1 Godaa qaalay haysada yaagishe taako yis. 2 “Neno asa na7aw, Isra7eelen tinbite odiya nabeta bolla ne tinbite oda. Bantaw medhi kessidi tinbite odeyisata haysada yaaga; Godaa qaala si7ite. 3 Ubbaa Haariya Goday haysada yaagees: ‘Aybaka be7onna banta qofan dendidi tinbite odiya eeya nabeta ayye!’ 4 Isra7eele asaw, hinte nabeti laaletida kataman de7iya workanata mela. 5 Godaa gallasan olan minnidi eqana mela Isra7eele asaa dirsa gimbiya minthidi essibeeketa; pude laaletida bessaa keybeketa. 6 Enta qoncethaynne enta bitay wordo. Enti Goday kiittonnashin, Goday haysada yaagees yaagosona. Enti odeysa Goday polana gidi naagoosona. 7 Taani odonnashin, Goday haysada yaagees yaagidi odiyanne wordo qoncethi be7eysatanne muranchota gideketii?” yaagees.

8 Hessa gisho, Ubbaa Haariya Goday haysada yaagees; “Hinte be7ida qoncethanne hinte odida tinbitey wordo gidiya gisho ta hintew morke gidana. 9 Wordo qoncethi be7iyanne muranchiya nabeta bolla taani ta kushiya denthana. Enti ta asaa zoretan gelokona; Isra7eele asaa mazgaben xaafetokona; enti Isra7eele biitta gelokona. He wode ta Ubbaa Haariya Godaa gideysa hinte erana.

10 “Saroy baynashin sa7i saro yaagidi ta asaa balethoosona. Asay shuchu keelidi doorin, enti booqinte tiyoosona. 11 Ha booqinte tiyeysatas; ha hinte tiyida gimbey kundana; wolqaama iri bukana. Taani gita shachi yeggana; wolqaama gotey dendana. 12 He gimbey kundiya wode asay hinte tiyida nooray anee? yaagidi oychonna aggane” yaagees.

13 Ubbaa Haariya Goday haysada yaagees: “Taani gimbiya laallanaw; ta hanquwan wolqaama gote yeddana; ta yiluwan gita shacha kiittana, ta sheniyan wolqaama ira bukisana. 14 Hinte booqinte tiyida gimbiya ta mentherethana; baasoy bentana gakanaw laallana. I kundiya wode hinte iya giddon hayqana; he wode taani Godaa gideysa hinte erana. 15 Ta hanqoy gimbiya bollanne gimbiya booqinte tiyida asata bolla wodhana. Ta hinteko, ‘Gimbey baawa; gimbiya booqinte tiyidaysatika dookona. 16 Isra7eelen de7iya nabeti, Yerusalaameba tinbite odeysati, saroy baynashin saro qoncethi be7eysati dookona’ ” yaagees Ubbaa Haariya Goday.

17 “Neno asa na7aw, banta qofan dendidi, tinbite odiya maccasa dereeqa xeellada enta bolla tinbite oda. 18 Ubbaa Haariya Goday haysada yaagees: ‘Hara asa bolla wolqi daanada, enta hashiya bolla murunnoba sikiyanne asas ubbaas biitta qace giigisiya maccasa ayye! Hinte ta asaa xihen oykidi hinte shempuwa ashshanee? 19 Issi kophe banga woyko issi baso uythi demmanaw, yeellayaba oothidi, ta asaa sinthan tana kawushsheeta. Hinte hayqanaw bessonnayisata wodhidi daanaw bessonnayisata ashsheeta. Yaatidi ta asaa wordo odeeta; entika hinte worduwa si7oosona’ ” yaagees.

20 Hessa gisho, Ubbaa Haariya Goday haysada yaagees: “Hintew hara asaa bolla wolqi daana mela hinte kushen qachida murunnuwa qacciya ta dafa ekana. Ta iya hinte kushiyape duutha holana; xihepe kessi ekiya kafoda ta enta hinte xihiyape kessa ekana. 21 Taani hinte shaashiya qaara ekada, ta asaa merinaw hinte kushepe ashshana. Taani Godaa hinte he wode erana. 22 Taani azzanthaboonna xillo asaa wozanaa hinte wordon azzanthideta; nagaranchoti banta iita oosuwape simmidi, banta shempuwa ashshona mela enta minthideta. 23 Hizape hinte wordo qoncethi be7eketa; murunneketa. Taani ta asaa hinte kushepe kessa ekana. Taani Godaa gideysa hinte he wode erana” yaagees.