1 Godaa qaalay haysada yaagishe taako yis. 2 “Asa na7aw, ne som7uwa Amooneko zaarada, enta bolla tinbite oda. 3 Ubbaa Haariya Goday odiya qaala si7ite. Hinte ta keetha tunisiya wode, Isra7eele biittay baysa attiya wodenne Yihuda asay di7etiya wode hashshu gideta. 4 Taani hintena doloha bagga biitta asaas laata oothada immana. Enti hinte giddon kambe keexidi daana. Hinte mithaa ayfiya enti maana; hinte maatha enti uyana. 5 Taani Raaba katamaa gimaleti heemetiya bessi kessana; Amooneta biitta dorsaa wudey pee7iya bessi oothana. Taani Godaa gideysa hinte he wode erana. 6 Ubbaa Haariya Goday haysada yaagees: ‘Hinte Isra7eele dhayuwan kushe baqida gisho, gupida gishonne ufaytidi qelqisida gisho, 7 taani hinte bolla ta kushiya denthas. Hintena kawotethatas di7o oothada immana. Ta hintena asaape shoddana; kawotethata giddofe dhaysana. Taani Godaa gideysa hinte he woden erana’ ” yaagees.

8 Ubbaa Haariya Goday haysada yaagees: “Moo7abeynne Sayre, ‘Yihudi hara kawotethata ubba mela’ yaagida gisho, 9 taani Moo7abe biitta teqana; iya zawa naagiya, eretida Beet-Yashimoota, Ba7aal-Ma7oonanne Qiratayma katamata dhaysana. 10 Hizape guye Amooneta gujada, enti kawotethata giddon hassayetonna mela enta doloha bagga biittafe yida asaas aathada immana. 11 Taani Moo7abe pirdana; taani Godaa gideysa enti he wode erana” yaagees.

12 Ubbaa Haariya Goday haysada yaagees; “Edoomey Yihuda bolla halo keyida gishonne qohida gisho, 13 taani kushiya Edoome bolla denthana. Yan de7iya asaanne mehiya kumethi dhaysada baysa kessana. Temaanape bidi, Dedaana katamaa gakanaw enti mashshan wurana. 14 Taani Isra7eele baggara Edoome bolla halo keyana. Isra7eeleti enta bolla ta yiluwa mela oothana. Taani halo keydaysa Edoomey erana” yaagees Ubbaa Haariya Goday.

15 Ubbaa Haariya Goday haysada yaagees: “Filisxeemeti banta wozanaa iitatethan halo keyida gishonne aqida morken Yihuda kadhidi dhaysanaw koyida gisho, 16 taani ta kushiya Filisxeemeta bolla denthana. Taani Keltaaweta qanxana; abba doonan attidaysata ubbaa dhaysana. 17 Ta enta bolla gita halo keyana; ta hanquwan enta seerana. Taani enta bolla halo keyiya wode, taani Godaa gideysa enti he wode erana” yaagees.