geeta; shin ta hinte ay qopiyako erayis. 6 Ha kataman hinte daro asaa wodhidi, oge ubban aha kunthideta” yaagees.

7 Hessa gisho, Ubbaa Haariya Goday haysada yaagees; “Hinte wodhidi yeggida ahay asho; ha katamay asho xaaro; shin ta hintena ha katamaape yedethada kessana. 8 Hinte olas yayyideta; shin ta hinte yayyida olaa hinte bolla ehana. 9 Ta hintena ha katamaape kessada, allagatas aathada immana; ta hintena hinte zawan pirdana. 10 Hinte olan wurana; ta hintena hinte biittan pirdana. He wode hinte ta Godaa gideysa erana. 11 Ha katamay hintew asho xaaro gidenna; hinteka iya giddon asho gideketa. Ta hinte bolla Isra7eele zawan pirdana. 12 Hinte ta higgiyanne ta wogaa shaaridi hinte yuushuwan de7iya kawotethata wogaa mela de7ida gisho hinte bolla pirdey Godaa gideysa hinte erana” yaagees Ubbaa Haariya Goday.

13 Ta tinbite odiya wode Banaya na7aa Palaxi hayqin, taani gufannada, ta qaala dhoqu oothada, “Abeeti Ubbaa Haariya Godaw, Isra7eelepe attidaysata kumethi wursana hanayee?” yaagada waassas.

14 Godaa qaalay taako haysada yaagidi yis; 15 “Neno asa na7aw, Yerusalaamen de7iya Isra7eele asay nebaanne di7on de7iya ne dabbotabaa, ‘Enti Godaape haakidosona; ha biittay nuus laata gididi imetis’ ” yaagidi haasayoosona.

16 Ubbaa Haariya Goday haysada yaagees: “Ta enta haahon de7iya kawotethata giddo yeddikoka, biitta ubban laallikoka, enti bida biittatan guutha wodes entara gidana” yaagees.

17 Hessa gisho, Ubbaa Haariya Goday haysada yaagees: “Ta hintena kawotethatapenne hinte laaletida biittatape shiishana; Isra7eele biitta zaarada hintew immana. 18 Enti guye simmidi yaa wode tuna misiletanne eeqata biittafe dhaysana. 19 Taani entaw issi wozana immana; ooratha ayyaana enta giddon wothana. Entafe shucha wozanaa diggada, asho wozana entaw immana. 20 He wode enti ta higgiya kaallana; ta kiita naagana. Enti ta ase gidana; taani enta Xoossaa gidana. 21 Gidoshin, ixetida misiliyanne tuna eeqa goyinnanaw doseyisata taani enta oosuwada oothana” yaagees Ubbaa Haariya Goday.

22 He wode Kiruubeti banta qefiya miccidosona; enta miyen gertoti de7oosona. Isra7eele Xoossaa bonchoy entafe bollara de7ees. 23 Godaa bonchoy katamaa giddofe dendidi, doloha baggan de7iya zumaa bolla eqis. 24 Xoossaa Ayyaanay taw immida qoncethan Ayyaanay tana biittafe denthidi, Kaldaaweta biittan de7iya di7etidaysatako efis. Hessafe guye, qoncethay taape shaaketis. 25 Goday tana bessidaba ubbaa di7on de7eysatas odas.