27
Xiroosas Kessida Zelelsi
1 Godaa qaalay haysada yaagishe taako yis. 2 “Asa na7aw, Xiroosas zelelsi kessa. 3 Yuushoy abban teqetida biittan de7iyanne abba gaxan de7iya daro asaara zal7iya, katamaas, Ubbaa Haariya Goday haysada yaagees.
“ ‘Neno Xiroosa, taani puulanne
borey bayna mala lo77o’ ” yaagadasa.
4 Ne zaway abba gul7aana;
nena keexeysati loythidi oothidi keexidosona.
5 Ne sanqa Sanira xiiddan oothidosona;
ne markabiya tuussaa Libaanose zigan giigisidosona.
6 Haathaa pidhiya mithati
Baasane wolaape oosetidosona.
Ne markabiya hiixay Qophiroosa xiiddan,
iya yuushoy dangarsa zaalen alleeqetis.
7 Ne sharay bandirada haahon bentana mela,
Gibxeta liinope alleeqetidi oosetis.
Ne kamaa geshey Qophiroosape yida,
kaalose ocha teera daaniya ma7ope oosetidaysata.
8 Ne markabiya kolxiseysati Sidoonanne Arwada katamatape yidaysata;
ne markabiya laaggeysati loohida ne asata.
9 Markabiya giigiseysati Gebaalape yida eranchotanne kaalethiya hiillanchota;
abban biya markabe ubban de7iya oosanchoti wodha keya gidi ne giddon zal7oosona.
10 “Farsefe, Liidepenne Liibepe yida olanchoti,
ne olanchota maaddidi oletidosona.
Banta gondalliyanne banta ola barneexa ne giddon kaqidosona;
enti nena bonchida asata.
11 Arwadanne Heleka olanchoti,
ne dirsa gimbiya naagoosona.
Gammada asay ne adussa gimbi shako bolla naagoosona;
banta gondalliya ne gimbiya bolla kaqidosona;
ne puulatana mela oothiday entana.
12 Ne daro duretetha gaason Tarsesi neera zal7is;
I bira, birata, qorqoronne irsaase neera laammidi zal7oosona.
13 Yawaani, Tubaalinne Mosahi neera zal7idosona;
aylletanne naase birata immidi, ne miishiyara laammidosona.
14 Beet-Torgaama asay
toga parata, ola paratanne baqulota immidi, ne miishiyara laammis. 15 Didaana asay neera zal7idosona; yuushoy abban teqetida biittatan de7iya asay dangarsa zaalenne zophe mithi new ehoosona.
16 “Ne daro duretetha gaason, Soore asati neera zal7idosona; enti ciliilo al7o shuchi, zo7o al7o shuchi, yeleello alleeqo, ocha teera daaniya ma7uwa, al7o liinonne alleeqetida ma7o ehidi ne miishiyara laammidosona. 17 Yihudanne Isra7eele asay neera zal7idosona; enti Minite gade giste, maldo, eessi, zaytenne dhalliya balsaame zayte ne miishiyara laammidosona. 18 Ne daro duretethinne shalloy de7iya gisho, Damasqoy, Kelboona, woyniyanne zahaara dorsa ikise immidi ne miishiyara laammidosona. 19 Uzaalen de7iya Daanenne Yawaana asay ne dumma dumma miisheta shammidosona. Enti ne miishiyara laammanaw alleeqetida biratanne dumma dumma sawo ehidosona.
20 “Didaana asay koora gilaase ehidi zal7idosona. 21 Arabetinne Qedaare halaqati ubbay ne zal7e miishiyas dorsa urgeta, marazetanne deeshata ehidosona. 22 Saabanne Rama zal7anchoti al7o shuchu, worqanne dooretida sawota immidi, ne miishiyara laammidosona. 23 Kaarane, Kane, Edene, sabba Asoorenne Kelmaada katamati ubbay neera zal7idosona. 24 Enti lo77o ma7ota, kaalose daaniya ma7uwa, alleeqetida ma7uwa, gazza sigaajata, loythi dooqida sibaagotanne wodorota immidi, ne giyan zal7oosona.
25 “Tarsesa markabeti ne miisheta caanidosona. Neeni darobay caanetin, abba bolla biya markabe mela gidadasa. 26 Ne markabiya laaggeysati nena ekidi, abba giddo gina efidosona; shin doloha carkoy nena abba giddon mentherethis. 27 Neeni meqeretida wode ne duretethaynne ne zal7e miishe ubbay, ne markabiya laaggeysati, ne markabiya giigiseysati, ne zal7anchotinne ne giddon de7iya olanchoti ubbay abba giddon muuketidosona. 28 Enta waasoy abba gaxaa de7iya biitta daganthis.
29 “Markabiya bolla uttidi haatha pidheysati ubbay markabetape keyidi, abba gaxan eqidosona. 30 Enti ubbay banta huuphen baana qolidi, bidon gondoretishe, ne dhayuwa gisho iita yeeho yeekidosona. 31 New kayotidi, banta huuphiya meedidi, kayo ma7o ma7idosona; enti daro azzanidi new yeekidosona. 32 Enti haysada yaagidi new zeleelidosona:
“Ha77i abba giddon si77i gida,
Xiroosa meli oonee?”
33 “Ne zal7e miishey abba pinnidi yaa wode,
daro asaa kalsadasa;
ne shaluwan biittan de7iya kawoti duretidosona.
34 Shin ha77i ciimmo abban meqeretadasa;
ne zal7e miisheynne new oothiya asa ubbay,
neera abba giddon muuketidi dhayidosona.
35 Yuushoy abban teqetida biittan de7iya asa ubbay
ne bolla gakidaba be7idi dagammidosona.
Enta kawoti daro yayyidosona;
enta som7oy yashshan shullis.
36 Ne wursethay daganthiyaba gidis;
neeni zaarada daaka.
Hessa gisho, biitta ubban de7iya
zal7anchoti, shinchalle gidoosona” yaagis.