1 Godaa qaalay haysada yaagishe taako yis. 2 “Asa na7aw, Yerusalaame iya tuna oosota erisa. 3 Ubbaa Haariya Goday Yerusalaameko haysada yaagees. Ne mayzanne ne sheeshay Kanaane biittana; ne aaway Amoore; ne aayiya Hite asi. 4 Ne yellatiya gallas ne gul7ay qanxetibnna; woyko nena geeshshanaw haathan meecetabaaka; woyko maxinen gorpetada curqan xaaxetabaaka. 5 Ha geetetidaysatape hari attoshin issuwa oothanaw new mishetiday baawa. Ne yeletida gallas boretida gisho wora yegetadasape attishin, new oonika qadhetibeenna.

6 “Ta yaara aadhiya wode neeni ne suuthan iitada zohetishin be7ada, neeni ne suuthan zin7ida de7ishin, ‘De7on de7a’ yaagas. 7 Ta nena aradda biittan de7iya kathada dichas. Neeni dicca aduqada, gamma gakadasa. Ne dhanthay uttis; ne huuphey diccis; shin ne kallo de7aasa.

8 “Zaarada ta yaara aadhashe nena xeelliya wode, neeni gelos gakada, kallo borsetiya ase gidadasa. Ta afila maccara ne bolla yeggada, ne kalluwa kammas; ta neera caaqada nena taw buzo oothas” yaagees Ubbaa Haariya Goday.

9 “Suuthan iitida ne asatethaa haathan meecca geeshshada, zayten tiyas. 10 Taani nena alleeqo ma7o mayzas; lo77o galbafe oosetida caamma aasisas; liino shaashe nena qacisas; al7o kuta qulintisas. 11 Nena alleequwan alleeqisas; ne kushen sagaayo aathas; ne qoodhiya worqan mayzas. 12 Ne sidhene, ne haythan worqa, ne huuphen lo77o kallacha wothas. 13 Ne worqaninne biran alleeqetadasa; ne ma7o ubbay al7o liino, al7o kutanne alleeqo qamise. Ne miya kathay lo77o dhiille, eessinne zayte. Neeni daro puulatada, kawo gidanaw gakadasa. 14 Ta new immida bonchuwa gaason, ne daro puulatida gisho kawotethata ubban eretadasa” yaagees Ubbaa Haariya Goday.

15 “Shin neeni ne puulan ammanetada, haratan eretida gisho ogera aadhiya ubbaas nena aatha immadasa. 16 Ne ma7uwape baggaa ekada, ne goyinno bessata alleeqisadasa; yan laymatadasa. Hessa melabay haysafe kase hanibeenna; sinthafeka hananaw bessenna. 17 Ta new immida worqafenne birape oosetida lo77o alleeqo, adde misileta oothada entara laymatadasa. 18 Ta immida alleeqo ma7uwa he misileta mayzadasa; ta zaytiyanne ta ixaaniya entaw shiishadasa. 19 Ta new immida lo77o dhiilliya, zaytiyanne eessa enta sinthan sawo tonku giya yarsho oothada shiishadasa” yaagees Ubbaa Haariya Goday.

20 Ne laymatethay guuxibeenashin, ne taw yelida adde naytanne macca nayta efada, eeqatas yarshadasa. 21 Ne ta nayta shukada, eeqatas taman yarshadasa. 22 Ne tunatethaaninne ne laymatethan ubban de7ashe, kase ne yalagatetha laytha, kallo suuthan muuketada zohetiya wodiya dogadasa.

23 Ubbaa Haariya Goday, “Ayye! Nena ayye!” yaagees. Ha iitatetha ubbaa bolla gujada, 24 dabaaba ubban dhoqa eeqa goyinniya bessata new giigisadasa. 25 Oge doonan laymatiya bessata keexada, ne puula tunisadasa; ogera aadhiya ubbaas ne asatethaa aatha immada, laymatethi darsadasa. 26 Neeni amon kumida, ne shooro gidida Gibxetara laymatadasa; ne laymatethan tana yiloyadasa. 27 Hessa gisho, taani ta kushiya ne bolla denthas; nena gakiya ne anjuwa guuthas. Taani nena ne poko hanotan yeellatiya, nena morkiya Filisxeemetas aathada immas. 28 Ne alonna asi gidiya gisho, Asoore asaara laymatadasa. He ubban taw gidana gabaaka. 29 Zal7en aqiya Kaldaawetara laymatadasa, shin hessi taw gidana gabaaka.

30 Ubbaa Haariya Goday, “Neeni yeelli bayna layma maccasada haniyara, ne aybi laafa ase! 31 Neeni oge doonan laymatiya bessata new keexiya wodenne dabaaba ubban eeqas goyinniya bessata giigisadasa. Gidoshin, hara layma maccasati ekiya miishe ekabaaka. 32 Neeni ba azinay de7ishin, allaga addetara laymatiya maccasa mela. 33 Layma maccasas miishey qanxetees, shin neeni ne laggethotas imota immaasa; enti ubba bessafe neeko yaana mela entaw miishe immaasa. 34 Neeni laymatiya hara maccasatape dumma; neera laymatanaw nena kaalliya oonika baawa. Neeni gede imota immasape attishin, haa ekaka; neeni haratape dumma” yaagees. 35 Neno, layma yerusalaame Godaa qaala si7a. 36 Ubbaa Haariya Goday haysada yaagees; “Neeni ne laymatetha amuwan ne laggethotas ne asatethaa qaarida gisho, ne eeqata ubba gishonne ne nayta suuthaa ne entaw gussida gisho, 37 ne entan ufaytida ne laggethota ubbaa, ne doseysatanne ne ixeyisata ta new morke oothada shiishana. Taani enta dumma dumma bessafe ne yuushuwan shiishada, enta sinthan nena qaarana; enti ne kalluwa be7ana. 38 Taani layma maccasata bollanne suuthu gussiya maccasata bolla pirdeysada ne bolla pirdana; ta hanquwaninne ta qaanatiyan ne bolla hayqo ehana. 39 Ta nena ne laggethotas aathada immana; enti ne laymatiya bessatanne eeqa goyinno bessata laallana. Enti ne ma7uwa qaaridi, ne lo77o alleequwa ekidi, nena xire kallo ashshana. 40 Nena shuchan caddidi, mashshan qanxerethidi wodhiya asaa ne bolla enti denthethana. 41 Enti ne keethaa xuuggidi, daro maccasa sinthan ne bolla pirdana. Ta ne laymatetha agisana; ne laggethotas gede miishe qanxaka. 42 Hessan ne bolla de7iya ta yiloy irxana; ta qanaatiya neepe haassana; hizape si77i gaana; zaarada hanqetike. 43 Neeni ne na7atetha laytha dogada, ha iita ooso ubban tana hanqethadasa. Hessa gisho, ne oothidaba ubbaa ta ne bolla zaarana. Ne tuna ooso ubbaa bolla laymatethi ayis gujadiii?” yaagees Ubbaa Haariya Goday.

44 “Yerusalaame, asay nena, ‘Na7iya aaye mala’ gidi leemisana. 45 Tuma neeni ba azinaanne ba nayta shaatetiya ne aaye mela; banta azinatanne banta nayta shaatetiya ne micheta mela; ne aayiya Hite asi; ne aaway Amoore asi. 46 Ne bayra michiya, ba gutaraa neepe pudeha baggan de7iya Samaarenne I macca nayta; ne kaalo michiya ba gutaraa neepe dugeha baggan de7iya Soodomenne I macca nayta. 47 Ne enta ogiya kaallada enta tuna oosota polo xalaala gidonashin, guutha woden entafe aadhada iita oothadasa.

48 “Taani Ubbaa Haariya Goday ta de7uwan caaqas. Neeninne ne gutan de7eysati oothidaysada ne michiya Soodomenne I macca nayti oothibookona. 49 Ne michiya Soodome oothida nagaray haysa: iyanne I macca nayti otorancho, enti kallidaysatanne inje duussu de7ikoka enti metootanchotanne manqota maaddibokona. 50 Enti otorancho gididi, ta sinthan tuna ooso oothidosona. Hessa gisho, hinte be7idaysata ta enta dhaysas.

51 “Samaarey ne oothida nagaras baggaaka oothabuuku; ne iipe aadhada shaatiya tuna oothadasa. Ne oothida tuna oosota ubbaa gaason ne micheti xillo azzanana mela oothadasa. 52 Neeni ne micheta suure asi kessida gisho yeella ma7a. Ne nagaray entaysafe aadhidi iitin, enti neepe xillo daanidosona. Hessa gisho, kawuyada yeella ma7a.

53 “Gidoshin, Soodomenne I macca nayta, Samaarenne I macca nayta taani enta shaluwa zaariya wode ne shaluwaka zaarana. 54 Neban neeni daro yeellatana; ne kawushatethay daro gidiya gisho ne micheti hessan minettana. 55 Ne micheti, Soodome ba gutataranne Samaariya ba macca naytara banta kase duusako simmana; neka ne macca naytara kase ne duussako simmana. 56 Ne otortiya wode ne miche Soodomi bolla qelqisabikii? 57 Hessi haniday ne nagaray qoncanaape kase gidennee? Ha77i neeni ne yuushuwan de7iya Edoomes michetisnne I shoorotas, Filisxeemesinne I miche naytas; hessadaka nena ixiya ubbaas bores attadasa. 58 Ne laymatetha gishonne ne tuna oosota gisho ne seeretana” yaagees Goday.

59 Ubbaa Haariya Goday haysada yaagees; “Neeni ufaysa qaala menthada, caaquwa laallida gisho ne oothida oosuwada ta new oothana. 60 Gidoshin, ta ne na7atetha wodiyan neera caaqida caaqo qaala hassayana; merinaw neera caaqana. 61 Ne bayranne ne kaalo micheta ta neeko ehiya wode neeni ne hemethaa hassayada yeellatana. Shin hessi ta neera caaqida caaquwa mela gidonna ixikoka, ta enta new na7a oothada immana. 62 Taani ta caaquwa neera oorathana; he wode ta Godaa gideysa ne erana. 63 Ne oothida nagaraa ubbaa taani atto giya wode ne oothidaba hassayada, yeellas ne doona oykana” yaagees Ubbaa Haariya Goday.