1 Godaa qaalay taako haysada yaagidi yis; 2 “Neno asa na7aw, neeni geella asaa giddon de7aasa. Enti geella asi gidiya gisho entaw ayfey de7ees, shin demmokona; haythi de7ees, shin si7okona. 3 Hessa gisho, asa na7aw, di7on biya asada, neeni efanaw danda7iyaba ubba shiisha qachada, gallas enti be7ishin keyada, ne de7iya bessaafe hara bessi ba. Ooni eri enti geella asi gidikoka akeekana. 4 Gallas enti xeellishin, di7o biya asada, ne qachidaba kare kessa; omarsi enti xeellishin, di7etidi biya asada keya. 5 Enti xeellishin, ne keethaa godaa lukada xoo7iyara keya. 6 Ne kessida miishiya enti xeellishin, ne hashen tookada, lem7ishin dendada ba. Ne awu biyako be7onna mela ne som7uwa kamma. Ne haniyabay Isra7eele asaas malla gidana” yaagis.

7 Taani I tana kiittidaysada oothas. Di7etidi biya asada, gallas ta qachidaba kare kessas. Omarsi ta keetha godaa ta kushen lukada keyas; ta kessida miishiya enti xeellishin, ta hashen tookada, lem7ishin bas.

8 Wonta guura Godaa qaalay taako haysada yaagidi yis. 9 “Neno asa na7aw, geella Isra7eele asay, ‘Ne oothiyabay aybee?’ gidi nena oychibookona? 10 Entaw Ubbaa Haariya Goday haysada yaagees gada oda. ‘Ha tinbitey Yerusalaamen de7iya halaqabaanne Isra7eele asaaba odees.’ 11 Ne haniyabay entaw malla gideysa oda; enti di7etidi hara biitta baana. 12 Enta giddon de7iya halaqay godaa lukidi ba miishiya ba hashen tookidi, lem7ishin baana; biitta be7onna mela ba som7uwa kammana. 13 Ta gite iya sinthan yeggada oykana. Taani iya Kaldaaweta biitta Babiloone katamaa ehana; shin I he katamaa be7onna hayqana. 14 Iya yuushon de7iya iya maaddeysatanne iya olanchota ubbaa ta ubba bessi piski oothana; ta enta mashshan yedethana.

15 “Enta ta hara biittatanne kawotethata giddo laaliya wode ta Godaa gideysa enti he wode erana. 16 Enti biiya kawotethata giddon banta tuna ooso paaxana mela entafe guuthata olape, koshapenne hargepe attidi akekanada oothana. Ta Godaa gideysa enti he wode erana” yaagis. 17 Godaa qaalay taako haysada yaagidi yis; 18 “Neno asa na7aw, ne kathaa dagaman ma; ne haathaa yashshan kokorashe uya. 19 Biittan de7iya asaako haysada yaaga. Ubbaa Haariya Goday Isra7eele biittan de7iya Yerusalaame asaaba haysada yaagees: ‘Biittan de7iya asa ubbay gene oothiya gisho enta biittay kallo attana, enti banta uythaa hirgan maana; banta haatha dagaman uyana. 20 Ha77i asi kumida katamati dhayana; biittay baysa gidana. Taani Godaa gideysa enti he wode erana’ ” yaagees.

21 Godaa qaalay taako haysada yaagidi yis; 22 “Neno asa na7aw, hinte Isra7eele biittan, wode aduqis qoncethi ubbay hada gidis aadhis yaagidi leemisey I aybee? 23 Ubbaa Haariya Goday haysada yaagees; ‘Taani ha leemisoy nam7antho odetonna mela oothana; enti zaaridi, Isra7eele biittan leemisokona’ yaagees. ‘Gallasay matatis; qoncethi ubbay poletana hanees’ yaaga. 24 Hizape guye Isra7eele asaa giddon wordo qoncethinne murunno deenna. 25 Ta Goday odanaw koydaba odana; hessika gam7onna poletana. Hinteno, geellato, ta odiyaba ubbaa hinte laythan polana” yaagees Ubbaa Haariya Goday.

26 Qassika Godaa qaalay taako haysada yaagidi yis. 27 “Neno asa na7aw, Isra7eele asay, ‘I be7ida qoncethaynne I odiya tinbitey daro laythafe guye hananaba’ yaagidi odoosona. 28 Hessa gisho, Ubbaa Haariya Goday haysada yaagees: ‘Ta odiya qaalay poletanaape attishin, issoyka gam7enna’ ” yaagees Ubbaa Haariya Goday.