1 Godaa qaalay haysada yaagishe taako yis: 2 “Asa na7aw, issi aayepe yeletida nam7u micheti de7oosona. 3 Enti Gibxen de7ishe, banta na7atethafe doomidi, layma gididosona. He biittan de7iya addeti enta dhanthan kaa7idosona; enta geela7otethay eketis. 4 Entafe bayre sunthay Ohoolo; kaalo miche sunthay Ohooliba. Enta nam7a taani machin, taw addenne macca na7a yelidosona. Ohoola Samaare; Ohooliba qassi Yerusalaame.”

5 “Ohoola taw macho gidada de7ashe laymatasu; iya ba olancho gidida Asoore laggethota kaallada bawusu. 6 Enti kaalose daaniya ma7o ma7ida olanchota, biitta haareysatanne toora moconata; enti ubbay na7atethinne mala lo77o gidida para toggiya asata. 7 Iya bana layma oothada, ubbaafe lo77iya Asoore addetas bana aathada immasu. I laymatethay iya Asoore eeqata goyinnada tunana mela oothis. 8 Iya Gibxen doomida laymatetha ha77ika aggabuku; I na7atethafe doomidi, addeti I dhanthaa kaa7osonanne iira laymatoosona.”

9 “Hessa gisho, iya minthada siiqiya Asoore laggethotas taani iyo aathada immas. 10 Enti iyo qaaridi kalloydosona; I addenne macca nayta di7idi oykidosona; iyo mashshan wodhidosona. Iyo gakida pirda gaason, maccasa giddon qelqisethas attasu.”

11 “I michiya Ohooliba hessa be7asu; iya ba amuwaninne ba laymatethan ba michefe aadhada tuna gidasu. 12 Iyaka Asoore haareysati, toora moconata, lo77o ma7o ma7ida olanchotanne para toggiya asata, na7atethinne mala lo77o asata minthada siiqasu. 13 Iyaka bana tunisidaysa be7as; enti nam7ay issi ogen boosona.”

14 “Iya ba laymatetha yaa darsasu; iya godaa bolla woocetidi oosetidi zo7o qalamen tiyetada Kaldaaweta adde misile be7asu. 15 Enti banta xeessan zinnaare dancidosona; banta huuphiyan lo77o carqe xaaxidosona. Enti ubbay Kaldaawe biittafe yida Kaldaaweta halaqata daanosona. 16 Iya enta misileta be7ida wode daro siiqada, enta xeeganaw Kaldaaweta biitta ase kiittasu. 17 Babilooneti iiko yidi, iira laymatidi iyo tunisidosona. Enti iyo daro tunisidaape guye, iya enta shaatetasu. 18 Iya ba laymatetha qoncen oothida wodenne ba kalluwa qaara bessida wode, taani I michiw aggidaysada iyoka shaatettada aggas. 19 Shin iya Gibxen layma gidada de7iya, ba yalagatetha wodiya hassayada, ba laymatetha kaseysafe yaa darsasu. 20 Enta atunthay hareysa mela, enta kochay paraysa mela gidida ba laggethota kaallada basu. 21 Neno, Ohoolibe, ne yalagatetha wodiyan Gibxe addeti ne dhanthan kaa7ishin, ne geela7otetha ekishin, neeni polida laymatetha zaarada ha77i oothanaw amottaasa.”

22 Hessa gisho, Ohoolibe, Ubbaa Haariya Goday haysada yaagees: “Taani ne laggethota, ne shaatetta aggidaysata ne bolla denthana; ta enta ne bolla ubba bessara ehana. 23 Babiloonetanne Kaldaaweta ubbaa, Faaquda, Sohaane Qo7aana, Asooreta ubbaa, na7atethinne mala lo77o asata, biitta haareyisata, toora moconata, olanchota, halaqatanne para toggiya asata ne bolla ehana. 24 Enti ola para gaaretara, caana gaaretaranne daro olanchotara pudeha baggafe hinte bolla yaana. Enti wogga gondallenne guutha gondalle oykidi, birata barneexa wothidi, ne yuushuwan salpana. Taani nena entaw aathada immana; enti nena banta wogaa mela pirdana. 25 Taani ta hanquwa ne bolla yeddana; enti neera hanqo suulan gahetana. Enti ne siidhiyanne ne haythaa qanxana; attidaysati mashshan wurana. Enti ne adde naytanne ne macca nayta oykana; attidaysata taman xuuggana. 26 Enti ne ma7o ubbaa neepe qaaridi ekana; ne alleeqo ubbaa neepe kessidi ekana. 27 Hessada oothada, ne Gibxefe ehida laymatetha amuwa neepe diggana. Neeni nam7antho Gibxeta eeqa misileta dhoqu gada xeellonnaada woyko enta hassayonnaada oothana.”

28 Ubbaa Haariya Goday haysada yaagees: “Taani nena ne ixeyisata, ne shaatettada aggidaysatas aathada immana. 29 Enti nena ixana; ne daaburada demmidaba ubba bonqidi, nena xire kallo ashshana. Ne laymatetha amoy qoncanaada oothana. Ne laymatetha amoy, 30 hessa ne bolla ehis. Neeni kawotethatara laymatadasa; enta eeqatara nena tunisadasa. 31 Ne michiya bida ogiya neka badasa. Hessa gisho, nena I xuu7aa ushshana.”

32 Ubbaa Haariya Goday haysada yaagees: “Neeni ne miche xuu7ape uyana; he xuu7ay gitanne ciimmo. I tigin, daro ekiya gisho, asi ubbay ne bolla miicananne nena qidhana. 33 Neeni mathota gandigarananne azzanana. Hessi ne miche Samaare xuu7ay new dagamanne dhayo ehana. 34 Ne iya xiizothada uyana; xuu7a menthana; kun7an ne dhantha gaarana.” Taani Ubbaa Haariya Goday haysa odayis.

35 Ubbaa Haariya Goday haysada yaagees: “Neeni tana dogida gisho, taw zoko zaarida gishonne ne laymatetha amuwas gate ekana.”

36 Goday taako haysada yaagis: “Asa na7aw, Ohooli bollanne Ohoolibi bolla pirdanaw giigetadii? Enti oothida tuna oosuwa entaw oda. 37 Enti nam7ay laymatidosona; shempo wodhidosona. Enti banta eeqa goyinnidosona. Hari attoshin, enti taw yelida banta adde nayta banta eeqatas kathi oothidi yarshidosona. 38 Hessafe aathidi hara iitabaa ta bolla oothidosona; enti ta keethaa tunisidosona; he wode ta Sambaataka shaaridosona. 39 Enti banta nayta eeqatas yarshida gallas, enti ta keetha gelidi tunisidosona; enti ta keethan oothiday haysa.” 40 Enti haaho bessafe addeti yaana mela ase kiittin, enti yidosona. Hinte nam7u micheti hinte bolla meecetideta; hinte ayfiya tiyetideta; alleeqo aathideta. 41 Lo77o arjeeta bolla uttideta; xarpheeza bolla ta ixaaniyanne ta shamaho zaytiya wothideta. 42 Ufaytiya asaa koysethi hinte matan si7etees. Mathotida asay mela biitta yidosona. Hinte kushen sagaayo wothidosona; lo77o kallachata hinte huuphen goxidosona. 43 Taani ta wozanan, “Ha addeti asatethay laymatethan gilqida maccaseera laymatoosona” yaagas. 44 Addey maccasara laymateysada, haysati entara laymatidosona. Enti laymatanaw amotiya Ohooliranne Ohoolibira laymatidosona. 45 Enti layma gidiya gishonne shempo wodhiya gisho, xillo asati laymatiyanne shempo wodhiya enta bolla pirdana.

46 Ubbaa Haariya Goday haysada yaagees: “Daro asa denthethada enta bolla eha. Enta daganthiyanne enta bonqiya asatas aatha imma. 47 Ha daganthiya asati yidi, enta shuchan caddo; mashshan butho; enta addenne macca nayta wodho; enta keethaa taman xuuggo. 48 Maccas ubbay naagetana mela taani biitta ubbaafe laymatethi dhaysana. 49 Hinte nam7u micheti hinte laymatetha gishonne eeqata hinte goyinnida nagaraa gisho hintena pirdana. Taani Ubbaa Haariya Godaa gideysa hinte he wode erana” yaagees.