1 Godaa qaalay haysada yaagishe taako yis. 2 “Asa na7aw, shempo wodheysati kumida katamaa bolla pirdanaw giigadiii? Yaatiko, I oothida tuna ooso ubbaa iyaw oda. 3 Ubbaa Haariya Goday haysada yaagees gada oda: ne daro asaa wodhida gishonne eeqa goyinnon nena tunisida gisho ne dhayo wodey gakis. 4 Ne gussida suuthan bala gidadasa; ne oothida eeqan tunadasa. Ne pirdaa gallasay matatis; ne dhayo wodey gakis. Hessa gisho, ta nena kawotethatas miichasinne hara biittatas qelqisees aggana. 5 Neno, ne sunthay iitida dagami kumida katamaw, mataninne haahon de7eysati nena qelqisana.

6 “Ne giddon de7iya Isra7eele halaqati ubbay suuthu gussanaw banta wolqaa ay mela go7etiyako be7a. 7 Ne giddon de7eysati banta aawanne banta aayiw bonchokona. Enti bete asaa cimmoosona; am7etanne aawu aayiya bayna nayta naaqoosona. 8 Enti ta geeshsha miisheta kadhoosona; ta Sambaata tunisoosona. 9 Ne giddon issoti issoti harata wodhisanaw wordon odoosona; harati eeqas yashetidaba moosona; harati laymatoosona. 10 Ne giddon issoti issoti ba aawa machera tunoosona; harati kushe metoy de7iya maccasara wolqan tunisoosona. 11 Ne giddon issoti issoti ba shooruwa machera tunoosona; aaway ba na7a machera tunees; ba aawa na7iw, ba michiw wolqan iissidi yeellayees. 12 Ne giddon issoti issoti miishe ekidi, shempo wodhoosona; harati banta miishiya banta yara gidida Isra7eeletas yelora tal7oosona; enta bonqidi bantaw duretoosona; tana kumethi dogidosona” yaagees Ubbaa Haariya Goday.

13 “Asay bessonna miishe ekiya gishonne shempo wodhiya gisho, taani ta kushiya hinte bolla denthana. 14 Ta nena seeriya wode ne goobatethay neera daanee? Woyko ne kushey mino gidanee? Taani Goday haysa odas; ta odidaysada oothana. 15 Ta nena kawotethata giddoninne biittata giddon laallana; ne tunatethaa neepe diggana. 16 Hara kawotethata sinthan ne kawuyana; taani Godaa gideysa ne erana” yaagis.

17 Goday taako haysada yaagis: 18 “Asa na7aw, Isra7eele asay aykoka pathokona; enti ubbay bira sheeshiya wode naase biratape, qorqorope, biratapenne irsaasepe keya sha7a mela. 19 Hessa gisho, Ubbaa Haariya Goday haysada yaagees; ‘Hinte ubbay atala mela gidida gisho ta hintena ubbaa Yerusalaame shiishana. 20 Bira, naase birata, birata, irsaasenne qorqoro taman hubidi sheesheysada ta hintena shiishada ta hanquwana til7isana. 21 Ta hintena Yerusalaame shiishada, ta hanqo tama hinte bolla eethada hintena yan til7isana. 22 Biri coocen shee7eysada hinte Yerusalaamen til7ana. He wode taani Goday ta hanquwa hinte bolla gussidaysa hinte erana’ ” yaagees.

23 Zaaridi Godaa qaalay haysada yaagishe taako yis. 24 “Asa na7aw, enta biittay tunida gisho, ta hanquwan iri bukonna mela diggada enta seera domidasa Isra7eele asaas oda. 25 Ne giddon enta halaqati wodhidaba gudishe mentherethiya gaammo mela; enti wodhoosona; miishe gidin, hara buqura gidin, ubbaa bantaw ekoosona; daro maccasata am7o oothidosona. 26 Kahineti ta higgiya menthidosona; ta geeshshabata bonchibookona. Geeshshinne geeshshi gidonna ba shaakokona; tunanne tunaa gidonna ba shaakidi tamaarsokona; ta Sambaata yeggi aggideta. Hessa gaason ta Isra7eele asaa giddon bonchetabike. 27 Halaqati banta wodhidaba duuserethiya suudhume mela; enti bantaw bessona duretethi demmanaw shempo wodhoosona. 28 Nabeti godaa booqinte tiyiya asada, wordo qoncethi be7idi, wordo tinbite odidi enta nagaraa genthoosona. Goday odonna de7ishin, ‘Ubbaa Haariya Goday haysada yaagees’ yaagosona. 29 Biittan de7iya asay bonqoosona; manqotanne metootanchota un7ethoosona; enti suure pirdaa diggidi bete asaa geellayosona.

30 “Taani biitta dhaysona mela dirsa gimbiya keexey, laaletida dirsa gimbiya baggara ta sinthan eqidi naagiya issi asi koyas; shin oonaka demmabike. 31 Hessa gisho, ta hanquwa enta bolla gussana; taani ta yiluwan enta dhaysana; enti oosuwa enta bolla zaarana” yaagees Ubbaa Haariya Goday.