1 Godaa qaalay haysada yaagishe taako yis. 2 “Asa na7aw, Ubbaa Haariya Goday haysada yaagees gadas Xiroosa halaqa oda: ‘Ne wozanay otortida gisho, taani xoosse; taani abba giddon, xoossata araatan uttas’ yaagadasa. Neeni, ‘Taani xoossada, cinca gidas gada qopikoka ne asepe attishin, xoosse gidaka. 3 Ne Daanelape aadhada cincay? Ay xuurika neepe geemmennee? 4 Tuma ne cincatethaaninne ne akeekan dure gidadasa; ne buqura minja keethan biranne worqaa shiishadasa. 5 Ne zal7iya eran daro wodhe demmadasa; ne duretetha gaason ne wozanay otortis’ ” yaagees.

6 Hessa gisho, Ubbaa Haariya Goday haysada yaagees: “Taani xoossada cinca gada qopiya gisho, 7 ta ne bolla qadhey bayna wozana mino morketa ehana; enti neeni cincatethaninne eratethan shiishida shalo ubbaa mashshan dhaysana; enti ne bonchuwa tunisana. 8 Enti nena si7oole yeddana, neka ciimmo abban hayqana. 9 Enti nena wodhanaw yaa wode neeni, ‘Taani xoossa’ gaanee? Nena wodhiya asaa kushen ne kundiya wode ne asepe attishin, xoosse gidaka. 10 Neeni allagata kushen ammanonna asi hayqiya hayqo hayqana” yaagees Ubbaa Haariya Goday.

11 Qassi Godaa qaalay haysada yaagishe taako yis. 12 “Asa na7aw, Ubbaa Haariya Goday haysada yaagees gada Xiroosa kawas zeleela: ‘Neeni kase cincatethan kumadasa; neeni asi leemisidi odiya puulanne cinca gidadasa. 13 Neeni Edenen, Xoossa gannatiyan kase de7adasa; sardiyoone, toophaze, almaaze, birille, margide, yasphide, sanparenne baluure geetetiya al7o shuchan alleeqetada, lo77o worqa alleeqo kase ma7adasa; ne medhetida gallas he ubbay new giigis. 14 Nena naagiya kiruube oothada shuumas; nena tiyas. Ta geeshsha zumaa bolla ne de7adasa; tamada phooliya al7o shuchata giddon simeretadasa. 15 Ne medhetida gallasaape doomada, iitabay ne bolla bentana gakanaw borey bayna de7adasa. 16 Ne daro zal7en mathotida gisho buqethan kumada, nagara oothadasa. Hessa gisho, ta geeshsha zumaape nena wolqan kessas. Nena naagiya kiruubey, he tamada phooliya al7o shuchata giddofe yedethis. 17 Neeni mala lo77o gidiya gisho daro otortadasa; ne boncho koyada cincatetha kawushadasa. Hessa gisho, ta nena sa7an yeggas; hara kawoti nena be7idi bayana mela oothas. 18 Ne nagaraninne ne balethiya zal7iyan, ne goyinno bessata tunisadasa. Hessa gisho, tami ne giddofe keyanaada oothas; ika nena mis. Ubbay xeellishin, ta nena xuuggada sa7aa bolla bido kessas. 19 Nena kase eriya kawotethati ubbay dagammidosona. Ne wursethay yashshiyabaa gidis; neeni zaarada bentaka’ ” yaagis.

20 Godaa qaalay haysada yaagishe taako yis. 21 “Asa na7aw, ne som7uwa Sidoonako zaarada iya bolla tinbite oda. 22 Neno, Sidoona, ta new morke gidana. Taani ne bolla oothiyaban ta bonchoy qoncana. Ne giddon de7eysati pirdan taani ta geeshshatetha bessiya wode, taani Godaa gideysa enti ubbay erana. 23 Ta ne bolla iita harge yeddana; oge ubban suuthi gukanaada oothana. Ubba baggara yaa olaa gaason ne asay mashshan hayqana. Taani Godaa gideysa enti he wode erana. 24 Hizape guye Isra7eele yuushon de7iya, iya kadhidi xeelliya, biitta ubban aguntha melanne kinchote mela qohiya oonika deenna. Taani Ubbaa Haariya Godaa gideysa enti he wode erana” yaagees Ubbaa Haariya Goday.

25 “Isra7eele asaa laaletida biitta ubbaafe shiishada ehiya wodenne kawotethata ubbaa sinthan taani ta geeshshatetha bessiya wode, taani ta aylliya Yayqoobas immida banta biittan enti daana. 26 Yan enti saronne naagetidi daana; keethe keexana; woyne tokana. Enta kadhidi xeelliya enta shoorota ubbaa taani pirdiya wode Isra7eele asay saro daana. Taani Godaa enta Xoossaa gideysa enti he wode erana” yaagees Ubbaa Haariya Goday.