1 Nuuni di7etida uddufuntho laythan, tammantho ageenan, tammantho gallas, Godaa qaalay haysada yaagishe taako yis. 2 “Asa na7aw, hachi gallas mazgaben xaafa. Babiloone kawoy Yerusalaame teqiday hachi. 3 Ha makallancho asaas Ubba Haariya Goday haysada yaagees gada ha leemisuwa oda. Madabe diste tama bolla wothada haathe iyan tiga. 4 Gedaanne angaasuwa, lo77o asho ubbaa muxada, iyan yegga; lo77o meqethaa qanxerethada iyan kuntha. 5 Hessas ne ekana dorsay wudiyape dooretidaysa gido. Distiya garsan mithi wothada ashuwanne meqetha kaxana gakanaw doysa.”

6 Ubbaa Haariya Goday haysada yaagees: “Suuthu gussiya katamaa ayye! Iya shi7idi geeyonna ixida naase birata diste mela gidasu. I giddon de7iya muxetida ashuwa saama yeggonna kushen gahetidaysa kessa kessa eka. 7 He katamay wodhida asaa suuthay hanno gakanaw in de7ees. Suuthi gussashe, aybika kammonna danda7onna zaalla bolla gussasupe attishin, baanan kammana biitta bolla gussabuuku. 8 Halo keyanaw, ta hanquwa denthethanaada, kamettonna mela iya gussida suuthaa taani zaalla bolla wothas.”

9 Hessa gisho, Ubbaa Haariya Goday haysada yaagees: “Suuthu gussiya katamaa ayye! Taani mithi gujada wothana. 10 Daro mithi wotha; tama eetha. Ashuwa loythada doysa; cambaa mal7etha; meqetha xuugga. 11 Kaysa Madabe diste tama bolla wotha. Iya bolla de7iya buuqay seeridi kichana gakanawunne iya bolla de7iya shi7ay xuugetidi dhayana gakanaw suullidi michana mela tama bolla wotha. 12 He daaburay ubbay coo mela gidis; iya bolla de7iya daro shi7ay hari attoshin, taman kichibeenna. 13 Yerusalaame, nene tuniday ne iita oosuwana. Ta hanqoy ne bolla wurana gakanaw hizape neeni geeyaka. Ne tunatethafe nena geeshshanaw koyas shin, ne geeyanaw koyabaaka. 14 Taani Goday haysa odas; hessi hanana. Taani guye simmike; new qadhetike; ta qofaa laammike. Ne ogiyadanne ne oosuwada taani nena pirdana. Taani Ubbaa Haariya Goday haysa odayis” yaagis.

15 Qassika Godaa qaalay haysada yaagishe taako yis. 16 “Asa na7aw, ne siiqiyanne ne ayfe sinthan lo77iya ne machiw akeekona wodhana. Hessan kayotofa, yeekofanne afuxofa. 17 Oola, shin ne ooliya asi si7opo; hayqidaaris kayotofa. Neeni ne huuphen qace xaaxa; ne tohuwan caamma aatha. Ne doona kammofa; shochi moopa.”

18 Wonta taani asaas odas; omarsi ta machiya hayqasu. Wontetha gallas Goday tana kiittidaysada oothas. 19 Asay taako, “Ha neeni oothiyabas birshethay aybeko nuus ayis odikii?” yaagis.

20 Godaa qaalay haysada yaagishe taako yis yaagada entaw odas. 21 Ubbaa Haariya Goday Isra7eele asaa haysada yaagees; “Hinte ceeqetiya, hinte ayfe amuwanne hinte shempoy amotiya ta keethaa taani tunisana hanayis. Hinte guye ashshida hinte adde naytinne hinte macca nayti mashshan wurana. 22 He wode ta oothidaysada hinte oothana. Hinte doona kammeketa; shochu meeketa. 23 Hinte huuphiya xaaxite; hinte tohuwan caamma aathite. Kayoteketa woyko yeekeketa. Shin hinte hinte nagaraa gaason gilqananne issoy issuwara oolana. 24 He wode Hizqeeli hintew malaata gidana; I oothidaysada, hinte oothana. Hessi haniya wode, taani Ubbaa Haariya Godaa gideysa hinte erana.

25 “Asa na7aw, taani enta ufaysaanne bonchuwa, enta ayfen lo77iyabaanne enta wozanay amotiyaba mino bessa, qassi enta adde naytanne enta macca nayta entafe ekana. 26 He gallas new wore odanaw issi asi kessi ekidi yaana. 27 He gallas ne doonay dooyetana; ne iyara odetana; zaarada muume gidaka. Hessada hanada, ne asaas malaata gidana. Taani Godaa gideysa enti he wode erana” yaagis.