1 Godaa qaalay haysada yaagishe taako yis. 2 “Asa na7aw, Maagoge biittan de7iya Mosahanne Tobeela asaa bolla waanna halaqa gidida Googe bolla tinbite oda. 3 Ubbaa Haariya Goday haysada yaagees gada oda. Mosahanne Tobeela waanna halaqa gidida Googe ta ne bolla dendas. 4 Ta nena guye zaarana; ne sidhen dafo aathada, ne olanchotara, ne paratara, ola miishe ma7ida ne para asatara, banta mashsha leefida, gitanne guutha gondalle oykida asaara nena goochada kessana. 5 Farsefe, Tophefenne Liibepe yida asay gondalle oykidi, huuphen birata barneexa wothidi, entara gidana. 6 Gomerinne iya olanchoti ubbay, pudeha baggan de7iya Beet-Torgaaminne iya olanchoti neera gidana.

7 “Nenne neeko shiiqida asa ubbay dendite; hintena giigisite; ne entaw halaqa gida. 8 Daro wodepe guye, ne olas koyettana; sinthafe yaana laythatan daro wode baysa gididi de7ida biitta, olape shempida biittanne, iyan de7iya asay daro kawotethatape Isra7eele dereta shiiqida biitta olanaw ne dendana. Enti daro kawotethatape shiiqidaysatanne ubbay ha77i saro de7eyisata. 9 Neeni, ne olanchotinne neera de7iya daro kawotethati goteda dendana; hinte shaarada biitta kammana” yaagees.

10 Ubbaa Haariya Goday haysada yaagees: “He wode qofi ne wozana giddo yin, ne iitabaa halchana. 11 Neeni, ‘Taani diretiboonna gutata olana; wopu gidi, hirgi bayna de7iya asata, dirsi, pengey woyko gordey bayna katamata ta olana. 12 Taani enta di77ananne bonqana; kase baysa gidida biitta yidi uttida, kawotethata giddofe shiiqida, mehenne miishe haarida, biittas gul7an uttida asaa bolla ta kushiya denthana’ yaagana. 13 Saaba asaynne Didaana asay Tarsesa zal7anchotinne na7atethi olanchoti ubbay, ‘Ne bonqanaw yadii? Ne olanchota di7o toossanaw, biranne worqa gaazisanaw, mehenne miishe ekanawunne di7uwa bonqanaw daro asi shiishadii?’ ” yaagana.

14 Hessa gisho, asa na7aw, Googe bolla haysada yaagada tinbite oda. Ubbaa Haariya Goday haysada yaagees: “He wode, ta asay Isra7eele hirgi bayna de7iya wode, neeni akeekikii? 15 Neeni de7iya pudeha bagga biittafe yaana. Nenne neera de7iya daro kawotethati para toggidi, mino olancho gididi, yaana. 16 Biitta kammiya shaarada, ne ta asaa Isra7eele bolla yaana. Googe sinthafe yaana wodiyan ta nena ta biitta bolla denthana. Hessa ta oothey kawotethati tana erana melanne taani ne baggara oothiyabay ta geeshshatetha enta sinthan bessaana melasa” yaagees.

17 Ubbaa Haariya Goday haysada yaagees: “Taani ta aylle gidida Isra7eele nabeta baggara, kase wode zaara zaarada Isra7eelen tinbite odas. 18 Ubbaa Haariya Goday haysada yaagees: ‘Googey Isra7eele bolla dendiya wode ta hanqoy suullana. 19 He wode Isra7eele biittan wolqaama biitta qaaxoy hanana; taani ta sheniyaninne ta eexiya hanquwan awaajas. 20 Abbaa moloy, salo kafoy, deren de7iya meheynne do7ay, sa7a bolla woxi qaaxiya medhetethi ubbaynne sa7an de7iya asa ubbay ta sinthan kokorana. Dereti kundana; aafoti woddana; dirsa gimbe ubbay laaletana. 21 Ta zumatan ubban Googe bolla mashshi dendana mela oothana; olanchoti banta mashsha banta bolla zaaridi, issoy issuwa wodhana. Taani Ubbaa Haariya Goday haysa odas. 22 Taani hargeninne hayqon iya seerana; wolqaama ira, shachi, xuuggiya diinne iya bolla, iya olanchota bollanne iyara de7iya kawotethata bolla bukisana. 23 Hessada oothada, taani ta gitatethaanne ta geeshshatetha bessaana. Daro kawotethata taani tanatethaa erisana. Taani Godaa gideysa enti he wode erana’ ” yaagis.