1 Ubbaa Haariya Goday haysada yaagees: “Asa na7aw, Googe bolla haysada yaagada tinbite oda. Mosahanne Tobeela asaas waanna halaqa gidida Googe, ta new morke. 2 Ta nena guye zaarana; haaho gidida pudeha bagga biittafe goocha kessada, Isra7eele dereta bolla nena ehana. 3 Taani ne haddirsa kushiyape dongeta baqa yeggana, ne ushacha kushiyape donge toorata yegisana. 4 Neeni, ne olanchotinne neera de7iya kawotethati ubbay Isra7eele deriya bolla kundidi attana. Taani hinte ashuwa kafotasinne bazzo do7atas kathi oothada immana. 5 Taani Ubbaa Haariya Goday hessa odida gisho, hinte ubbay denban kundidi attana. 6 Maagoge biittaninne yuushoy abban teqetida biittatan, hirgi bayna uttida asaa bolla taani eexiya tama yeddana. Taani Godaa gideysa enti he wode erana. 7 Ta geeshsha sunthay ta asaa Isra7eele giddon eretanaada oothana. Hizape guye ta geeshsha sunthay cayetena. Kawotethati taani Godaa, Isra7eele Geeshshaa gideysa erana” yaagis.

8 Ubbaa Haariya Goday haysada yaagees: “He gallasay yaana; attenna” yaagada ta odida gallasay haysa.

9 “He wode Isra7eele katamatan de7iya asay keyidi, ola miisheta ubbaa taman eethana; hessika guuthanne gita gondalleta, dongeta, donge toora, tooratanne xam7ata ubba xuuggana. Laapun laythi kumethi enti eeso mithi oothidi go7etana. 10 Enti mithi mixanaw woyko worape mithi qanxanaw koshshenna. Enti shiishida ola miisheta eeso mithi oothidi go7etana. Bantana bonqidaysata zaaridi bonqana; entaba ekidaysatape enti zaaridi ekana” yaagees Ubbaa Haariya Goday.

11 He gallas Googe moogetiya bessi taani iyaw Isra7eele biittan immana. He bessay abbaafe doloha baggara de7iya Ooge asata Zangaara geetetiya zangaara giddon gidana. Googeynne iya olanchoti ubbay yan moogetiya gisho, enta duufoy yaara hemetiya asaas oge gordana. He bessay, “Googe Olanchota zangaara” geetetidi xeegetana.

12 “Isra7eele asay biitta geeshshanaw, laapun ageena kumethi aha moogishe gam7ana. 13 He biittan de7iya asa ubbay aha moogon maadetana; hessan, taani ta bonchuwa qoncisiya wode entaw boncho gidana” yaagees Ubbaa haariya Goday. 14 Laapun ageenape guye attida ahi de7iko, moogana mela asi dooretana; he asay biittay geeyana gakanaw ubba wode biitta ubban yuuyidi attida aha demmidi moogosona. 15 Enti biittan yuuyishin, asa meqethi bentiko, he meqetha matan malla wothidi aadhana. Moogeysati yidi, Googe Olanchota zangaaran moogana. 16 He katama sunthay Hamoona geetetana. Enti biitta zaaridi geeshshana. Iya heeran, “Olanchota Katamaa” geetetidi xeegetiya katami daana.

17 Ubbaa Haariya Goday haysada yaagees: “Asa na7aw, kafo kochenne sa7a do7atas haysada yaagada xeega. Ta hintew Isra7eele dereta bolla giigisida gita yarsho ba7aalen asho maanawunne suuthu uyanaw ubba bessafe shiiqidi haayite. 18 Hinte mino asata ashuwa maana; biitta halaqata suuthaa uyana. Enti hintew Baasane modho urge dorsada, marazeda, koledanne boora mela gidana. 19 Taani hintew giigisida yarsho ba7aalen hinte kallana gakanaw, modho maana; mathotana gakanaw, suuthu uyana. 20 Ta hintew giigisiya gibiraape parata, para asata, mino toora asatanne hara olanchota ubba ashuwa hinte kallana gakanaw maana” yaagees Ubbaa Haariya Goday.

21 “Taani kawotethata giddon ta bonchuwa qoncisana. Kawotethati ubbay ta enta pirdida pirdanne ta enta bolla denthida ta kushiya be7ana. 22 He wodiyape doomidi, Isra7eele asay taani Godaa, enta Xoossaa gideysa erana. 23 Isra7eele asay di7etidi biday banta nagara gaason, gideysa hara kawotethati erana. Enti taw ammanetona ixida gisho, taani ta som7uwa entafe denthada, enta morketas enta aathada immin, enti ubbay olan hayqidosona. 24 Enta tunatethaanne enta iitatetha mela entaw bessiya seera seeras; ta som7uwa entafe genthas” yaagis.

25 Ubbaa Haariya Goday haysada yaagees. “Ha77i taani Yayqooba kochata di7ope zaarada gashtisana; Isra7eele asaa ubbaas qadhetana. Ta geeshsha sunthas mishetada cayetonna mela oothana. 26 Enta yashshiyabay bayna, banta biittan saro duussu doomiya wode kase banta yeellanne taw ammanetona ixidaysa dogana. 27 Taani enta kawotethata ubbaa giddofe zaarada ehana; morketa biittafe enta shiishana. Hessada oothada, taani geeshshi gideysa enta baggara kawotethata ubbaa bessaana. 28 Enti di7etidi baana mela oothiday tana gidiya gishonne enta shiishada, enta biitta zaarida gisho, taani Godaa enta Xoossaa gideysa enti erana. Taani entafe issuwaka kawotethata giddon aggike. 29 Taani ta Ayyaana Isra7eele asaa bolla gussana; zaarada ta som7uwa entafe genthike” yaagees Ubbaa Haariya Goday.