1 Godaa qaalay haysada yaagidi taako yis: 2 “Asa na7aw, Isra7eele asaas qan7ishin oda; leemison qoncisa. 3 Ubbaa Haariya Goday haysada yaagees gada oda. ‘Gita qefeynne dumma dumma mallara de7iya baalleti de7iya issi arganthi de7ees. He arganthay Libaanose yidi ziga xeeran oykis. 4 He zigaa xeera menthi ekidi, zal7ey dariya biitta efidi zal7anchota kataman tokis. 5 I Isra7eele biittafe aaca efidi, aradda biittan, haatha matan tokis. 6 Aacay daro aduqonna de7ishe daayidi arganthaako simmidi diccis; shin iya xaphoy biitta giddo gelis. He woyney daro tashenne haythe kessis. 7 Hessadaka, gita qefeynne daro baalleti de7iya hara arganthi de7ees. Haathe demmanaw he woyney ba toketida bessafe he arganthay de7iya bessaako ba xaphuwanne ba tashiya yeddis. 8 Shin, he woyney tashe kessana mela, ayfe ayfana melanne lo77o woyne gidana mela aradda biittan, daro haathi de7iya bessan toketis’ ” yaagees.

9 Ubbaa Haariya Goday haysada yaagees gada oda. “He woyney diccanee? Koyro iya tokida arganthay iya shoddenee? Iya ayfeta qoqofidi, iya irxa haythata melisennee? Iya he bessaafe xaphora shoddanaw gita wolqaa woyko daro asi koshshenna. 10 Iya shoddidi, hara bessan tokiyako I diccanee? Doloha bagga carkoy shocin ba toketida bessan melennee?”

11 Godaa qaalay haysada yaagishe taako yis: 12 “He leemisuwa birshethay aybeko ane ha geella asata oycha. Hessi aybe giiko, Babiloone kawoy Yerusalaame yidi, enta kawaanne enta halaqata di77idi, Babiloone efis. 13 Kawa soo asaape issuwa ekidi, baara caaqisidi, asaa giddofe eretidaysata di77idi efis. 14 Hessa oothiday enta kawotethay wolqa dhayidi, zaaridi dendonnaada banta caaquwa xalaala naagidi daana melasa. 15 Shin Yihuda kawoy makallidi, paratanne daro olanchota yeddana mela Gibxe kiittis. Yaatin hessi hanandee? Hessa oothida I kessi ekandee? I caaquwa menthidi seerettonna attandee?”

16 “Taani Ubbaa Haariya Goday ta de7uwan caaqas. Bana kawothida kawa caaquwa menthida gishonne caaquwa kadhida gisho, he kawa biittan, Babiloonen I hayqana. 17 Babiloone olanchoti daro asaa wodhanaw gimbiya yuushon biitta dooridi dirsi giigisiya wode, Gibxe kawoy ba olanchotaranne ba daro asaara yidi aykoka maaddenna. 18 I caaqo kadhidi menthida gishonne ba kushiya immidi, ba gida ba ubba polonna aggida gisho kessi ekanaw danda7enna.”

19 “Taani Ubbaa Haariya Goday ta de7uwan caaqas. I caaquwa kadhidi ta caaquwa menthida gisho ta sunthan caaqidas ta iya bolla zaarada ehana. 20 Taani ta gitiya iya bolla miccin, I ta xihiyan oyketana. I taw ammanetona ixida gisho ta iya Babiloone efada, yan iya bolla pirdana. 21 Dooretida iya olanchoti mashshan hayqana; attidaysati dumma dumma bessara laaletana.” Hessa odey tana, Godaa gideysa hinte erana.

22 Ubbaa Haariya Goday haysada yaagees; “Taani ta huuphen adussa ziga xeera qanxa ekada, dhoqanne adussa zumaa huuphen tokana. 23 Taani iya Isra7eele zumaa huuphen tokana; yan daayana; ayfe ayfananne lo77o ziga gidana. Kafo koche ubbay iyan keexana; enti iya tashiya kuyan shempana. 24 Adussa mithaa ziqi ootheynne qantha mithaa dhoqu oothey, qassi cil7o mithaa meliseynne mela mithaa aacisey tana Godaa gideysa biittan de7iya mitha ubbay erana. Taani Goday haysa odas; ta odidaysa ta oothana” yaagees.