1 Godaa qaalay haysada yaagishe taako yis. 2 “Isra7eele biittaba asay, ‘Aawati qawu7e woyne min, nayta achay hayqis’ yaagidi odiya leemisoy aybee? 3 Taani Ubbaa Haariya Goday ta de7uwan caaqas. Hizape guye hinte Isra7eele biittan ha leemisuwa leemiseketa. 4 Asa ubbaa shempoy tabaa; aawa shempoynne na7aa shempoy tabaa. Nagara oothiya shempoy i, baw hayqana.

5 “Issi asi xillo gidiko, tuma pirdanne suureba oothiko, 6 I deriya bolla de7iya eeqa goyinniya bessan meenna; Isra7eele asaa eeqa goyinnenna; ba shooruwa machiw tunisenna; kushe metora de7iya maccara aqena; 7 Oonaka un7ethenna; acos oykidaba guye zaarees, bonqenna; koshatida asi muzees; kallotida asi mayzees; 8 ba miishiya yelora tal7ena; ba kushiya iitabaape naagees; ase sigethishe xillo pirdees. 9 Ta higgiya naagees; ta wogaa ammanetethan polees; he uray xillo asi gidiya gisho I de7on daana” yaagees Ubbaa Haariya Goday.

10 Gidoshin, he uraas shempo wodhiya woyko kallidi de7eysatape issuwa oothiya iita na7i de7iko, 11 iya aaway haysatape issuwaka oothonna aggin, iya na7ay dere bolla eeqa goyinno bessatan miiko, asa macho tunisiko, 12 metootanchotanne manqota un7ethiko, bonqiko, acos oykidaba zaaronna ixiko, eeqa goyinniko, tunabaa oothiko, 13 ba miishiya yelora tal7idi wodhe ekiko, hessa mela asi de7on de7anee? I de7on deenna! I hessa mela tunabaa oothida gisho tuma hayqana; iya gomey iya oykana.

14 “Ha iita uraas na7i de7iko he na7ay ba aaway oothiya ha nagara ubbaa be7ishe, hessa melaba oothonna ixiko, 15 I dere bolla de7iya eeqa goyinno bessatan moonna ixiko, Isra7eele asaa eeqa goyinnona ixiko, ba laggiya machiw tunisonna ixiko, 16 oonaka un7ethonna ixiki, acos oykidaba guye zaariko, bonqona ixiko, koshatidaysa muziko, kallotidaysa mayziko, 17 Iita oosope ba kushiya teqiko wodhe ekanaw yelora tal7onna ixiko, ta higgiya naagiko, ta wogaa kaalliko, yaatiko, he na7ay de7on daanape attishin, ba aawa nagaraa gaason hayqenna. 18 Shin iya aaway asa maata sugida gisho, ba ishata bonqida gishonne ba asaa giddon iitaa oothida gisho ba nagaraa gaason hayqana.

19 “Shin hinte, ‘Na7ay ba aawa nagara gaason ayis seeretennee?’ ” yaageeta. Na7ay tuma pirdanne suure oothidi, ta higgiya minthidi naagiko, tuma de7on daana. 20 Nagara oothiya uray baw hayqana. Na7ay aawa nagaraa gaason seeretenna; hessadaka, aaway na7aa nagaraa gaason seeretenna. Xillo asi ba xillotethaa gatiya ekana; iita asi ba iitatethan seeretana.

21 Shin iita asi ba nagara ubbaafe simmidi, ta kiita naagiko tuma pirdaanne suure oothiko, I tuma de7on daanape attishin, hayqenna. 22 I oothida nagaraape issoyka qofetenna; ba oothida xillo oosuwa gaason I de7on daana. 23 Taani Ubbaa Haariya Goday, iita asi ba iita ogiyape simmidi, de7on de7eysan ufaytaysipe attishin, iya hayquwan ufaytike.

24 Shin xillo asi ba xillotethaa aggidi, iita asi oothiya tuna oosota ubba oothiko, I de7on daanee? Hanenna, I oothida xillo oosuwape issoyka qofetenna; I ammanetona ixida gishonne I oothida nagaraa gisho I hayqana.

25 Gidoshin, “Hinte, ‘Godaa ogey suure gidenna’ geeta. Isra7eele asaw, si7ite; suure gidonnay ta ogiyayee? Hinte ogiya gidennee? 26 Xillo asi ba xillotethaa aggidi, iita oothiya wode ba nagaran hayqees; ba oothida qohuwa gaason de7on de7ena. 27 Shin iita asi ba iitatethaa aggidi, tuma pirdanne suure oothiya wode ba shempuwa ashshana. 28 I ba oothida nagaraa qopidi guye simmida gisho, I tuma de7on daanape attishin, hayqenna. 29 Shin Isra7eele asay, ‘Godaa ogey suure gidenna’ yaagidosona. Isra7eele asaw, suure gidonnay ta ogiya? Hinte ogiya gidennee?

30 “Hinteno, Isra7eele asaw, ta hintena hinte oosuwatho oosuwatho pirdana. Ubbaa Haariya Goday haysada yaagees; nagari hintew dhayos gaaso gidonna mela paaxite; hinte bala ubbaafe simmite. 31 Hinte iita oosuwa ubba wora yeggidi, ooratha wozananne ooratha ayyaana ekite. Hinteno, Isra7eele asaw, ayis hayqeetii? 32 Taani issi asa hayqonka ufaytike. Hessa gisho, hinte nagaraa paaxidi, de7on de7ite” yaagees Ubbaa Haariya Goday.