1 Godaa qaalay haysada yaagishe taako yis. 2 “Asa na7aw, ne som7uwa Yerusalaameko zaarada, asay goyinniya bessata bollanne Isra7eele biitta bolla tinbite oda. 3 Haysada yaaga: ‘Taani new morke. Taani ta mashsha shoohuwape shoddada, ne gidope xillo asaanne iita asa ubbaa wursana. 4 Xilluwanne nagaranchuwa ubba dhaysanaw dugehape pudeha gakanaw de7iya asa ubba bolla ta mashsha shoddana. 5 Taani Goday, ta mashsha shoohuwape shoddidaysanne guye zaaronnaysa asa ubbay erana’ ” yaagees.

6 “Hessa gisho, asa na7aw, asa ubbay xeellishin, ne wozanay meqin, cametada olla. 7 ‘Ayis oolay?’ yaagidi enti nena oychiko, ‘Sinthara yaa iita woriya gisho ollayis’ yaaga. He woriyan, ‘Wozani ubbay yashshan seerana; kushe ubbay argaacana; goobatethi ubbay eketana; gulbati ubbay kokorana. He wodey gakis; tuma poletana’ ” yaagees Ubbaa Haariya Goday.

8 Godaa qaalay haysada yaagishe taako yis: 9 “Asa na7aw, tinbite oda; taani Goday odiyaba asaas oda; mashsha; leefetidanne qushetida mashsha.

14 “Ha77ika asa na7aw, tinbite oda; ne kushiya baqa. He wode mashshi nam7u toho heedzu toho zaaridi shocana; hessika daganthiya, yuushuwa ubban wodhiyanne shukiya mashshi. 15 Hessi enta wozanay til7anaadanne entafe daroti dhubetanaada oothana. Hintena ayye! Hinte pengen mashshi wol7antha mela wol7amees; shukanaw shoohope shodetis. 16 Neno, qara mashshaw, ushachinne haddirsi simmida ne simmida bagga ubbaa butha. 17 Hiza Taani ta kushiya baqana; ta hanqoy dochana” yaagees Goday. 18 Godaa qaalay haysada yaagishe taako yis. 19 “Asa na7aw, Babiloone kawa mashshay yaa nam7u ogetan malla wotha. Nam7u ogeti issi biittafe dendoosona; ogey katamako simmiya ogen mallata tuussu essa. 20 Issi ogiyan de7iya malla Raaba geetetiya Amoone katamaa biya ogiya mallees; hankoy ogey gimbetida Yihudan de7iya Yerusalaame katamaa biya ogiya mallees. 21 Babiloone kawoy ogeti gahetiya daggalan, malla tuussata matan eqees. I awu ogiyara baaneko eranaw, donge tooran saama yeggana; ba eeqata zore oychana; maraaciya be7ana. 22 Gimbiya pengiya laaliya duruma ehana mela, wodho kiita aathana mela, ceeqetana mela, dirsa pengiya laaliya duruma katama pengen essana mela, biitta doorana melanne miixa giigisana mela Yerusalaame saami iyaw ushacha kushen keyis. 23 Yerusalaame asay Babiloone kawuwara caaqida gisho, hessi banta bolla gakana gidi qopibookona. Shin Babiloone kawoy enta di77iya wode enti banta nagaraa hassayana. 24 Hessa gisho, Ubbaa Haariya Goday haysada yaagees; hinte nagaray qoncis; hinte bala gideysa asa ubbay erees; hinte oosoy hinte nagarancho gideysa bessees. Hessa gisho, hinte iita oosoy hassayetana; hinte, hinte morketas aadhidi imetana.

25 “Neno, iitanne tuna gidida Isra7eele halaqaw, ne pirdaa gallasay gakis. 26 Ubbaa Haariya Goday haysada yaagees: ne huuphiyape kallachaa dentha; ne huuphe xaatha qaara. Hizape guye kaseysada hananabay baawa; ziqay dhoqu gaana; dhoqay ziqi gaane. 27 Gado! Gado! Taani ha katamaa dhaysana. Pirdanaw maati de7eysi yaana gakanaw ha katamay zaaridi keexetenna. I yaa wode ta iyaw aathada immana” yaagees.

28 Asa na7aw, haysada yaagada tinbite oda. Isra7eele cayiya Amooneta Ubbaa Haariya Goday haysada yaagees gada oda.